«Jeŭrapiejcy, vučyciesia va Ukrainy»

2025 hod pačaŭsia z taho, jak Džej Dzi Vens zrabiŭ svaju znakamituju pramovu pra «aktyvizacyju» ŭ Miunchienie, i heta vyklikała zakłapočanaść. Ciapier užo vosień, i samy čas acanić dasiahnieńni jeŭrapiejskaj dypłamatyi za hety hod.

Na žal, Jeŭropa nie prajaviła aktyŭnaści i nie pryniała rašučych mier. Zamiest hetaha jana zasnavała svaju letniuju stratehiju biaśpieki na troch aporach:

1. Palityka supakajeńnia ŭ adnosinach da prezidenta Trampa. Hety słup možna apisać jak «płacić i spadziavacca» — płacić z dapamohaj taryfaŭ i abiacańniaŭ zakupak uzbrajeńnia, a taksama vykazvać pavahu Trampu praź vizity ŭ Vašynhton, videasuviaź i publičnyja zajavy ab addanaści.

2. Nadzieja na toje, što Pucin budzie zadavoleny tym, što ŭ jaho jość zaraz.

Heta znajšło adlustravańnie ŭ zajavach jeŭrapiejskich lidaraŭ, jakija namiakali, što surovaja realnaść moža prymusić Ukrainu sastupić terytoryi Pucinu, spasyłajučysia na histaryčny prykład Bałtyi ci Finlandyi. Ništo nie pakazvaje na toje, što Pucina heta zadavalniaje, ale što ž, nadzieja pamiraje apošniaj.

3. Malicca, kab ukraincy nie stamlalisia.

Najvažniejšym kampanientam jeŭrapiejskaha płana biaździejnaści źjaŭlajecca toje, što ŭkraincy pradoŭžać zmahacca i za Ukrainu, i za Jeŭropu, pakul Jeŭropa dapivaje svoj apierol-špryc i raźbirajecca ź situacyjaj.

I što zaraz?

Kali ZŠA abjavili ab admienie Bałtyjskaj inicyjatyvy biaśpieki, mnohija byli šakavanyja. Mianie jašče bolš uraziła toje, kolki času my patracili na malitvy ab čaroŭnych pieramienach, zamiest taho kab prysłuchacca da papiaredžańniaŭ i padrychtavacca da niepaźbiežnaha raźvićcia padziej.

Ciapier nam treba rychtavacca da skaračeńnia kolkaści amierykanskich vojskaŭ u Jeŭropie, vierahodna, vielmi značnaha. I tak, mahčymy vyvad vojskaŭ z krain Bałtyi.

Da čaho jašče nam treba być hatovymi? Da taho, pra što ŭžo było skazana: Ukraina chutčej za ŭsio zastaniecca biez amierykanskaj dapamohi. Rasija bolš nie budzie znachodzicca pad sankcyjami. Jeŭropie daviadziecca supraćstajać rasijskaj pahrozie samastojna.

A pryfrantavym krainam daviadziecca raspracavać płan B, kab supraćstajać i pieramahčy ŭ postamierykanskaj Jeŭropie.

I kali ŭźnikaje pytańnie, jak heta pavinna vyhladać na praktycy — pahladzicie na Ukrainu. Zialenski moža kazać šmat słoŭ padziaki, nasić harnitur i ŭračysta ŭschvalać amierykanskuju administracyju, ale… u toj ža čas Ukraina pačała najbujnyja pavietranyja naloty na rasijskija NPZ, skaraciŭšy pierapracoŭku nafty prykładna na 20%.

Jeŭropa prosta ŭzmacniaje svaju rytoryku, pakolki dva z troch słupoŭ jaje stratehii 2025 hoda razburajucca. Tym časam Ukraina ŭkaraniaje novuju zbroju, kaža cicha i adnačasova raspracoŭvaje ceły šerah novych «bizunoŭ».

Viadoma, ukraincy addali b pieravahu zmahacca razam z amierykancami i jeŭrapiejcami, ale kali tyja nie hatovyja, ukraincy pakazvajuć, čaho mohuć damahčysia samastojna.

Čas być śmiełymi, jak Ukraina

Jeŭropie, jakaja straciła vieru ŭ zdolnaść vieści choć niejkuju vajnu, varta natchnicca Ukrainaj i rušyć uśled jaje bliskučamu prykładu.

Kali kraina z nasielnictvam mienš za 40 miljonaŭ zdolnaja naroščvać tempy navat paśla troch hadoŭ vajny, to, napeŭna, prahresu možna dasiahnuć, abjadnaŭšy bahaćci 450 miljonaŭ žycharoŭ ES?

Ukraina maje płan, i jana budzie zmahacca. Jeŭrapiejskija płany A, B i V nie spynili vajny. Pucinu prosta niama dziela čaho spyniacca, i, imavierna, ciapier niama mahčymaści adkrucić nazad. Jak kažuć u nas u Litvie, usio heta i kaniu pavinna być jasna.

Tamu Jeŭropie zaraz treba raspracavać płan D, nakiravany ni mnoha ni mała na vyžyvańnie Ukrainy i Jeŭropy. I, pierafrazujučy Čerčyla, kali spatrebicca, nam daviadziecca vyžyvać u adzinočku, navat kali my nie atrymajem padtrymki ad zaakijanskich sabrataŭ.

Čas pryznać, što naš letni dypłamatyčny nastup spracavaŭ nie tak dobra. Heta značyć, što pryjšoŭ čas zirnuć u tvar surovaj realnaści ŭsio jašče nadychodziačaj vajny, jakoj nam nie ŭdałosia paźbiehnuć adnymi pramovami.

Jak by my ni malilisia ab cudzie, kab nie patanuć, my pavinny narešcie pačać viesłavać da bieraha.

• 35
• 2
• 1
• 3
• 0
• 0
• 0
• 0