Biełarus raskazaŭ, jak jaho sprabavali ŭciahnuć u cieniavy biznes pa pastaŭcy luksavych aŭto z Polščy ŭ Rasiju

Jahor (imia źmieniena) žyvie ŭ Polščy bolš za try hady. Da emihracyi jon 13 hadoŭ zajmaŭsia aŭtabiznesam — pryhaniaŭ ź Jeŭropy mašyny i pradavaŭ ich u Biełarusi.

Uzimku 2024 hoda byłyja «kalehi», jakija, jak i jon, šmat hadoŭ zajmalisia prodažam aŭtamabilaŭ u Biełarusi, prapanavali jamu paŭdzielničać u spravie. Hetych «kaleh» mužčyna apisvaje tak: u chłopcaŭ jeŭrapiejskija dazvoły na žycharstva, u 2011 hodzie jany ŭdała ŭkłali srodki ad prodažu aŭto ŭ kryptavalutu, vałodajuć nieruchomaściu ŭ Biełarusi i jeŭrapiejskich krainach, praciahvajuć žyć i vieści biznes u Biełarusi.

Niejkim čynam jany daviedalisia, što Jahor astalavaŭsia ŭ Polščy, i prapanavali jamu «padpracoŭku» — šukać polskija firmy i aŭtasałony, hatovyja pradavać mašyny na ekspart u Hruziju, Armieniju i Kazachstan. Kampaniju cikavili pieravažna novyja BMW u topavaj kamplektacyi — madeli, košt jakich u Rasiei byŭ na 50‑60 tysiač jeŭra vyšejšy, čym u Polščy.

U Rasiju zabaroniena ŭvozić aŭtamabili koštam zvyš 50 tysiač jeŭra, a taksama z abjomam ruchavika bolš za 1,9 litra, elektramabili i hibrydy. U 2024 hodzie anałahičnyja sankcyi byli ŭviedzienyja i ŭ dačynieńni da Biełarusi, hałoŭnym čynam dla praduchileńnia reekspartu. Tady ž u śpis dadali aŭtamabili z kliransam 165 mm i vyšej — kab dadatkova adsiekčy krasoviery i pazadarožniki, jakija časta išli tranzitam u Rasiju.

Farmalna ŭ pastaŭkach takich mašyn u Hruziju, Armieniju i Kazachstan nie było ničoha niezakonnaha. Ale mnohija pastaŭščyki admaŭlalisia ad takich ździełak, razumiejučy, što, chutčej za ŭsio, realnych pakupnikoŭ tam niama, a mašyny ŭrešcie apynucca ŭ Rasii.

Jak zamiatali ślady

Jahor raskazvaje, što kab zamaskavać šlach aŭto, jaho pradavali niekalki razoŭ — inakš «mahło prylacieć ad padatkovaj». Časam aŭtamabil mianiaŭ dvuch-troch uładalnikaŭ, pierš čym urešcie jaho ekspartavali, a vypłačany PDV viartaŭsia pradaŭcu.

Mašyna vyjazdžała ŭ Rumyniju abo Bałharyju, a adtul nakiroŭvałasia ŭ Hruziju paromam albo aŭtavozam — praz Turcyju.

Rachunak-daviedka vypisvałasia na hramadzianina treciaj krainy. Pošuk fizičnych asob taksama cikaviŭ ludziej, jakija zajmalisia hetym biznesam.

Z Hruzii, pa źviestkach Jahora, mašyna vyjazdžała dla nastupnaha razmytnivańnia na terytoryju Biełarusi — heta było jašče da taho, jak aŭtamabilnyja sankcyi suprać Rasii i Biełarusi harmanizavali. Mytny košt časta zanižali, naprykład, zamiest 100 tysiač jeŭra paznačali 80 tysiač jeŭra.

Apłata — 2,5‑3 tysiač jeŭra za adzin aŭtamabil

Znajomyja nie ŭvodzili Jahora ŭ zman: adrazu skazali, što havorka idzie pra prodaž luksavych aŭto ŭ Rasiju i Biełaruś. I što na hetym jany zarablali 5% ad koštu. Mužčynu prapanavali 2, 5‑3 tysiač jeŭra za adzin aŭtamabil.

Jahor admoviŭsia ad takoj prapanovy, bo nie znajšoŭ patrebnych kantaktaŭ. Jon abtelefanavaŭ i abjechaŭ niekalki aŭtasałonaŭ, dzie pradavalisia patrebnyja aŭtamabili. Aficyjnyja dystrybjutary adrazu admovilisia ad takoj prapanovy. A nieaficyjnyja — nie adrazu, ale, pieratelefanavaŭšy jamu praź niejki čas, usio ž paviedamili, što nie buduć ź im supracoŭničać.

Jahor nie vyklučaje, što niekatoryja ź ich užo mieli pastajannych klijentaŭ dla takich ździełak. Jon zrabiŭ takuju vysnovu, tamu što hetyja sałony jamu rekamiendavali tyja samyja znajomyja, jakija prapanoŭvali «padpracoŭku».

«Ščyra kažučy, doma mnie b heta nie daravali. Žonka paśla 2020 hoda ŭciahnutaja ŭ inicyjatyvy padtrymki palitviaźniaŭ, my razam chodzim na akcyi salidarnaści. Dla jaje luboje supracoŭnictva, jakoje choć niejak źviazana z Rasijaj ci Biełaruśsiu, — čyrvonaja anuča. Jana nie stała b navat słuchać, kolki mahli zapłacić: sam fakt prapanovy moh by pastavić kropku ŭ našych adnosinach. Tamu, napeŭna, ja i rady, što nie atrymałasia ničoha znajści», — dadaje Jahor.

• 3
• 0
• 1
• 3
• 1
• 0
• 0
• 0