Siońnia Dzianisu Ivašynu spoŭniłasia 47 hadoŭ.
Šosty raz žurnalist sustrakaje dzień narodzinaŭ u niavoli, ź ich treci raz u śledčaj turmie № 8 u Žodzinie, dzie jaho trymajuć na turemnym režymie, piša Radyjo Svaboda.
Užo paŭtara hoda Dzianisu nie dazvolenyja zvanki svajakam, ale listy i paštoŭki da jaho dachodziać.
U adnym z apošnich listoŭ palitviazień dasłaŭ svajakam svoj novy vierš, jaki ŭ fejsbuku vykłała žonka Volha.
Usłuchoŭvajusia. Čuju šept rasistych kałasoŭ,
Hamankich čajcaŭ pa-nad bruistaju Plisaju,
Hutarku vietryku ŭ nierušy adviečnych lasoŭ
I kalužanskuju pieśniu, što spavivaje kałysku.
«Heta znoŭku čatyrochradkoŭje, napisaŭ i dasłaŭ baćkam jaho Dzianis u minuły čaćvier. Chutkaść, ź jakoj novaja karespandencyja dalataje da nas ad Dzianisa, adnaznačna nam padabajecca, chaj by zachoŭvałasia tak i nadalej!» — prakamientavała publikacyju žonka palitviaźnia Volha Ivašyna ŭ fejsbuku.
Pavodle źviestak ad Volhi Ivašynaj, u viaźnicy jaje muž praciahvaje šmat čytać i składaje płany dalejšaj samaadukacyi ŭ takich navukach, jak palitałohija i sacyjałohija.
«Skłaŭ śpis litaratury non-fikšn, jakuju źbirajecca pračytać. Tam bolš za 10 pazicyj», — adznačaje žonka žurnalista Ivašyna.
Pra fizičny stan muža Volha šmat źviestak nie maje.
«Zvyčajna dadaje: «fizičny stan narmalovy, pryčyn dla chvalavańnia niama, maralna-bajavy duch — na vyšyni». Hetak i zaraz», — paviedamiła Volha Ivašyna.
Dzianis Ivašyn byŭ zatrymany 12 sakavika 2021 hoda ŭ Hrodnie i asudžany na 13 hadoŭ i 1 miesiac źniavoleńnia za nibyta «zdradu dziaržavie» (art. 356 Kryminalnaha kodeksu) i «niezakonny zbor i raspaŭsiud źviestak ab pryvatnym žyćci» (art. 179 KK). Jaho trymajuć va ŭmovach strohaha režymu ŭ turmie № 8 u Žodzinie.
Ciapier čytajuć
Były palitviazień znajšoŭ u Vilni padpracoŭku ŭ čacie — i trapiŭ pad kryminałku za pravakacyi suprać Ukrainy13
Kamientary