Biełaruska vyjšła zamuž za łondanskaha miljaniera, starejšaha na 41 hod. Jon pakinuŭ joj $400 tysiač z umovaj maŭčać — a jana adsudziła miljony

Praz dva hady biełaruska vyjšła zamuž za brytanskaha miljaniera, pakinuła Izrail i pierajechała ŭ Łondan. Kali ŭ 2020‑m jon pamior va ŭzroście 87 hadoŭ, jaho majomaść aceńvali bolš jak u £9 miljonaŭ funtaŭ ($12 miljonaŭ pa ciapierašnim kursie ). Žoncy pa zaviaščańni dastałosia 300 tysiač funtaŭ ($400 tysiač pa ciapierašnim kursie) — «z tym razumieńniem, što jana nie budzie pretendavać na spadčynu».

Praź piać hadoŭ sudovych vojnaŭ Vysoki sud Anhlii pryznaŭ heta nierazumnym i prysudziŭ udavie siamiejny dom bieź ipateki i amal 1,9 miljona funtaŭ (kala $2,5 miljona) źvierchu — ź pierśpiektyvaj atrymać 40% usioj majomaści.

Mužčyna ź Vienhryi i dziaŭčyna ź Biełarusi

Alaksandr Klejn naradziŭsia 25 sakavika 1933 hoda ŭ Vienhryi. U Łondan trapiŭ padletkam, u 15—16 hadoŭ — pakaleńnie vienhierskich jaŭrejaŭ, čyjo dziacinstva pryjšłosia na Chałakost. U Brytanii jon zbudavaŭ bujny biznes na nieruchomaści: dziasiatki damoŭ i kvater, aformlenych praz vasiamnaccać kampanij.

Alena Rudzik naradziłasia 2 lutaha 1974 hoda ŭ Biełarusi. Na momant znajomstva jana žyła i pracavała ŭ Ijerusalimie. Klejn — na 41 hod starejšy, užo dvojčy žanaty — uhavaryŭ jaje pakinuć Izrail i pierajechać da jaho ŭ Łondan, apłačvajučy hatel i arendu kvatery. U studzieni 2003‑ha jana pierajechała, u mai jany zaručylisia, a 18 vieraśnia 2003 hoda pabralisia ŭ Ijerusalimie.

«Z umovaj nie pretendavać» — heta byŭ jaho počyrk

Niezadoŭha da viasiella Klejn daŭ Alenie padpisać dakumient, jaki całkam pazbaŭlaŭ jaje pravoŭ na lubyja pretenzii da jaho majomaści. Jurysta ŭ jaje nie było, a jaje anhlijskaj, jak paźniej zaznačyŭ sud, nie chapała, kab zrazumieć napisanaje: jana tolki ŭ mai 2003‑ha pajšła na kursy dla pačatkoŭcaŭ i amal nie chadziła na ich — rychtavałasia da viasiella.

Hetaja farmuloŭka była nie vypadkovaj. Za dva hady da taho, u listapadzie 2001-ha, Klejn na sustrečy ź jurystam kazaŭ, što razvodzicca ź pieršaj žonkaj Jael i choča skaracić joj spadčynu da 10 tysiač funtaŭ — z toj samaj ahavorkaj, što jana «nie budzie pretendavać». Šabłon paŭtaraŭsia ad žonki da žonki.

U šlubie, pavodle materyjałaŭ spravy, Klejn adhavorvaŭ Alenu vučycca i pracavać. Kali jana vyvoziła syna na adpačynak ci da dziadoŭ u Biełaruś, muž patrabavaŭ padpisvać asobnyja «pahadnieńni» — z datami, kantaktami i paradkam spravazdačy pierad im. U 2007‑m u ich naradziŭsia syn Elijat.

Biełaruś prachodzić praz usiu historyju. U 2011-m, kali šlub traščaŭ, Klejn — praz šeść tydniaŭ paśla infarktu — praź jurystaŭ patrabavaŭ, kab maci Aleny vyjechała ź siamiejnaha doma, prapanoŭvajučy dačce na čatyry tydni svaju kvateru kala Marble Arch. Baćka Aleny pierajedzie da jaje ŭ Łondan paźniej — paśla śmierci jaje maci.

Zaviaščańnie i sakratarka na paŭstahodździa

Pa zaviaščańni 2011 hoda žoncy pryznačalisia 300 tysiač funtaŭ, synu — 100 tysiač funtaŭ u traście. A 90% usiaho astatku majomaści Klejn pakidaŭ na dabračynny trast — jaŭrejskim škołam, ješyvam i prytułkam.

Asobnaja fihura — Sidlija Adler, šmathadovaja sakratarka i biznes-partniorka Klejna. Ich suviaź, pavodle suda, ciahnułasia z 1960-ch. Joj dastalisia 200 tysiač funtaŭ i 10% astatku, jaje ž Klejn pryznačyŭ vykanaŭcaj zaviaščańnia. Alena, pavodle svaich słoŭ, čuła ad muža, što Adler — «prosta sakratarka».

Biznes Klejn vioŭ niefarmalna: dakumienty składaŭ sam, bieź jurystaŭ, ale klikaŭ advakata za śviedku — bo aboje z Adler vieryli, što podpis advakata robić papieru «aficyjnaj i zakonnaj». Na hetych samarobnych papierkach paźniej i paŭstanie hałoŭnaja bitva.

Dzie buduć žyć udava i dvanaccacihadovy syn i na što žyć — tastamient nie vyznačyŭ uvohule. Za piać hadoŭ paśla śmierci muža Alena atrymała ŭ spadčynu adzinuju vypłatu — 7500 funtaŭ.

Piacihadovaja vajna

Pieršaj pieraškodaj stała Adler. Jana tak viała spravy, što ŭ 2021‑m sud adchiliŭ jaje ad vykanańnia zaviaščańnia i pryznačyŭ niezaležnuju karparacyju Cripps. Adler abaviazali zapłacić 80% sudovych vydatkaŭ udavy.

Kali da majomaści dabralisia, akazałasia, što z vasiamnaccaci kampanij častka vyklučanaja z rejestra, niejkija «vałodajuć» nieruchomaściu, jakoj u ich niama, a z rachunkaŭ źnikli sotni tysiač funtaŭ. Adler, pavodle suda, vyvodziła hrošy z kampanij biez pravoŭ.

A ŭ listapadzie 2023‑ha jana pajšła va-bank: padała asobny isk, zajaviŭšy, što akcyi kampanij nasamreč naležali joj, a nie Klejnu. Staŭki byli vielizarnyja — kali b sud pahadziŭsia, majomaść abvaliłasia b z prykładna 8 miljonaŭ funtaŭ da 1,4 miljona funtaŭ, a spadčyna praktyčna źnikła b. Sprečnyja doli aceńvali ŭ 2,5 miljona funtaŭ.

Isk dajšoŭ da paŭnavartasnaha razboru i ŭ kastryčniku 2024‑ha byŭ adchileny. Pazicyju Adler acharaktaryzavali jak «aburalnuju» i «cyničnaje vykarystańnie suda». Samo ž administravańnie majomaści tak zaciahnułasia, što sudździa Uiljams paraŭnaŭ spravu z «Chałodnym domam» Dzikiensa — biaskoncaj ciažbaj, jakaja pahražaje źjeści ŭsiu spadčynu.

Rašeńnie

7 sakavika 2025 hoda sudździa Uiljams pryznaŭ, što zaviaščańnie nie zabiaśpiečyła ŭdavu razumna.

Dašlubnyja pahadnieńni sud adchiliŭ: bieź jurydyčnaj dapamohi, pry nieraŭnavazie bakoŭ i niedastatkovaj anhlijskaj jany nie majuć vahi. Choć Klejn nažyŭ bahaćcie jašče da šlubu, amal 17‑hadovy šlub, vychavańnie syna i viadzieńnie doma pieravažyli.

Alenie prysudzili siamiejny dom u rajonie Chiendan na poŭnačy Łondana bieź ipateki (kala £1 miljona) i adzinuju sumu £1 864 089 — na biahučyja patreby, kapitalizavany prybytak i ŭtrymańnie syna. Razam — kala £2,86 miljona jak absalutny minimum. Kali ž majomaść udasca acanić bolš čym na £7,16 miljona, udava atrymaje 40% usioj čystaj vartaści. Vydatki na praces uskładzieny na Adler i spahaniacca buduć ź jaje doli ŭ spadčynie.

Hrošy Alenie vypłaciać častkami: realnaja vartaść majomaści dahetul nie vyznačanaja, a kampanii tolki musiać być raspradadzienyja. Pakul hetaha nie adbudziecca, nivodzin ź pieraličanych u zaviaščańni — ni svajaki, ni dabračynnyja fondy — nie atrymaje ničoha.

• 14
• 0
• 4
• 6
• 4
• 0
• 0
• 0