U kryvi japonskich supierdoŭhažycharoŭ znajšli niezvyčajnyja kletki
U kryvi japoncaŭ va ŭzroście 110 hadoŭ i bolš navukoŭcy znajšli niezvyčajna vysokuju kolkaść redkaha typu T-limfacytaŭ CD4. Jany zdolnyja nie tolki raspaznavać patencyjnuju pahrozu, ale i niepasredna źniščać jaje, paviedamlajecca ŭ časopisie Cell Reports.
Daśledavańnie praviała hrupa navukoŭcaŭ na čale z Kasuke Chasimota z Univiersiteta Osaka. U im udzielničali 28 pažyłych japoncaŭ, jakich padzialili na try ŭzrostavyja hrupy: ad 70 da 99 hadoŭ, ad 100 da 109 hadoŭ i 110 hadoŭ i starejšyja.
Zvyčajna T-kletki padzialajuć na kletki-chiełpiery, jakija kaardynujuć imunny adkaz, i kletki-kilery, zdolnyja źniščać, u pryvatnaści, rakavyja kletki. U supierdoŭhažycharoŭ daśledčyki znajšli značna bolš kletak, jakija spałučajuć ułaścivaści abiedźviuch hrup.
U ludziej va ŭzroście 110 hadoŭ i starejšych takija kletki składali kala 20% usich T-limfacytaŭ, tady jak u mienš pažyłych udzielnikaŭ daśledavańnia — prykładna 4%. Takim čynam, ich dola ŭ kryvi supierdoŭhažycharoŭ była prykładna ŭ piać razoŭ vyšejšaj.
Navukoŭcy taksama vyśvietlili, što mnohija z hetych T-kletak utvarajuć vialikija hrupy praktyčna adnolkavych kletak. Heta moža śviedčyć pra toje, što na praciahu mnohich hadoŭ jany nieadnarazova sutykalisia z adnymi i tymi ž pahrozami dla arhanizma.
Asablivuju cikavaść vyklikała padabienstva malekularnych receptaraŭ hetych kletak da receptaraŭ T-kletak, jakija vyjaŭlajucca ŭ ludziej z ankałahičnymi zachvorvańniami. Daśledčyki miarkujuć, što takaja asablivaść patencyjna moža dapamahać imunnaj sistemie raspaznavać puchlinnyja kletki jašče da taho, jak zachvorvańnie stanie klinična prykmietnym.
Pry hetym navukoŭcy padkreślivajuć: daśledavańnie nie dakazvaje, što mienavita hetyja T-kletki zabiaśpiečvajuć zvyšdaŭhalećcie. Jano pakazvaje tolki, što ŭ ludziej vielmi stałaha ŭzrostu imunnaja sistema moža nie prosta pastupova słabnuć, a istotna pierabudoŭvacca.
Na dumku daśledčykaŭ, vyniki dapamahajuć pa-novamu pahladzieć na stareńnie imunnaj sistemy: u niekatorych ludziej jana navat u vielmi stałym uzroście moža zachoŭvać vysokuju aktyŭnaść i adaptavacca da novych pahroz.
Pieršaha namieśnika hiendyrektara «Biełviesta» pasadzili na try z pałovaj hady za palityku5
Pieršaha namieśnika hiendyrektara «Biełviesta» pasadzili na try z pałovaj hady za palityku
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1717
Kamientary