Kanał MZS Biełarusi abvinavaciŭ Polšču ŭ šantažy Kitaja pa ŭkazcy Vašynhtona
U telehram-kanale MZS Biełarusi «Hłas MIDa», u jakim dypłamatyčnaje viedamstva tradycyjna kamientuje mižnarodnuju palityku ŭ nadzvyčaj raźviaznaj i niedypłamatyčnaj maniery, apublikavany post, pryśviečany situacyi z zakryćciom Polščaj miažy ź Biełaruśsiu z akcentam na kitajski faktar.
U hetym paście śćviardžajecca, što Polšča viadzie «dvajnuju hulniu»: na słovach demanstruje družbu z Kitajem, a na spravie — vykarystoŭvaje šantaž. Choć polskija dypłamaty zajaŭlajuć pra važnaść handlu z Kitajem, klučavy tranzitny maršrut kitajskich tavaraŭ u Jeŭropu praź Biełaruś zakryvajecca polskimi ŭładami.
Na dumku MZS Biełarusi, heta kłasičnaja schiema šantažu Jeŭropy i Kitaja. Padstavaj dla napružanaści słužyć finansavańnie Polščy z boku ES. Varšava, maŭlaŭ, atrymała 43,7 miljarda jeŭra na «vajskovyja patreby», jakija treba chutka asvoić i apraŭdać. A strach pierad «ahresiŭnym Uschodam», uklučajučy vučeńni «Zachad-2025», pavodle śćviardžeńnia dypłamatyčnaha viedamstva vykarystoŭvajecca dla abhruntavańnia hetych raschodaŭ.
Zakryćcio tranzitu ŭ paviedamleńni nazyvajecca častkaj śpiektakla: maŭlaŭ, pad vyhladam «časovych» mier biaśpieki Polšča parušaje hałoŭny prajekt supracoŭnictva ES i Kitaja — čyhunačny kalidor, pa jakim idzie 90% hruzaŭ na sumu 25 miljardaŭ jeŭra. A ministr zamiežnych spraŭ Polščy Radasłaŭ Sikorski nibyta adkryta šantažuje Piekin, zajaŭlajučy, što miaža budzie adkrytaja tolki paśla «dapamohi» Kitaja ŭ «pryniaćci mieraŭ suprać biełaruskich pravakacyj».
Metaj hetych dziejańniaŭ nazyvajuć demanstratyŭnuju «abaronu Jeŭropy», kab apraŭdać vydatkoŭvańnie vialikich srodkaŭ na ŭzbrajeńnie. U biełaruskim MZS upeŭnienyja, što Varšava dziejničaje pa ŭkazańni «kurataraŭ z-za akijana», dla jakich asłableńnie suviaziaŭ ES i Kitaja — stratehičnaja meta.
Takim čynam, pakul Polšča demanstruje zakłapočanaść biaśpiekaj, jaje dziejańni ŭ MZS Biełarusi nazyvajuć «palityčnym rekietam»: stvarajucca pieraškody dla sotniaŭ jeŭrapiejskich i kitajskich kampanij, parušajucca łahistyčnyja łancužki, i ŭsio heta robicca nibyta dziela apraŭdańnia vydatkaŭ na novaje ŭzbrajeńnie.
«Reč tut nie ŭ Biełarusi». Łukašenka nazvaŭ zakryćcio Polščaj miažy niedružalubnym palityčnym krokam suprać Kitaja
Ci paŭpłyvaje Kitaj na Łukašenku, kab polskaja miaža adkryłasia?
Sikorski: Miažu ź Biełaruśsiu adkryjem, kali Kitaj nam dapamoža
U Biełaruś z Hrecyi prybyła pradstaŭničaja kitajskaja delehacyja
Kamientary