Žurnalistka i byłaja palitźniavolenaja Łarysa Ščyrakova ŭ novym vypusku TOKu raskazała, jak adbyvajuć termin u homielskaj žanočaj kałonii klučavyja fihurantki spravy Tut.by — hałoŭnaja redaktarka Maryna Zołatava i dyrektarka Ludmiła Čekina.
Maryna Zołatava: prafiesijanał u luboj spravie
Łarysa Ščyrakova adznačaje, što Maryna Zołatava, asudžanaja na 12 hadoŭ, chutka zavajavała pavahu, pryčym u niečakanaj dla mnohich śfiery.
«Zołatava čamu ŭ aŭtarytecie? Jana, naprykład, vydatnaja švačka. Jana šyje vielmi jakasna. Praŭda, jana nie vielmi chutka šyje, tamu što jašče vielmi važnaja chutkaść, ź jakoj ty robiš pracesy. (…) Jaje vielmi pavažajuć jak prafiesijanała šviejnaj spravy», — raspaviadaje Ščyrakova.
Pavaha da Zołatavaj trymajecca i na jaje čałaviečych jakaściach.
«Ludzi bačać, što heta adukavany, što heta razumny čałaviek, što heta dobry šviejny śpiecyjalist, što heta prosta čałaviek, jakoha pavažajuć nie tamu, što joj 12 hadoŭ dali. Naturalna, što nie z-za terminu. Tam prosta jość padstavy jaje pavažać, tamu što jana siabie tak pavodzić. Tamu što heta prystojny, adukavany, vychavany, cudoŭny čałaviek», — padkreślivaje Ščyrakova.
Ludmiła Čekina: krynica aptymizmu
Nie mienš ciopła Łarysa Ščyrakova adhukajecca i pra byłuju hiendyrektarku Tut.by Ludmiłu Čekinu.
«Boža, Ludačka, Miła! Heta ž taki čałaviek!» — z zachapleńniem kaža Ščyrakova.
Pieršaje, što adznačaje Łarysa, — heta źniešnija źmieny. Pavodle Ščyrakovaj, Čekina značna schudnieła, ale była zadavolenaja svajoj novaj fizičnaj formaj.
«Zaraz jana ŭ dobraj fizičnaj formie, jana dobra vyhladaje. To-bok jana kaśmietykaj nie karystajecca, ale ŭsio roŭna jana vielmi simpatyčnaja. I jana ŭvieś čas paśmichajecca».
Pavodle Ščyrakovaj, źniavolenyja vielmi lubiać Čekinu za jaje adkrytaść, dabryniu i empatyju.
Ščyrakova charaktaryzuje Ludmiłu Čekinu jak «niejmavierna erudyravanuju»:
«Ź joj vielmi cikava razmaŭlać. Jana taksama schilnaja da ŭsiakich refleksij (psichałohija, fiłasofija), da analizu ŭsiaho, što adbyvajecca, u tym liku i analizu čałaviečych pavodzin».
Jak raskazvaje Ščyrakova, Ludmiła Čekina była adnoj z najlepšych maderatarak padčas niadzielnych abmierkavańniaŭ filmaŭ u kłubie, jakija źniavolenyja prahladali ŭ kałonii. Dziakujučy joj i inšym palitźniavolenym, hetyja sustrečy pieratvaralisia ŭ hłybokija intelektualnyja dyskusii.
U toj ža čas, jak zaŭvažaje Łarysa, u dyskusii imknułasia nie ŭdzielničać Maryna Zołatava. I heta była jaje pazicyja:
«U jaje taki pryncyp: «Ja nie chaču aktyŭna ŭdzielničać va ŭsich hetych mierapryjemstvach. Ja nie chaču pierad imi vystupać. Ja nie chaču pramaŭlać. Łarysa, ja nie chaču. Heta ich mierapryjemstvy».
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony10
Kamientary