Madonna zaklikała Papu Lva XIV pryjechać u Hazu, pakul nie stała zanadta pozna

«Śviaty Ajciec, kali łaska, adpraŭlajciesia ŭ Hazu i pryniasicie svajo śviatło dzieciam, pakul nie stała zanadta pozna», — napisała Madonna.

«Jak maci, ja nie mahu hladzieć na ich pakuty. Los dziaciej u hetym śviecie — sprava kožnaha. Vy — adziny z nas, kamu nie mohuć admović va ŭjeździe», — zajaviła śpiavačka.

Raniej Vialikabrytanija, ES, Aŭstralija, Kanada i Japonija apublikavali sumiesnuju zajavu, u jakoj havorycca, što na vačach usiaho śvietu ŭ siektary razhortvajecca hoład, i zapatrabavali nieadkładnych krokaŭ dla palahčeńnia dastaŭki humanitarnaj dapamohi ŭ Hazu.

Izrail sutykajecca z rostam mižnarodnaha cisku ŭ suviazi z humanitarnaj situacyjaj u Hazie. Ab jaje maštabach viadoma ŭ asnoŭnym sa słoŭ padkantrolnych CHAMAS paleścinskich struktur i miascovych žurnalistaŭ, niekatorych ź jakich Izrail taksama źviazvaje z CHAMAS. Izrailskija ŭłady admaŭlajuć najaŭnaść hoładu ŭ siektary Haza i abvinavačvajuć ahienctvy AAN u tym, što jany nie zabirajuć nazapašanuju na pamiežnych punktach humanitarnuju dapamohu i nie dastaŭlajuć jaje dalej.

Pavodle niekatorych danych izrailskich krynic, havorka idzie pra tony hruzaŭ. Adnak humanitarnyja ahienctvy AAN nastojvajuć, što sutykajucca ź pieraškodami i zatrymkami pry zbory dapamohi z kantralujemych Izrailem pamiežnych zon.

«Nam treba, kab humanitarnyja varoty byli całkam adkrytyja, kab uratavać hetych niavinnych dziaciej. Času bolš niama. Kali łaska, skažycie, što vy pajedziecie. Ź luboŭju, Madonna», — havorycca ŭ zvarocie śpiavački da Papy.

U lipieni Papa Leŭ XIV znoŭ zaklikaŭ da spynieńnia ahniu ŭ siektary Haza paśla taho, jak u vyniku izrailskaha ŭdaru zahinuli try čałavieki, što chavalisia ŭ katalickaj carkvie ŭ horadzie Haza.

«Ja zaklikaju mižnarodnuju supolnaść zachoŭvać humanitarnaje prava i pavažać abaviazak abaraniać mirnych žycharoŭ, a taksama zabaronu na kalektyŭnaje pakarańnie, nieapraŭdanaje ŭžyvańnie siły i prymusovaje pieramiaščeńnie nasielnictva», — zajaviŭ Papa (cytata pavodle PA News). Z samaha pačatku vajny ŭ Hazie Madonna vystupała sa sceny na svaich kancertach z emacyjanalnymi pramovami ŭ padtrymku paleścincaŭ.

Jana zaklikała prychilnikaŭ nieści na Blizki Uschod «mir, śviatło i luboŭ» — jak paasobku, tak i razam.

«Ja nie pakazvaju palcam, nie vinavaču i nie zajmaju ničyju bok. Usie pakutujuć. U tym liku maci zakładnikaŭ. Ja malusia, kab i ich vyzvalili», — havorycca ŭ dopisie Madonny.

• 4
• 0
• 0
• 5
• 0
• 0
• 0
• 0