Tramp dazvoliŭ NATA źbivać rasijskija samaloty i pachvaliŭ Ukrainu za vydatnuju pracu
Prezident ZŠA Donald Tramp na palach Hienasamblei AAN pravioŭ karotki sumiesny bryfinh z prezidentam Ukrainy Uładzimiram Zialenskim. Jon doŭžyŭsia ŭsiaho 7 chvilin, ale Tramp paśpieŭ zrabić niekalki zajaŭ.
Adkazvajučy na adpaviednaje pytańnie presy, Donald Tramp zajaviŭ, što krainy — udzielnicy NATA majuć poŭnaje prava źbivać rasijskija vajskovyja samaloty, jakija ŭvarvalisia ŭ ich pavietranuju prastoru.
Na jaho dumku, vajna pamiž Rasijaj i Ukrainaj skončycca niachutka. Adnak jon ubačyŭ prahres dla mirnaha ŭrehulavańnia ŭ pasłableńni rasijskaj ekanomiki:
«Najbolšy prahres u namahańniach spynić vajnu zaklučajecca ŭ tym, što ekanomika Rasii znachodzicca ŭ vielmi drennym stanie. Ludzi dumali, što Rasija spravicca za try dni — heta ž vielmi vialikaja kraina, — ale Ukraina vielmi dobra ŭmieje ich spyniać, heta vielmi śmiełyja ludzi, sałdaty robiać svaju pracu vydatna. Rasija nie asabliva prasłaviłasia tym, što praciahvaje vajavać užo 3,5 hoda».
Ni Donald Tramp, ni Uładzimir Zialenski nijak nie zhadvali temu mahčymaj sustrečy z Pucinym. Na pytańnie ž, ci daviaraje jon pa-raniejšamu rasijskamu prezidentu, Tramp skazaŭ, što adkaža na jaho «praź miesiac».
Nie hatovy jon prosta ciapier havaryć i pra harantyi Ukrainie:
«My budziem havaryć pra heta. Spadziajusia, u nas budzie mahčymaść pahavaryć pra heta krychu paźniej. Ciapier adkazvać na hetaje pytańnie rana».
Ciapier čytajuć
«U Viciebsku zachodziŭ u tralejbus i kazaŭ «Słava Ukrainie!». Ukrainca ŭ 67 hadoŭ pasadzili za kamienty, napisanyja paśla hibieli chrosnaj dački pad abstrełam u Kijevie4
Kamientary