Na paŭdniovakarejskim telebačańni pažartavali pra mahčymy šlub Mikałaja Łukašenki i dački Kim Čen Yna
«Mikałaj chutka dasiahnie šlubnaha ŭzrostu, Kim Čžu E taksama padraście».
U papularnaj paŭdniovakarejskaj pieradačy pra Paŭnočnuju Kareju «Ciapier sustrakajemsia» (이제 만나러 갑니다) na kanale Channel A ekśpierty, žurnalisty i byłyja ŭciekačy z Paŭnočnaj Karei abmiarkoŭvali vizit Alaksandra Łukašenki ŭ Pchieńjan. Pieradača vyjšła ŭ efir 17 maja.
U studyi źviarnuli ŭvahu na vyklučna ŭračysty pryjom: sustreču na płoščy Kim Ir Siena, hanarovuju vartu, artyleryjski salut i asabisty ŭdzieł Kim Čen Yna jak padčas sustrečy Łukašenki, tak i padčas jaho pravodzinaŭ.
«Samaje vialikaje padabienstva pamiž hetymi krainami ŭ tym, što abiedźvie staviacca da Pucina amal jak da starejšaha brata (…)
Mienavita Pucin złučyŭ Biełaruś i Paŭnočnuju Kareju. Padčas vajny va Ukrainie Paŭnočnaja Kareja dapamahała Rasii, ale i Biełaruś taksama vielmi šmat dapamahała. Tamu dla Pucina heta dźvie vielmi važnyja krainy.
Biełaruś dla jaho taksama asablivy partnior. I, vierahodna, jon padumaŭ tak: «Paŭnočnaj Karei ciapier ciažka. Heta krainy, pra jakija ja kłapačusia. Sustreńciesia i pasprabujcie naładzić supracoŭnictva».
Tamu jon i pabudavaŭ hety most pamiž imi. Kali b Pucin hetaha nie zrabiŭ, jany naŭrad ci sustrelisia b. Tak možna heta razumieć. (…)
Ale ŭjavicie sabie, jak pryjemna heta bačyć Pucinu. Jon, napeŭna, dumaje: «Maje małodšyja braty cudoŭna ładziać pamiž saboj». Tamu ŭ hetaj historyi jość i peŭnaje pasłańnie z boku Pucina», — ličać udzielniki prahramy.
Jany taksama źviarnuli ŭvahu na jašče adno padabienstva pamiž Łukašenkam i Kim Čen Ynam: abodvuch niaredka padazrajuć u žadańni pieradać uładu svaim dzieciam.
«U Kim Čen Yna jość dačka Kim Čžu E. U Łukašenki taksama jość dzieci — troje synoŭ. Ale z kim jon najčaściej źjaŭlajecca na publicy? Nie sa starejšym i nie ź siarednim, a z małodšym synam Mikałajem», — adznačyli ŭdzielniki prahramy.
Mienavita na hetaj hlebie ŭ studyi prahučaŭ žart pra mahčymy dynastyčny šlub pamiž dziećmi dvuch kiraŭnikoŭ.
«Mikałaj chutka dasiahnie šlubnaha ŭzrostu, Kim Čžu E taksama padraście. Što heta, niejkaje Siaredniaviečča? Niejki dynastyčny šlub?», — pažartavali ŭdzielniki dyskusii.
Adzin ź ich adznačyŭ, što aŭtarytarnyja kiraŭniki niaredka imknucca pieradać uładu svaim dzieciam.
«Dyktatary viedajuć, što kaniec ich režymaŭ časta byvaje ciažkim. Tamu jany sprabujuć vyrašyć hetuju prablemu praz spadčynnuju pieradaču ŭłady. Tamu vielmi cikava, što padčas hetaha vizitu ŭ KNDR Łukašenka ŭziaŭ z saboj Mikałaja», — skazaŭ jon.
Inšy ŭdzielnik prahramy vykazaŭ mierkavańnie, što Łukašenka moh uspryniać prykład Kim Čen Yna jak madel padrychtoŭki pierajemnika.
«Mahčyma, paśla pajezdki ŭ Pchieńjan Łukašenka padumaŭ: «Voś jak treba rychtavać syna». Jon moh pryvieźci Mikałaja, kab paznajomić pamiž saboj tych, kaho ŭ budučyni bačać nastupnym pakaleńniem kiraŭnikoŭ. Maŭlaŭ: «Paśla nas pryjdziecie vy».
Jon dadaŭ, što mahčymyja piarečańni Zachadu naŭrad ci mieli b dla ich vialikaje značeńnie.
«Što b ni kazaŭ Zachad, im heta moža być abyjakava. Mahčyma, jany navat śpiecyjalna paznajomili ich pamiž saboj sa słovami: «Vy, nastupnaje pakaleńnie, dobra kirujcie Biełaruśsiu i Paŭnočnaj Karejaj»», — iranična zaŭvažyli ŭ studyi.
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej5
Kamientary