Volha Takarčuk padzialiłasia dramatyčnymi padrabiaznaściami svaich uciokaŭ ź Biełarusi

Da padziej 2020 hoda Volha Takarčuk pracavała dyzajnierkaj. U žniŭni taho hoda jana pačała vychodzić na pratesty, aktyŭna viała svoj błoh, dzie vykazvałasia pra situacyju ŭ krainie. Na jaje staronku byli padpisanyja kala 37 tysiač čałaviek.

Pa Volhu pryjšli 19 maja 2021 hoda. Jaje abvinavacili va ŭdziele ŭ pratestach, abrazie sudździ i paklopie. Na volu Volha vyjšła ŭ červieni 2022 hoda, całkam adbyŭšy pryznačany termin — paŭtara hoda kałonii. Paśla vyzvaleńnia jana vyrašyła zastacca ŭ Biełarusi.

23 studzienia 2024 hoda da jaje pryjšli supracoŭniki KDB i zabrali na dopyt pa spravie INeedHelp. U toj ža dzień aryštavali i maci błohierki. Zrazumieŭšy, što jaje taksama mohuć aryštavać, 27 studzienia 2024 hoda razam z dvuma dziećmi i baćkam Takarčuk pakinuła Biełaruś.

Padrabiaznaściami svaich uciokaŭ Volha padzialiłasia ŭ prahramie «Mnie tolki spytać» na Biełsacie.

Pa słovach Volhi, napiaredadni ŭciokaŭ jana ź dziećmi była ŭ znajomaha, bo ličyła, što zastavacca doma niebiaśpiečna. Z domu joj pieradali tolki samaje nieabchodnaje, jakoje źmiaściłasia ŭ niekalkich zaplečnikach.

Da ich dałučyŭsia i tata Volhi. Siamja razumieła, što paśla zatrymańnia žonki i jamu moža pahražać pieraśled, tamu jon taksama pakinuŭ svaju kvateru, uziaŭšy z saboj tolki adnu sumku.

Uvieś hety čas Volha padtrymlivała suviaź z pradstaŭnikami «Bajsoła», jakija arhanizoŭvali evakuacyju. Jak zhadvaje žančyna, instrukcyi joj davali pakrokava i tolki ŭ apošni momant. Nijakich padrabiaznaściaŭ zahadzia nie paviedamlali dziela biaśpieki. Kali jana vykonvała adno zadańnie, atrymlivała nastupnaje.

«My zamovili bilety da Maskvy, sieli ŭ maršrutku i pajechali ŭ Maskvu. Spynilisia ŭ niejkaj kvatery, potym pierajechali ŭ niejkuju inšuju kvateru. My nie spali tady, ja pamiataju, noč. Tata byŭ naohuł u šokavym stanie, i jon byŭ jak dzicia. Naohuł ničoha nie razumieŭ, što adbyvajecca. Jamu niešta kažaš, a jon: «A…», i ŭsio.

Jon u svaich dumkach, a ja razumieju, što mnie treba nakarmić dziaciej, nakarmić tatu, i ja ŭvieś čas na suviazi, u mianie kuča hetych instrukcyj. I ty razumieješ, što za ciabie nichto nie zrobić, tabie nichto nie dapamoža, tata dla ciabie nie pamočnik, tata — treciaje dzicia», — raskazvaje Volha.

Pieršapačatkovy płan praduhledžvaŭ, što baćka razam ź dziećmi vylecić u Hruziju, a sama Volha pakinie Rasiju inšym maršrutam.

Adnak uźnikła prablema: jana znachodziłasia ŭ śpisie nievyjaznych hramadzian Biełarusi.

Pahrozy ŭ Šaramiećcieva

U aeraporcie Šaramiećcieva Volhu zatrymali. Pavodle jaje słoŭ, pieršapačatkova supracoŭniki FSB adviali jaje ŭ słužbovy kabiniet i na praciahu ŭsioj nočy dapytvali. Što mienavita ich cikaviła, Takarčuk u intervju padrabiazna nie raskazvała, adnak adznačała, što paśla šmathadzinnaha dopytu na jaje skłali administracyjny pratakoł za sprobu niezakonnaha pierasiačeńnia miažy. Štraf za jaje adrazu apłaciŭ «Bajsoł», ale na hetym prablemy nie skončylisia.

Paśla hetaha Volha jašče doŭhi čas zastavałasia faktyčna zatrymanaj u aeraporcie, nie majučy mahčymaści vyjści zony čakańnia pierad pasadkaj. U niejki momant joj paviedamili, što suprać jaje mohuć raspačać kryminalnuju spravu.

Pa słovach žančyny, baćka ź dziećmi viarnuŭsia na kvateru ŭ Maskvie i čakaŭ dalejšych ukazańniaŭ.

Praź niekatory čas Volzie niečakana paviedamili, što kryminalnaj spravy nie budzie i paabiacali viarnuć pašpart.

«Hadzina prachodzić, dźvie, try, piać hadzin — pašpart nie addajuć. I ja pačynaju kryčać. Kažu: «Vy mianie niezakonna ŭtrymlivajecie! Na mnie niama ničoha. Vy kryminalnuju [spravu] nie zaviali. Administracyjnuju ja apłaciła. Z hetaha momantu vy na jakoj padstavie ŭtrymlivajecie ŭ siabie moj pašpart? Nu na jakoj? Vy prosta ŭ mianie skrali pašpart, a mianie tut uziali ŭ Šaramiećcievie ŭ zakładniki. Pry hetym vy ŭščamlajecie maje pravy. Ja nie jeła sutki, nie spała sutki. Adzinaje, što ja mahu, heta chadzić u tualet i kuryć u hetym tualecie». (…) Sa mnoj na suviazi jašče niejki advakat, ja ź im jašče kansultujusia», — emacyjna raskazvaje Volha.

U peŭny momant situacyja znoŭ abvastryłasia:

«Prychodzić niejkaja ciotka i pačynaje pry mnie novuju niejkuju kryminalnuju spravu zavodzić. Ja navat nie pamiataju, z-za čaho. Ja prosta na jaje hladžu, kažu: «Vy ździekujeciesia? Vy prosta prydumlajecie zaraz hetuju kryminalnuju spravu. Vy zaraz parušajecie zakon. (…) Dzie naohuł moj pašpart, dzie što?» Jana da mianie pavaročvajecca i kaža: «Ty kudy chočaš lacieć?» Ja kažu: «U takuju krainu». Jana takaja: «Okiej, kuplaj bilety i palaciš».

Pakul čakali afarmleńnie dakumientaŭ, Volhu pad kanvojem adviali pajeści. Mužčyna, jaki supravadžaŭ jaje, zacikaviŭsia biełaruskaj situacyjaj. Pa słovach Volhi, jana raskazała pra svoj aryšt i zatrymańnie maci. Surazmoŭca, pavodle jaje słoŭ, pastaviŭsia da jaje z razumieńniem.

Viartańnie ŭ Minsk

Adnak nieŭzabavie ŭsio znoŭ źmianiłasia. Padčas razmovy kanvair atrymaŭ telefonny zvanok i paśla paviedamiŭ, što zamiest inšaj krainy Volha palacić u Minsk.

«Cełaha złosnaha złačyncu Olu Takarčuk, jakaja chacieła naduryć cełaje Šaramiećcieva, sadziać u mašynu, viazuć u samalot. Tam jon sa mnoj, hety čuvak, padymajecca, kab, nie daj boh, ja z trapa nie ŭciakła.

A ściuardesy vyrašyli, što ja niejki vielmi važny hość. Nu kali mianie na asobnaj mašynie [pryvieźli]. Tolki ŭžo ŭ samalocie, kali było skazana nie vypuskać mianie, mnie addali pašpart.

Ściuardesy pierada mnoj ścielucca: «Vam čaj, kava, buterbrody. U nas usio biaspłatna, što vy chočacie?» A ja ničoha nie chaču. Ja hladžu ŭ akno, pierad vačyma dzieci. I ja tak razrydałasia», — raskazvaje Volha.

Pa słovach Takarčuk, supracoŭnik aeraporta, jaki supravadžaŭ jaje pierad vyletam, zapeŭniŭ, što nijakaj infarmacyi ŭ Minsk nie pieradavali, bo zdareńnie ličycca ŭnutranaj spravaj Šaramiećcieva. Ale całkam pavieryć hetym słovam jana nie mahła.

«Ja na suviazi z rodnymi, jakija mianie tam sustrakajuć ź siabram. I jany pavinny byli mnie napisać, kali tam jość siłaviki — adna esemeska, kali niama — inšaja. (…) Tady nam zdałosia, što heta niečym mnie dapamoža. (…)

Ja atrymlivaju esemesku, kali my ŭžo pryziamlilisia, što nikoha niama, što ŭsio pusta. Ja supakojvajusia, prosta vybiahaju. Heta, viedaješ, jak byli ŭ detektyŭnych filmach momanty, kali prosta padjazdžaje znajomaja, adkryvaje mašynu, ja na latu prosta ŭ jaje».

Paśla prymusovaha viartańnia, pa słovach Takarčuk, jana jašče sutki prabyła ŭ Minsku. Baćka ź dziećmi ŭ hety čas užo byli ŭ Hruzii. Volha znajšła siłu zajści ŭ svaju kvateru, spakojna sabrać rečy i raźvitacca z katom, jaki pražyŭ ź joju 20 hadoŭ. Žyvioła pamierła ŭžo paśla jaje adjezdu — letam 2025 hoda.

Nastupnaj nočču Takarčuk znoŭ nakiravałasia ŭ Maskvu. Vylet byŭ praź inšy aeraport. Jakim čynam jana dabrałasia da Litvy, błohierka nie raskazvaje.

• 0
• 2
• 0
• 1
• 0
• 0
• 0
• 0