Pašynian prahałasavaŭ na parłamienckich vybarach u Armienii. Jon zajaviŭ, što nijakaj napružanaści z Rasijaj niama, a šlach da ES praciahniecca
Premjer-ministr Armienii Nikoł Pašynian prahałasavaŭ na vybarčym učastku ŭ Jerevanie, pieradaje armianskaja «Radyjo Svaboda».
Na pytańnie, ci hatovy jon pracavać u jakaści apazicyi ŭ vypadku adsutnaści bolšaści, Pašynian adkazaŭ: «Što narod vyrašyć, toje my i zrobim».
Premjer-ministr Armienii zapeŭniŭ, što Jerevan praciahnie raźvivać mižnarodnyja adnosiny. A na pytańnie, čamu ŭ vypadku pieramohi jon «źbirajecca najpierš nakiravacca ŭ Maskvu», jon adkazaŭ: «Ja pajedu i ŭ Maskvu, i ŭ Vašynhton, i ŭ Brusiel, i ŭ Paryž, i ŭ Tbilisi. Ja kazaŭ, što spadziajusia taksama atrymać mahčymaść pryniać udzieł u samicie Jeŭrapiejskaj palityčnaj supolnaści ŭ Baku».
Bolš za toje, niahledziačy na apošnija padziei ŭ armiana-rasijskich dačynieńniach, Pašynian śćviardžaje, što nie bačyć napružanaści.
«Niekatoryja siły, jakija dziejničajuć u Armienii, sprabujuć stvaryć napružanaść u adnosinach pamiž Armienijaj i RF. Hetaja napružanaść nie ŭźnikaje, bo z prezidentam RF u nas vielmi ščylnyja dačynieńni», — dadaŭ jon.
Pres-sakratar prezidenta RF Dźmitryj Piaskoŭ dniami padkreślivaŭ, što Armienii treba vybirać pamiž ES i JEAES.
Pašynian, adnak, zajaviŭ, što Armieniju nie mohuć pazbavić statusu dziaržavy-člena JEAES: «Rabočyja pytańni takoha kštałtu byvajuć pamiž usimi krainami JEAES. U JEAES usie rašeńni prymajucca kansensusam, i, adpaviedna, Armienija taksama maje prava vieta».
Što tyčycca budučyni Armienii, premjer-ministr adznačyŭ, što jany praciahnuć šlach demakratyčnych reform pry padtrymcy jeŭrapiejskich partnioraŭ, dadaŭšy, što Jeŭrapiejski sajuz źjaŭlajecca hałoŭnym partnioram Jerevana ŭ spravie praviadzieńnia demakratyčnych reform.
«My praciahniem hety šlach i pasprabujem pryvieści Armieniju ŭ adpaviednaść sa standartami Jeŭrapiejskaha sajuza, i heta pieršaja stratehičnaja meta. Paśla hetaha pahladzim, tamu što kali Armienija sapraŭdy całkam budzie adpaviadać standartam Jeŭrapiejskaha sajuza, u nas budzie dva mahčymyja scenaryi. Pieršy — Jeŭrapiejski sajuz prymaje Armieniju jak paŭnapraŭnaha člena. Inšy varyjant — Jeŭrapiejski sajuz nie prymaje Armieniju jak paŭnapraŭnaha člena, bo heta zaležyć ad mnohich palityčnych niuansaŭ. Naprykład, Jeŭrapiejski sajuz moža vyrašyć, što nie žadaje pašyracca. Takoje moža zdarycca», — padkreśliŭ jon.
U hetym vypadku, adnak, pavodle słoŭ Pašyniana, Armienija ŭsio adno vyjhraje, «tamu što navat pry druhim scenaryi my budziem mieć krainu, jakaja całkam adpaviadaje jeŭrapiejskim standartam».
A što tyčycca bałansavańnia dačynieńniaŭ pamiž Jeŭrapiejskim sajuzam i Rasijaj, dyk heta, pa jaho słovach, zadača źniešniaj palityki. Pašynian nahadaŭ, što Jerevan pravodzić zbałansavanuju zamiežnuju palityku i palityku bałansavańnia.
Kamientary
eúropa pad ardoj , čakajuć nafty , hazu , šmarahdaú , brylikaú , babła .