Prapahandyst Mukavozčyk zaklikaŭ «nie nyć» tych, chto nie moža kupić kvateru ŭ Minsku. A što z žyllom u jaho samoha?

Epocha KVZ i pieršaje žyllo

U 1990‑ia i 2000‑ia hady biełarusy viedali Andreja Mukavozčyka pa biełaruskim kłubie KVZ — jon uznačalvaŭ abjadnańnie i vioŭ hulni. Praŭda, prajekt nazyvali stratnym.

Jak vyśvietliła «Lusterka», pieršaja kvatera va ŭłasnaści Mukavozčyka źjaviłasia ŭ 2000 hodzie. Aficyjna heta byŭ padarunak — adnapakajoŭka płoščaj 39,6 kvadratnaha mietra na vulicy Kulman u Minsku, niepadalok ad Kamaroŭskaha rynku. Viadučy zastajecca jaje ŭłaśnikam dahetul.

Pavialičyć

U 2008‑m Mukavozčyk akazaŭsia ŭ centry kanfliktu sa strukturami Alaksandra Maślakova, u vyniku biełaruski prajekt adkałoŭsia ad mižnarodnaha ruchu KVZ z centram u Maskvie. Paśla sudoŭ i publičnaha vyśviatleńnia adnosin biełaruskija kamandy kalektyŭna vystupili suprać Mukavozčyka i praciahnuli hulać u sistemie Maślakova. A humarystyčnyja inicyjatyvy Mukavozčyka z časam syšli na ništo.

Telebačańnie i nie samy patrebny dom

Sam viadučy praciahvaŭ karjeru na telebačańni. Niekatory čas jon vioŭ na kanale «Biełaruś 3» pieradaču «Kultpraśviet», pryśviečanuju nacyjanalnamu kino. Taksama jaho zapisvali jak načalnika adździeła i «dyrektara dyrekcyi» Biełteleradyjokampanii.

U 2015 hodzie Mukavozčyk zajmieŭ nievialiki ŭčastak i draŭlany dom u vioscy Virłavičy Staŭbcoŭskaha rajona, vynikaje ź infarmacyi krynicy «Lusterka». Adnak pradaŭ ich praź niekalki hadoŭ.

«Dom — jon słužby patrabuje. Nieabaviazkova ŭ sensie «dziaržaŭnaj» — u svaim domie zaŭsiody jość što rabić. Zaŭsiody. Letam i zimoj, u maładości i ŭ staraści, chočaš ty ci nie, ale — budź dobry pracavać. Dom zapuskać nielha: heta i bačna adrazu. I jakaść žyćcia ciarpić nieadkładna», — tłumačyŭ jon paźniej u adnoj z publikacyj.

Praca ŭ «SB» i novaja kvatera

U 2016 hodzie Mukavozčyk uładkavaŭsia ŭ dziaržhazietu «SB. Biełaruś siehodnia». Na jaje staronkach jon spačatku razvažaŭ pra kino, ale pastupova pierajšoŭ da palityčnych tem. U jaho vykanańni na apanientaŭ režymu ščodra palilisia chłuśnia i abrazy. Byŭ navat sud, jaki davioŭ, što kałumnist napisaŭ niapraŭdu, adnak tady jaho vyrašyli nie karać.

Pavialičyć

Paśla troch hadoŭ pracy ŭ «SB» — u 2019 hodzie — prapahandyst zavioŭ druhuju kvateru ŭ Minsku. I znoŭ pobač z Kamaroŭkaj — hetym razam na vulicy Kujbyšava. Jana była ŭžo bolš prastornaj: try pakoi i 64,9 kvadratnaha mietra.

Ipateka na 20 hadoŭ

Paśla 2020 hoda prapahandysckaja karjera Mukavozčyka pajšła ŭharu: jon ŭzbahaciŭ leksiku dziaržhaziety zvarotami nakštałt «ubohija», «piaciuni-pietuški», «zhraja intelektualnych bamžoŭ» i «zvarjaciełyja pacuki», atrymaŭ dźvie premii «Załatoje piaro», pačaŭ vieści «aŭtarskuju rubryku» na STB i supracoŭničać z VNU.

U 2023‑m fieljetanist palepšyŭ žyllovyja ŭmovy: pradaŭ svaju trochpakajoŭku i nieŭzabavie kupiŭ čatyrochpakajoŭku. Daloka jechać nie pryjšłosia, novaja kvatera taksama znachodzicca pobač z Kamaroŭkaj — u adnym z damoŭ-«kukuruz» na vulicy Viery Charužaj. Jaje płošča — 98,4 kvadratnaha mietra.

Pavialičyć

Minskija «kukuruzy» viadomyja nie tolki aryhinalnym źniešnim vyhladam. Šmatpaviarchoŭki stali pieršymi ŭ Biełarusi manalitna-karkasnymi damami. U 1990‑ia hady kvatery ŭ ich ličyli elitnymi, adzin z žycharoŭ uspaminaŭ, jak miaškami nasiŭ miljardy starych rubloŭ u ofis zabudoŭščyka. Kvatery dahetul nielha nazvać tannymi: miarkujučy pa apublikavanych abjavach, za čatyry pakoi tam u 2024 hodzie prasili 544 tysiačy rubloŭ (169 tysiač dalaraŭ), a ŭ 2026‑m — 687 tysiač rubloŭ (226 tysiač dalaraŭ).

Jak daviedałasia «Lusterka», Andrej Mukavozčyk aformiŭ svaju novuju kvateru ŭ ipateku, «Biełarusbank» pazyčyŭ jamu 210 tysiač rubloŭ na 20 hadoŭ. Raźličycca z bankam supracoŭniku dziaržhaziety treba budzie da 2043 hoda (da taho momantu jamu spoŭnicca 80).

Jakija ŭmovy kredytu prapanavali praŭładnamu kałumnistu i viadučamu — nieviadoma. Aktualnyja prapanovy banka dazvalajuć uziać takuju sumu na žyllo, štomiesiačnyja płaciažy składuć ad 2000 da 3445 rubloŭ.

«Nidzie ŭ śviecie ŭłasnaje žytło nie dastajecca ludziam lohka i zadarma»

Cikava, što ŭ adnoj ź niadaŭnich kałonak Mukavozčyk vyśmiejvaŭ maładych ludziej, jakija praz tyktok abmiarkoŭvali ciažkaści z kuplaj kvatery.

«Chaču nahadać, što nidzie ŭ śviecie ŭłasnaje žytło nie dastajecca ludziam lohka i zadarma. Usiudy davodzicca ŭłazić u niepadjomnyja kredyty, potym bankrutavać i tracić (razam z žyllom) jašče i hrošy. Nu abo zakryvać kredyty da staraści, a to i pieradavać dzieciam z unukami», — pisaŭ jon.

Pavialičyć

U hetaj publikacyi jon daŭ maładym ludziam ceły pačak parad: naprykład, «nie nyć», «žyć radasna», nie imknucca ŭ Minsk, rupliva pracavać. A jašče — spytać u baćkoŭ, dzie kvatery i dačy, jakija ŭ saviecki čas možna było atrymać «ad zavoda».

«I voś što varta zapomnić usim maładym. Mienavita zaraz u historyi Biełarusi nastaŭ unikalny čas, kali prodki mohuć pieradać naščadkam (i pieradajuć ža!) nazapašanaje imi za ŭsio žyćcio. Hrošy, kvatery, dačy — a jašče zavody, darohi, sietki… Asabistuju majomaść ź nieruchomaściu, jakich niamała, — i cudoŭnuju, mocna stajačuju na nahach, suvierennuju krainu», — piša supracoŭnik dziaržaŭnaj haziety.

• 1
• 0
• 3
• 25
• 0
• 0
• 4
• 0