Biełaruskija navukoŭcy z Homiela raspracavali bijadabaŭku dla lačeńnia mužčynskaha biaspłodździa
Navukoŭcy Instytuta radyjobijałohii NAN Biełarusi na praciahu piaci hadoŭ vyvučali niehatyŭnaje ŭździejańnie elektramahnitnych paloŭ sotavaj suviazi na arhanizm čałavieka. Jany znajšli bijadabaŭku na asnovie raślinnaha fłavanoidu dla mužčyn. Pavodle raspracoŭščykaŭ, jana vałodaje vialikim patencyjałam — na asnovie dabaŭki ŭ budučyni možna stvaryć leki dla lačeńnia mužčynskaha biaspłodździa, piša Sputnik.
Na praciahu apošnich piaci hadoŭ supracoŭniki Instytuta radyjobijałohii NAN Biełarusi ŭ Homieli pravodzili raboty pa acency niehatyŭnaha ŭździejańnia elektramahnitnych paloŭ sotavaj suviazi na žyvyja arhanizmy. Analizujučy atrymanyja danyja, navukoŭcy raspracavali liniejku bijałahična aktyŭnych rečyvaŭ šyrokaha śpiektra dziejańnia, jakija vałodajuć radyjopratektarnaj aktyŭnaściu.
Siarod ich — dabaŭka, jakaja pakazała stanoŭčy efiekt u karekcyi repraduktyŭnych parušeńniaŭ u mužčyn.
«U vyniku prymianieńnia dadzienaha srodku va ŭmovach pavyšanaj elektramahnitnaj nahruzki nazirajecca adnaŭleńnie narmalnaha funkcyjanavańnia śpiermatahiennaha epiteliju (słoj kletak u nasiennych kanalcach, dzie ŭtvarajucca śpiermatazoidy), pavialičvajecca pradukcyja i žyćciazdolnaść śpiełych pałavych kletak — śpiermatazoidaŭ», — tłumačyć pryncyp pracy BADa dyrektar Instytuta radyjobijałohii Ihar Češyk.
Biełaruskija navukoŭcy ŭžo raspracavali recepturu srodku, asnoŭnym kampanientam jakoha źjaŭlajecca bajkalin — fłavanoid raślinnaha pachodžańnia. Jon akazvaje antystresavaje i niejrapratektyŭnaje (abaraniaje niervovyja kletki) dziejańnie va ŭmovach pastajannaha elektramahnitnaha ŭździejańnia. U pierśpiektyvie na asnovie bijadabaŭki raspracoŭščyki chočuć stvaryć leki dla lačeńnia mužčynskaha biaspłodździa, paćvierdzili ŭ instytucie.
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary
[Zredahavana]