FIFA abaviazała Iran i Jehipiet pravieści ŁHBT-matč. Što tam budzie?

Jašče da losavańnia arhanizacyjny kamitet Sietła abviaściŭ, što zapłanavany na 26 červienia (u Jeŭropie budzie ranica 27 červienia) matč turniru budzie pryśviečany ŁHBT. U toj momant udzielniki hulni byli nieviadomyja.

Paśla losavańnia stała zrazumieła: u Sietle ŭ hety dzień u trecim tury hrupy G sustrenucca Iran i Jehipiet. U Sietle zapłanavana jašče niekalki hulniaŭ ČS: Bielhija — Jehipiet (15 červienia), ZŠA — Aŭstralija (19 červienia), Bośnija i Hiercahavina — Katar (24 červienia) i dva matčy płej-of (1 i 6 lipienia).

Jehipiet i Iran zaklikali FIFA ŭmiašacca ŭ praviadzieńnie mierapryjemstvaŭ u ramkach prajdu ŁHBTK+. U liście Futbolnaj asacyjacyi Jehipta havorycca, što takija mierapryjemstvy supiarečać kulturnym i relihijnym kaštoŭnaściam krain-udzielnic.

Kiraŭnik Iranskaj futbolnaj fiederacyi Miechdzi Tadž zajaviŭ, što Tehieran i Kair vykazali «piarečańni pa hetym pytańni». Na jaho dumku, heta «nieracyjanalny krok, jaki padtrymlivaje peŭnuju hrupu».

Pavodle danych The Guardian, FIFA adchiliła prośbu abiedźviuch fiederacyj, paličyŭšy, što farmat matču budzie prytrymlivacca idei inkluziŭnaści i pavahi i nie moža być źmienieny pad patrabavańni asobnych krain.

Tamu pierad pačatkam hulni budzie tematyčnaja simvolika, fanatam dazvolać prynosić viasiołkavyja ściahi, a ŭ kapitanaŭ buduć abaviazkovyja paviazki.

U Jehipcie homaseksualnyja adnosiny zabaronienyja. U Iranie maksimalnaje pakarańnie za homaseksualnyja adnosiny — śmiarotnaje pakarańnie.

Na stadyjonie buduć ściahi ŁHBT, choć Iran patrabavaŭ abyjścisia bieź ich.

Eryk Uoł, člen kansultatyŭnaha kamiteta «Sietł Prajd Matč», rastłumačyŭ, što hetyja śviatkavańni — častka kultury Sietła, tamu jany pavinny pavažacca haściavymi kamandami.

«Viedaju, što Jehipiet źviartajecca ź pietycyjaj da FIFA, ale heta ŭzdymaje etyčnyja pytańni, — adznačyŭ Uoł. — U Katary jany kazali, što my pavinny pavažać kulturu».

Uoł nahadaŭ, što na čempijanacie śvietu ŭ Katary FIFA pahražała žoŭtymi kartkami hulcam z paviazkaj OneLove u padtrymku pravoŭ ŁHBT — z-za hetaha anhličanie i valijcy nie stali ich nasić. U Katary adnapołyja adnosiny nie lehalizavanyja, šluby zabaronienyja.

Uoł zajaviŭ, što mierapryjemstvy projduć pa ŭsim horadzie, a nie tolki na matčy. «My nie majem dačynieńnia da taho, što adbyvajecca ŭnutry stadyjona, ale najaŭnaść ściahoŭ Pride na stadyjonie — heta typova dla Sietła», — dadaŭ člen kansultatyŭnaha kamiteta. Pavodle jaho słoŭ, mierapryjemstvy pačali rychtavać jašče ŭ kancy 2024 hoda. «Nikoli nie było stratehičnaha namieru naškodzić kamuści abo prymusić FIFA adčuć siabie peŭnym čynam», — zapeŭniŭ Uoł.

U horadzie budzie šmat płakataŭ, taksama arhanizujuć histaryčny maršrut, pryśviečany ŁHBT. U płanach — vystavy mastackich tvoraŭ, śviatkavańnie vakoł stadyjona i pa ŭsim horadzie.

A Iran davaŭ FIFA śpis ź dziesiaci ŭmoŭ dla ŭdziełu ŭ čempijanacie śvietu. Siarod klučavych patrabavańniaŭ — strohaja zabarona na demanstracyju nieaficyjnych abo niepryniatych ściahoŭ, u pryvatnaści ŁHBT, na stadyjonie.

• 0
• 1
• 5
• 8
• 1
• 0
• 1
• 0