U Biełarusi ŭviali limit na daŭhi za mabilnuju suviaź: što heta značyć dla abanientaŭ
Mabilnyja apieratary bolš nie buduć zahaniać u kaśmičnyja zapazyčanaści. Z 7 červienia 2026 hoda ŭ Biełarusi pačali dziejničać novyja praviły vykanańnia pasłuh sotavaj suviazi. Ciapier mabilnyja apieratary zakanadaŭča abmiežavanyja ŭ tym, jaki doŭh jany mohuć dazvolić klijentam na asabovym rachunku.
Novaŭviadzieńni praduhledžanyja pastanovaj Savieta Ministraŭ №108. Hałoŭnaja meta dakumienta — abaranić karystalnikaŭ ad niečakanych vielizarnych rachunkaŭ za telefon i internet.
Što źmianiłasia?
Ciapier apieratary suviazi nie majuć prava dapuskać doŭh na rachunku abanienta bolš za piać bazavych adzinak (na siońnia — adna bazavaja składaje 45 rubloŭ, adpaviedna, limit 225 rubloŭ).
Heta praviła stanie asabliva karysnym padčas pajezdak za miažu. Raniej byvali vypadki, kali z roŭminhu biełarusy viartalisia z daŭhami na tysiačy rubloŭ. Ciapier apieratar budzie abaviazany svoječasova zabłakavać suviaź pry dasiahnieńni limitu.
Kali standartnaj sumy na 225 rubloŭ karystalniku niedastatkova (naprykład, dla biznes-linij abo karparatyŭnych klijentaŭ), abanient moža napisać zajavu mabilnamu apierataru i ŭstalavać inšy, bolš prydatny limit.
Jašče adna važnaja častka pastanovy tyčycca padklučeńnia dadatkovych płatnych servisaŭ (haraskopaŭ, aniekdotaŭ i h.d.).
Z 7 červienia padpisacca na płatny kantent praz SMS abo USSD-zapyt možna tolki pry samastojnym uvodzie kamandy samim karystalnikam. Mabilnyja apieratary bolš nie zmohuć aŭtamatyčna ci praz «vypadkovy klik» pa baniery ŭ internecie padklučać abanienckuju płatu za niepatrebnyja internet-servisy.
Ciapier čytajuć
Paśla biełaruskaj vioski Šnajderaŭ bolš nie biantežyć pytańnie ŁHBT. Siamja z Hiermanii, jakaja stała hierojami prapahandy, viartajecca ŭ ES21
Kamientary