Stała viadoma, pa jakim miechaniźmie śpisvalisia hrošy z bankaŭskich kartak biełarusaŭ padčas maštabnaha zboju
Dva dni tamu zdaryŭsia redki techničny zboj — u ludziej śpisali hrošy z bankaŭskich kart, napałochaŭšy masu klijentaŭ troch dziaržaŭnych bankaŭskich hihantaŭ: Biełarusbanka, Bielinviestbanka i Biełahraprambanka. Ale što ŭ realnaści adbyłosia? Jak heta vyhladała technična? Čamu nie zakranuła pryvatnyja banki? I čamu ŭ adnych śpisałasia pa 80 kapiejek, a ŭ inšych — pa paru tysiač rubloŭ?
Prablema była na baku Bankaŭskaha pracesinhavaha centra, čyimi pasłuhami karystajucca dziaržaŭnyja banki. Nacbank patłumačyŭ, što pryčyna była ŭ niekarektnym abnaŭleńni, ale bolš detalaŭ nie pryvioŭ.
Dadatkovaj infarmacyjaj z «Našaj Nivaj» padzialilisia infarmavanyja surazmoŭcy z bankaŭskaj śfiery.
Pa ichnich słovach, situacyja vyhladaje tak.
Pracesinhavy centr u realnym časie apracoŭvaje tranzakcyi i źbiraje infarmacyju ab apłatach, jakija robiacca kartkami.
Pracesinhavy centr nie maje dostupu da rachunkaŭ, jaho zadača — dakładna padličyć, chto kamu kolki zapłaciŭ ci pieravioŭ, a ŭ kancy bankaŭskaha apieracyjnaha dnia pieradać hetuju infarmacyju banku, kab toj pravioŭ adpaviednyja śpisańni z rachunkaŭ srodkaŭ, jakija da taho byli tolki zareziervavanyja, a nie śpisanyja. Taksama na padstavie atrymanaj infarmacyi pravodziacca raźliki na mižbankaŭskim rynku.
Usia hetaja infarmacyja pastupaje ŭ bank vyhladzie hetak zvanaha klirynhavaha fajła. I realna srodki śpisvajucca na nastupnuju ranicu paśla taho, jak byŭ zrobleny płaciož.
Što ž zdaryłasia 9 lipienia?
«U vyniku abnaŭleńnia sistemy klirynhu ŭ faktyčna adasłanym u banki fajle nasłailisia traty klijentaŭ nie tolki za apošni apieracyjny dzień, ale i za papiarednija dni. Takim čynam, pa druhim i trecim kole byli śpisanyja da taho ŭžo śpisanyja srodki», — paviedamiŭ surazmoŭca «Našaj Nivy».
Heta tłumačyć i toje, čamu nie kožny karystalnik hetych bankaŭ sutyknuŭsia z prablemaj i čamu ŭ kožnaha byli roznyja, zdavałasia b, advolnyja śpisańni. Prosta kali ŭ čałavieka ŭvohule nie było apieracyj pa karcie za apošnija dni, to ŭ jaho i nie było źmieny bałansa. A čym bolšyja jany byli ŭ papiarednija dni, tym bolš śpisałasia 9 lipienia.
Klijenty pryvatnych bankaŭ nie paciarpieli, tamu što pryvatnyja banki majuć svoj pracesinh.
Pamyłku ŭ fajle surazmoŭcy tłumačać čałaviečym faktaram.
«Pracesinhavy centr sam piša kod i robić heta narmalna, tam nie dyletanty. Ale jak heta byvaje — papraŭlali adno, źlacieła inšaje. Nie zaŭvažyli adrazu, potym doŭha pieraličvali nazad», — patłumačyli «Našaj Nivie».
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary