«Napisali, jak ja chaču viarnucca ŭ śviatuju Rasiju». Prapahanda pierakruciła žart biełaruski i prydumała fejk pra zahnivajučuju Amieryku
Dziaŭčyna, u jakoj doma na ścianie visić bieł-čyrvona-bieły ściah, raptam daviedałasia, što jana rasčaravanaja amierykanskaj maraj madel ź Jekaciarynburha.
Hanna try hady tamu vyjechała ź Biełarusi i ciapier žyvie ŭ ZŠA. U instahramie jana raskazvaje pra žyćcio mihranta ŭ hetaj krainie. Časam na fonie jaje rolikaŭ možna pabačyć i bieła-čyrvona-bieły ściah.
Paru dzion tamu Hanna zapisała žartaŭlivy rolik, u jakim skazała, što žyvie na Manchetenie, i pakazała vid sa svajho akna, padpiavajučy radki ź viadomaj pieśni «Ona chotieła by žiť na Manchettienie…». Niahledziačy na toje, što heta roh znakamitaha Bradvieja i Kanał-stryt u Trajbiecy, adnym z samych modnych, zamožnych i biaśpiečnych rajonaŭ Manchetena, vid z akna adkryvaŭsia nie lepšy: abadranyja ścieny ŭ hrafici, vuličny handal z ruk na tratuarach i parkoŭcy, paŭsiul raskidanaje śmiećcie. Ironija dziaŭčyny zrazumiełaja.
Ale Hanna nijak nie čakała, što jaje videa padchopić rasijskaja antyzachodniaja prapahanda. Dniami jana apublikavała novy rolik, u jakim raskazała, što paśla publikacyi papiaredniaha videa padpisčyki stali dasyłać joj roznyja prapahandysckija artykuły pa jaho matyvach.
«Jano chutka pačało nabirać prahlady, tamu što tam była nahoda zas*ać zahnivajučuju Amieryku», — kaža dziaŭčyna.
Spačatku jaje videa źjaviłasia ŭ rasijskim vydańni «Iźviestija».
«Hory śmiećcia, narkamany i vuličny rynak — sapraŭdnaja karcinka «pryhožaha žyćcia» na Manchetenie», — tak padpisali rolik prapahandysty.
Ale niekatoryja rasijskija prapahandysty pajšli jašče dalej. Jany skarystalisia skrynšotami ź videa Hanny, kab raskazać absalutna vydumanuju historyju pra 26-hadovuju Kaciu, madel ź Jekaciarynburha, jakaja byccam pierajechała ŭ Ńju-Jork z nadziejaj na «amierykanskuju maru», ale sutyknułasia ź niepryvabnaj realnaściu.
Za maleńkuju studyju na Manchetenie baćki Kaci byccam by płaciać $3500 za miesiac, ale vakoł brud, kryki biazdomnych, šalonyja ceny navat na kavu, a biez strachoŭki kožny vizit da doktara pieratvarajecca ŭ pakuty. U madelnym biznesie — pastajanny cisk, kankurencyja i niestabilnyja zarobki. Samota, falš i strach stali jaje budzionnaściu. Ńju-Jork, pra jaki maryła, akazaŭsia byccam nie horadam mahčymaściaŭ, a horadam vyžyvańnia, tamu Kacia maryć vyjechać adtul.
«Hetyja artykuły napisanyja niby ad majho imia, tam napisana, što mianie zavuć Kacia, ja madel ź Jekaciarynburha, jak mnie drenna ŭ Ńju-Jorku i jak ja maru viarnucca damoŭ u śviatuju Rasiju. Kali što, ja Hanula, rodam ź Biełarusi, žyvu ŭ San-Francyska i lublu Amieryku», — patłumačyła Hanna.
Kamientatary iranizujuć, što dziaŭčynie, jakaja maryła stać papularnaj, varta było ŭdakładniać, jakim mienavita čynam. Hanna pahadžajecca: nie pra takuju papularnaść jana maryła.
Inšyja kamientatary zaŭvažajuć, što, niahledziačy na toje, što ŭ Rasii zabaronieny amierykanski instahram, karystalniki z hetaj krainy ŭsio roŭna ŭ im čamuści siadziać i čakajuć čarhovych paćviardžeńniaŭ pra zahnivajučy Zachad.
«Tyja, chto hladzić telik u Rasii, bolš vierać viadoŭcam, što ty Kacia, čym tabie, što ty Ania», — adznačyŭ adzin z kamientataraŭ pad rolikam.
Ciapier čytajuć
Radyjoviadučy raskazaŭ pra ŭnutranuju kuchniu ANT — i pra toje, jak pieratvaryŭsia ŭ palitviaźnia1
Kamientary