U Brazilii 37‑hadovaja žančyna vydavała siabie za 12‑hadovuju i traplała ŭ pryjomnyja siemji, dzie žyła za čužy košt

37‑hadovaja Amanda Maryja Soŭza de Aliviejra raspracavała detalovuju schiemu manipulacyi, jakaja dapamahała joj na praciahu doŭhaha času paśpiachova vydavać siabie za 12‑hadovuju dziaŭčynku, kab traplać u siemji i atrymlivać finansavuju padtrymku ad dabračynnych arhanizacyj.

Pavodle źviestak śledstva, na jakoje spasyłajecca vydańnie Folha de S.Paolo, historyja praciahvałasia z 2018 hoda. Amanda vykarystoŭvała falšyvyja imiony i vydumlała historyi pra žorstkaje abychodžańnie. Machlarka zvyčajna znachodziła achviar, śćviardžajučy, što ŭciakła ad hvałtu, prymusovaj prastytucyi abo ździekaŭ z boku svajakoŭ.

Kab vyklikać davier, jak piša The Sun, žančyna štučna źmianiała hołas, karystałasia dziciačymi butelečkami, pustyškami i śpiecyjalnaj koŭdraj dla snu. Jaje pavodziny całkam imitavali psichałohiju dziciaci, uklučajučy načnyja prystupy paniki i emacyjnuju zaležnaść ad «baćkoŭ».

Pavialičyć

Pavodle śledstva, žančyna śćviardžała, što pakutuje ad aŭtyzmu i inšych zachvorvańniaŭ. Kali ž uźnikali pytańni nakont jaje darosłaj źniešnaści, jana tłumačyła heta nibyta prymusovym užyvańniem harmonaŭ u dziacinstvie, jakoje, pavodle jaje słoŭ, paŭpłyvała na fizičnaje raźvićcio.

Apošni i samy praciahły epizod adbyŭsia ŭ horadzie Žainvili (Joinville), štat Santa-Kataryna. Tam Aliviejra zmahła pierakanać siamiejnuju paru pryniać jaje ŭ svoj dom. Na praciahu 14 miesiacaŭ sužency kłapacilisia pra jaje jak pra rodnuju dačku, zładzili śviata ŭ honar jaje dnia naradžeńnia i navat pačali praces aficyjnaha ŭsynaŭleńnia.

Akramia taho, siamja apłačvała darahoje lačeńnie preparatam Mounjaro, bo Amanda śćviardžała, što maje surjoznyja prablemy sa zdaroŭjem z-za pieražytaha ŭ dziacinstvie hvałtu. Pry hetym jana ŭsialak paźbiahała razmoŭ pra jurydyčnaje afarmleńnie dakumientaŭ i nikoli nie mieła pry sabie paśviedčańnia asoby.

Kaniec šmathadovamu padmanu pakłała pilnaść adnaho sa svajakoŭ siamji z Žainvili. Zapadozryŭšy niaładnaje, jon pačaŭ šukać infarmacyju ŭ internecie i natknuŭsia na paviedamleńni pra padobnyja vypadki ŭ inšych haradach. Palicyja, vyklikanaja siamjoj, chutka vyznačyła sapraŭdnuju asobu i ŭzrost machlarki.

Pavodle śledčych, padobnyja scenaryi Amanda vykarystoŭvała jak minimum u siami vypadkach u roznych rehijonach Brazilii. 

Paviedamlajecca, što ŭ 2024 hodzie jana była zatrymana palicyjaj ŭ Hajasie. Tady vykryć padman dapamahła adna z vałanciorak, jakaja apiekavałasia machlarkaj. Jana zaŭvažyła mietaličnyja ihołki, jakija pačali vychodzić ź cieła Amandy. Heta vyhladieła jak nastupstvy katavańniaŭ i dobra ŭpisvałasia ŭ jaje historyju pra baćku, jaki nibyta zajmaŭsia viadźmarstvam i rytuałami.

Žančyna arhanizavała miedycynskaje abśledavańnie. Doktar, jaki pravodziŭ ahlad, pryznaŭsia, što za mnohija hady praktyki nikoli nie sustrakaŭsia z padobnym: renthienaŭskija zdymki vyjavili ŭ ciele žančyny bolš za 200 ihołak.

Pavialičyć

Mienavita tady miedycynski piersanał zmoh vyśvietlić realny ŭzrost žančyny, a palicyja paźniej apublikavała hetyja zdymki jak dokaz afiory.

Choć ułady Hajasa zatrymali Aliviejru za padrobku asoby, jana tak i nie pačała adbyvać pryznačanaje pakarańnie. Sama machlarka paźniej zajaŭlała, što paźbiehnuć turmy joj dapamoh znajomy kapitan vajennaj palicyi, ź jakim jana źviazałasia paśla vykryćcia. Hetaja biespakaranaść dazvoliła joj bieśpieraškodna źjechać u inšy štat i pačać nastupnuju, samuju praciahłuju afieru ŭ Žainvili.

Paśla aryštu Amanda de Aliviejra pryznałasia ŭ svaich dziejańniach. Na hety momant jana znachodzicca ŭ žanočaj turmie ŭ čakańni vynikaŭ sudova-psichijatryčnaj ekśpiertyzy. Daśledavańnie pavinna vyznačyć, ci źjaŭlajucca jaje ŭčynki vynikam śviadomaha machlarstva, ci jany abumoŭleny hłybokimi psichičnymi prablemami.

• 0
• 0
• 2
• 3
• 4
• 0
• 1
• 0