50 čałaviek jechali na hruzaviku praz pustyniu Sachara. Hruzavik złamaŭsia, i amal usie pamierli ad smahi
Kiroŭca i pasažyry sprabavali adramantavać hruzavik, ale nie zmahli.
U pustyni Sachara, na poŭnačy Nihiera, ad smahi zahinuli jak minimum 49 čałaviek. Hruzavik, na jakim jany jechali, złamaŭsia za dziasiatki kiłamietraŭ ad najbližejšaha nasielenaha punkta i krynicy vady, piša Bi-bi-si.
Jak zajavili napiaredadni ŭłady rehijona, hetyja ludzi viartalisia z Mali paśla musulmanskaha śviata Id al-Adcha (u ciurkamoŭnych krainach jano bolš viadomaje jak Kurban-bajram).
Jany vyjechali sa stajanki Telchandek, ale, jak havorycca ŭ zajavie hubiernatara nihierskaj pravincyi Ahadez, źbilisia z darohi i zatrymalisia za 80 km ad aazisa Asamaka na miažy Nihiera i Ałžyra — u miascovaści, dzie na dziasiatki kiłamietraŭ vakoł niama nivodnaha nasielenaha punkta.
Kiroŭca i pasažyry sprabavali adramantavać hruzavik, ale nie zmahli.
Miascovyja ŭłady daviedalisia pra zdareńnie ad dvuch vyžyłych, jakija zmahli dajści da Asamaki.
«Zastaŭšysia biez vady i nie zdoleŭšy adramantavać mašynu, bolšaść nie zmahła vyžyć. Pad hruzavikom i vakoł jaho byli znojdzieny dziasiatki niežyvych ciełaŭ», — havorycca ŭ zajavie hubiernatara.
Ratavalniki pachavali zahinułych u brackaj mahile. Usie achviary byli hramadzianami Nihiera.
Viartajučysia ź miesca hibieli amal 50 čałaviek, ratavalniki natrapili jašče na adzin złamany hruzavik. U im z Mali jechali bolš za 60 čałaviek, i jany prasiedzieli ŭ pustyni ŭžo try dni, ale jašče byli žyvyja.
Jak paviedamiŭ hubiernatar u dadatkovaj zajavie, ratavalniki dali im vady i dapamahli adramantavać hruzavik.
Nihier miažuje na poŭnačy z Ałžyram i Livijaj, a praź jaho pustynnuju paŭnočnuju častku prachodziać asnoŭnyja maršruty mihrantaŭ z Zachodniaj Afryki, jakija nakiroŭvajucca da Mižziemnaha mora i dalej u Jeŭropu.
Hubiernatar Ahadeza ŭ svajoj zajavie padkreśliŭ, što hetaja trahiedyja jašče raz nahadvaje, nakolki niebiaśpiečnymi mohuć być sproby biez naležnaj arhanizacyi pierasiekčy pustyniu, jakaja raskinułasia na tysiačy kiłamietraŭ.
Kamientary