Prezident Respubliki Małdova napiaredadni parłamienckich vybaraŭ u krainie źviarnułasia da vybarcaŭ z zaklikam padtrymać prajeŭrapiejskija siły, adznačyŭšy, što Rasija ŭkładaje vialikija srodki dla taho, kab pryvieści da ŭłady svaich staŭleńnikaŭ.
Jak zajaviła Majia Sandu, Maskva tracić «sotni miljonaŭ dalaraŭ», sprabujučy kupić hałasy małdaŭskich hramadzian. Jana taksama adznačyła, što ŭ vypadku pieramohi prarasijskich sił Małdova budzie adarvanaj ad Jeŭropy i moža stać płacdarmam dla rasijskich apieracyj u Adeskaj vobłaści Ukrainy, piša Rasijskaja słužba Radyjo Svaboda.
Sandu zaklikała vybarcaŭ Małdovy nie paddavacca Rasii. Lidary tak zvanaha Patryjatyčnaha błoka, jaki ŭłady Małdovy nazyvajuć prarasijskim, abvinavacili Sandu ŭ zapałochvańni žycharoŭ krainy. Jany nazvali ŭrad maryjanietkami amierykanskaha finansista Džordža Sorasa.
Ranicaj u paniadziełak palicyja Małdovy praviała maštabnyja rejdy, zatrymaŭšy bolš za 70 čałaviek pa abvinavačvańni ŭ padrychtoŭcy biesparadkaŭ paśla vybaraŭ pa ŭkazcy Rasii. Lidary apazicyi abvinavacili ŭłady ŭ palityčnych pieraśledach ich prychilnikaŭ.
Vybary ŭ Małdovie projduć 28 vieraśnia. Asnoŭnaja baraćba na vybarach razhortvajecca pamiž kiroŭnaj prajeŭrapiejskaj Partyjaj dziejańnia i salidarnaści i Patryjatyčnym błokam, sfarmavanym sacyjalistami, kamunistami i šeraham inšych palityčnych sił.
U parłamient taksama moža prajści partyja «Alternatyva», ad pazicyi jakoj, mahčyma, budzie zaležać, chto sfarmuje budučy ŭrad. Niekalki partyj, jakija, pavodle mierkavańnia małdaŭskich uładaŭ, byli źviazany z asudžanym u Małdovie zavočna biźniesmienam Iłanam Šoram, jaki žyvie ŭ Rasii, nie byli dapuščanyja da vybaraŭ.
U Jeŭrasajuzie taksama papiaredžvali pra pahrozy rasijskaha ŭmiašańnia ŭ vybary ŭ Małdovie.
U Maskvie hetyja abvinavačvańni admaŭlajuć i, naadvarot, abvinavačvajuć va ŭmiašańni ES. Słužba źniešniaj raźviedki Rasii ŭ aŭtorak vystupiła z zajavaj, što krainy Zachadu chočuć «akupavać» Małdovu, a pradstaŭnik MZS Maryja Zacharava nazvała «paranojaj» słovy Sandu pra mahčymaść vykarystańnia niepadkantrolnaha ŭładam Małdovy Prydniastroŭja dla rasijskaha nastupu na Adeskuju vobłaść. U toj ža čas u Rasii hučać abvinavačvańni na adras uładaŭ Małdovy i Ukrainy ŭ padrychtoŭcy ŭzbrojenaj akcyi suprać sieparatystaŭ u Prydniastroŭi.
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny41
Kamientary