«Na prabiehu 40—55 tysiač pačynajuć praharać kłapany». Biełarusy pra dośvied karystańnia Geely
«Naša Niva» pacikaviłasia va ŭłaśnikaŭ biełaruska-kitajskich mašyn, ci zadavoleny jany svaim vybaram.
Jak BiełDžy zavajavaŭ biełaruski rynak
Pačynajučy z 2022 hoda aŭtamabili marki Geely/Belgee stabilna zajmajuć pieršaje miesca pa prodažach novych aŭto ŭ aficyjnych dyleraŭ. U apošnija hady na aŭto ajčynnaj zborki naohuł prypadaje bolš za 50% ad usich pradadzienych lehkavikoŭ.
Rezki rost doli biełaruska-kitajskich aŭto abumoŭleny pierš za ŭsio sankcyjami, praź jakija mocna zvuziŭsia vybar, a taksama lhotnym kredytavańniem. Adnak varta adznačyć, što i biez hetaha ŭžo ŭ 2021 hodzie Geely znachodzilisia na druhim miescy pa papularnaści siarod novych aŭto, što pradavalisia ŭ Biełarusi.
Zamianiŭ Atlas na Atlas Pro
Aŭtamabilist, jaki ŭ 2020‑m nabyŭ sabie novy Geely Atlas, kaža, što zastaŭsia całkam zadavoleny svaim vybaram. Mašyna była ŭ prościeńkaj kamplektacyi: ź miechaničnaj karobkaj, bienzinavym ruchavikom abjomam 2 litry i piarednim pryvadam.
«Za čatyry hady prajechali na joj bolš za 55 tysiač kiłamietraŭ. Za ŭvieś čas asnoŭnaj pałomkaj, kali jaje možna tak nazvać, staŭ machavik», — kaža ŭłaśnik aŭto.
Pa słovach aŭtaamatara, sam jon pry hetym nijakich prablem z machavikom nie zaŭvažyŭ.
«Pryjechaŭ na čarhovaje płanavaje TA, i tam skazali, što jość narakańni na pracu machavika, tamu jaho pa harantyi zamieniać», — zhadvaje mužčyna. Inšym ramontam pa harantyi była zamiena ciahi stabilizatara ŭ tylnaj častcy padvieski.
Mužčyna kaža, što z dadatkovych vydatkaŭ była tolki antykarazijnaja apracoŭka kuzava.
«Adrazu pry kupli rabili ŭ dylera antykar, bo byli aściarohi, što heta ŭsio ž taki kitajec, a jany mohuć chutka pačać iržavieć. Paźniej, hady praz dva, abnaŭlali pakryćcio dziela prafiłaktyki», — zhadvaje aŭtaamatar.
Prajechaŭšy za čatyry hady bolš za 55 tysiač kiłamietraŭ, jon vyrašyŭ abnavić aŭto i paśla prodažu čatyrochhadovaha Atlas nabyŭ sabie abnoŭlenuju viersiju — Atlas Pro.
«Za čatyry hady ekspłuatacyi Geely pakazaŭ siabie hodnym aŭtamabilem za hetyja hrošy, tamu znoŭ nabyŭ sabie Geely. Tym bolš, što ź likvidnaściu papiaredniaj prablem nie ŭźnikła. U prodažy była krychu bolš za miesiac. Možna, viadoma, było zdać u trade-in, ale tady ja vyručyŭ by za mašynu na $ 1500‑2000 mienš, čym kali pradavaŭ sam».
Druhuju mašynu mužčyna braŭ užo ŭ bahaciejšaj kamplektacyi, z paŭtaralitrovym hibrydam i poŭnym pryvadam. Za hod na Atlas Pro prajechaŭ užo bolš za 10 tysiač kiłamietraŭ, i adzinaj nahodaj źviarnucca da dylera pa harantyi stała karozija na nakryŭcy bahažnika.
«U dylera pryznalisia, što ŭ Atlas Pro žuki na bahažniku — heta chvaroba, što ja nie adzin taki. Paśla taho jak na hadavałym aŭto pačali źjaŭlacca žuki, ja pačaŭ bolš pilna pryhladacca, ale prynamsi pakul irža jość tolki na bahažniku», — kaža ŭłaśnik druhoha Geely zapar.
Geely — heta nie pra ekanomiju
Ułaśnik Geely Emgrand 2023 hoda vypusku, jaki za paŭtara hoda prajechaŭ bolš za 20 tysiač kiłamietraŭ, śćviardžaje, što za hety čas jamu nie davodziłasia sutykacca z ramontam aŭto.
«Na servis mašyna zajazdžaje tolki na płanavoje absłuhoŭvańnie, plus rabiŭsia antykar adrazu paśla kupli».
Dla mužčyny heta nie pieršy aŭtamabil, jaki jon kuplaje novym. Da hetaha jon užo mieŭ novy VW Polo Sedan i Polo Sedan 2.
Geely Emgrand bolš kamfortnaja mašyna ŭ paraŭnańni z Polo, z šyrokim vybaram opcyj. Ale ŭ Polo lepšaja dynamika i našmat mienšy raschod paliva», — kaža ŭłaśnik Geely Emgrand z 1,5‑litrovym bienzinavym ruchavikom i AKPP.
Hałoŭnym minusam siedana ad Geely jon nazyvaje vielmi nizki ŭzrovień šumaizalacyi.
«Polo taksama biudžetnik, ale tam z šumaizalacyjaj lepiej. U Geely navat čutno, jak pluchajecca paliva ŭ baku, kali jaho tam šmat. Taksama dobra čuvać, jak bjuć pa kuzavie kamieńčyki z-pad kołaŭ», — kaža aŭtaamatar.
Pa horadzie 1,5‑litrovy Emgrand z varyjataram u surazmoŭcy biare kala 11 litraŭ bienzinu, što, na jaho dumku, zašmat.
U płanie karozii, pa nazirańniach aŭtaamatara, mašyna pakazvaje siabie dobra, nijakich žučkoŭ jon nie bačyŭ.
«Uvohule mašyna niadrennaja, bo pry vialikim žadańni možna zrabić dadatkovuju šumavibraizalacyju sałona. Ale ekanomić na palivie nie ŭdasca. Polo ŭ hetym płanie, kaniečnie, lepšy, tym bolš, što ruchavik u VW vydatna pracuje z hazam, čaho nie skažaš pra Geely.
Kali dumaŭ ustalavać haz, to znajomy, jaki maje niekalki takich mašyn u taksi, adhavaryŭ mianie heta rabić. U jaho ŭžo ŭ šaści mašynach byli prablemy z kłapanami. Na prabiehu ŭ 40—55 tysiač pačynajuć praharać kłapany, tamu jon ciapier pazbaŭlajecca ad hetych mašyn», — kaža surazmoŭca.
Tym nie mienš, aŭtaamatar ličyć, što na hety momant asablivaj alternatyvy Geely Emgrand na biełaruskim rynku novych aŭto niama, asabliva kali nie razhladać kitajskija elektramabili.
«Kab ciapier, jak raniej, pradavalisia novyja Skoda i VW, to Geely ja sabie, chutčej za ŭsio, nie braŭ by, ale kali ich bolš niama ŭ prodažy, to davodzicca kuplać Geely».
Siedan biez dadatkovaha antykaru
Jašče adzin aŭtaamatar, ź jakim udałosia parazmaŭlać, dva hady prajeździŭ na Geely Emgrand.
«Mašynu kuplaŭ na pačatku 2023 hoda, kali jašče byli čerhi. Daviałosia čakać amal dva miesiacy, pierad tym jak atrymali mašynu», — zhadvaje surazmoŭca. Dla jaho heta byŭ pieršy dośvied u kupli aŭto biez prabiehu.
Da kupli Geely jaho padšturchnuli lhotnyja ŭmovy kredytavańnia i niežadańnie rehularna zajmacca ramontam aŭto.
«Za dva hady ekspłuatacyi biez małoha prajechali 30 tysiač kiłamietraŭ. Aproč płanavoha TA źviartalisia pa harantyi praz toje, što nie prajšoŭ hod, jak pačaŭ abłazić łak na kołavych dyskach. Ich zamianili na novyja».
U adroźnieńnie ad papiarednich uładalnikaŭ Geely, hety nie rabiŭ dadatkovy antykar, tamu na kuzavie irža ŭsio ž taki źjaviłasia.
«Možna skazać, dziela ekśpierymientu vyrašyli nie rabić dadatkovuju antykarazijnuju apracoŭku kuzava. Jak vynik, na dniščy aŭtamabila ŭ niekatorych miescach pačała źjaŭlacca karozija. Źjaŭleńnie ačahoŭ karozii na dnie aŭtamabila dyler nazvaŭ nieharantyjnym vypadkam i paraiŭ zrabić antykar», — pryznajecca ŭžo były ŭłaśnik Emgrand.
Letam hety siedan byŭ pradadzieny, i zamiest jaho mužčyna nabyŭ sabie parkietnik Geely Coolray.
Pa słovach surazmoŭcy, kali kuplu pieršaha aŭto biełaruska-kitajskaj vytvorčaści možna było nazvać ekśpierymientam, to kupla nastupnaj mašyny była absalutna ŭzvažanym vybaram.
«Za dva hady karystańnia Emgrand nie rasčaravaŭ, tamu, kali źjaviłasia finansavaja mahčymaść nabyć niešta lepšaje, my ŭziali Coolray. Pa vodhukach ad inšych uładalnikaŭ heta vielmi ŭdałaja madel. Pa adčuvańniach Coolray pa ŭsich paramietrach lepšy za Emgrand, u tym liku ŭ pytańniach šumaizalacyi».
Aŭtamabilist kaža, što ŭ vypadku z Coolray zusim niama adčuvańnia, što ty vałodaješ aŭto biudžetnaha siehmientu. Uličyŭšy toj fakt, što na papiaredniaj Geely biez dadatkovaj antykarazijnaj apracoŭki pačała źjaŭlacca rža, hetaje aŭto adrazu apracavali antykarazijnym składam.
«Choć u internecie pišuć, što karazijnaja stojkaść u Geely Coolray vielmi dobraja, na hety raz vyrašyli nie ekśpierymientavać».
Ciapier čytajuć
Ziankovič nazvaŭ imia pravakatara, ź jakoha pačałasia sprava zmoŭščykaŭ suprać Łukašenki. Jaho karjera ciapier pajšła ŭharu6
Kamientary
A nasamreč ŭ internecie šmat videa na jakich pakupniki hetych Geely pakazvajuć jak hety aŭtamabil nasamreč pracuje i vyhladaje pa 50k prabiehu ;)