ANT patłumačyŭ pryčynu čerhaŭ na miažy Biełarusi z Polščaj. Prapahandystaŭ vyśmiejali prosta ŭ kamientaryjach pad videa
Biełaruski prapahandyscki telekanał ANT vypuściŭ siužet pra hihanckija čerhi na miažy Biełarusi i Polščy. Pavodle viersii aŭtaraŭ siužetu, u situacyi vinavaty polski bok, jaki nibyta drenna arhanizavaŭ pracu propusku. Biełarusy ž u kamientaryjach źviarnuli ŭvahu na momanty, pra jakija pramaŭčali prapahandysty, zaŭvažyła BGmedia.
Dziaržtelekanał ANT apublikavaŭ siužet pra pryčyny vielizarnych čerhaŭ na vyjezd ź Biełarusi ŭ Polšču praz punkt propusku «Brest». Prapahandysty, viadoma, abvinavacili va ŭsim palakaŭ, jakija śpiecyjalna pavolna pracujuć, kab razzłavać biełarusaŭ. A biełaruskich pamiežnikaŭ i mytnikaŭ pakazali ŭ siužecie idealnymi rabotnikami, da jakich niama pytańniaŭ. Ale jany jość, tamu biełarusy, jakija žyvuć u tym liku ŭ Jeŭropie, raskrytykavali i vyśmiejali siužet prapahandystaŭ u kamientaryjach na płatformach ANT u Youtube i TikTok.
Jak prapahandysty pastaralisia schavać praŭdu pra čerhi na miažy
ANT apublikavaŭ svoj prapahandyscki siužet 10 žniŭnia. Mahčyma, zdymali jaho ŭ toj ža dzień, bo dziaržžurnalisty pahutaryli z kiraŭnictvam punkta propusku «Brest».
U siužecie niekalki razoŭ zhadvajuć, što ŭłady Polščy zakryli ŭsie aŭtamabilnyja punkty propusku na miažy ź Biełaruśsiu, akramia «Bresta». Ale pra pryčyny zakryćcia maŭčać. Nahadajem, ich zakryli z-za mihrantaŭ, jakich režym Łukašenki praciahvaje dastaŭlać na miažu i dapamahaje im niezakonna trapić u Polšču. A taksama z-za prysudu polskamu žurnalistu i aktyvistu Andžeju Pačobutu.
Načalnik adździaleńnia pahraničnaha kantrolu «Varšaŭski most» Alaksiej Prakapienia ŭ kamientary ANT paskardziŭsia, što polski bok nie vykonvaje normu pa prapusku aŭtamabilaŭ. Ale pry hetym jon ni słova nie skazaŭ pra toje, ci vykonvaje hetyja normy biełaruskaja bok:
«Asnoŭnaj pryčynaj źjaŭlajecca krajnie nierytymičnaja rabota kantrolnych słužbaŭ sumiežnych dziaržaŭ, jakija praciahvajuć prymać na svaju terytoryju transpartnych srodkaŭ mienš, čym ustanoŭlena mižnarodnymi pahadnieńniami. Tak, u asobnyja hadziny kožnych sutak sumiežnym bokam nie ažyćciaŭlajecca propusk naohuł transpartnych srodkaŭ i asob, abo ž ažyćciaŭlajecca ŭ minimalnym abjomie. Z 3 da 4 hadzin biahučych sutak polskim bokam pryniata 2 lehkavyja transpartnyja srodki i nivodnaha aŭtobusa».
Adzin momant u siužecie naśmiašyŭ. Prapahandyst, znachodziačysia ŭ punkcie propusku «Brest», zajaviŭ:
«Za majoj śpinaj polski bok, i my možam bačyć vielizarnuju čarhu z aŭtamabilaŭ, jakoj niama ni kanca, ni kraju. Sumiežny bok pracuje dastatkova śpiecyfična: albo zapuskaje załpam na praciahu hadziny pa 30—40 mašyn, albo nivodnaj na praciahu niekalkich hadzin. Pry narmalnym pracoŭnym rytmie voś hetaja placoŭka pavinna być zapoŭnienaja transpartam, ale zaraz jana amal pustaja. Dla razumieńnia: norma — 70 aŭtamabilaŭ u hadzinu, kali b vałakita była ŭ nas u nazapašvalniku, jabłyku nie było b dzie ŭpaści».
Vidavočna, što jon dačakaŭsia momantu, kab źniać pusty nazapašvalnik, dzie zvyčajna stajać aŭtamabili, jakija pryjechali z Polščy i čakajuć pačatku kantrolu ŭ «Breście».
A načalnik mytnaha pasta «Varšaŭski most» Alaksiej Daniluk naohuł zdoleŭ abvinavacić palakaŭ u prablemie, jakaja nasamreč ułaścivaja biełarusam:
«Kałaps uźnikaje, kali praciahły pieryjad času transpartnyja srodki nie nakiroŭvajucca ŭ punkt propusku, a zatym vialikaja kolkaść, naprykład, tych ža aŭtobusaŭ, paradku 10, vypuskajecca sumiežnym bokam, i ŭ suviazi sa śpiecyfikaj punkta propusku, u nas vuzkaje horła — heta sam most, jany zabivajuć jaho, tym samym pieraškadžajučy ŭjezdu ŭ punkt propusku. Razam z tym, va ŭzajemadziejańni z pahraničnaj słužbaj, my maksimalna zabirajem usie aŭtobusy ŭ punkt propusku, tym samym dajem mahčymaść dla manieŭru lehkavoha transpartu».
U pryhraničnych čatach nie raz pisali, što heta biełarusy zabivajuć most aŭtamabilami i aŭtobusami, stvarajučy tam kałaps.
Siužet ANT vyśmiejali i raskrytykavali prosta ŭ kamientaryjach
Biełarusy adrazu adznačyli momanty, pra jakija pramaŭčali prapahandysty.
* «A chto zabiŭ polskaha sałdata? Chto pastajanna parušaje miažu? I jak Polšča pavinna na ŭsio heta reahavać?».
* «Heta vy možacie kazać tym, chto nie jeździć tudy i nazad. A tyja, chto jeździć, viedajuć chto, što i jak».
* «U minułym hodzie ŭ Biełarusi tolki ŭ terminale ŭnutry, užo na ahladzie, prastajali 8 hadzin! Mytnik prosta chadziŭ tudy-siudy. To videarehistratary razdavaŭ kaleham, to jeŭ, to dakumienty praviaraŭ. 8 hadzin — adna mašyna! Tak što nie treba».
* «Ja prachodžu biełaruskuju mytniu 12 hadzin. Spačatku ŭsie škarpetki i trusy pierahledziać. A potym renthien [aŭtamabila]. Elektronnaha ŭliku aŭto dahetul niama ŭ mytnikaŭ».
* «Jašče prablema: u bok Biełarusi stajać u čarzie i čyrvony, i zialony kalidor. I časam zialony moža być svabodny, a čyrvony zabity. Tyja, chto ŭ zialony, nie viedaje i nie moža abjechać tych, chto ŭ čyrvony. Vychad: na niejtralnaj pałasie ŭ bok Biełarusi patrebna arhanizacyja rehulavańnia ruchu».
* «Sumlenna kažučy, abodva baki pracujuć pavolna… staiš što ŭ bok Polščy, što ŭ bok RB. Pa časie amal adnolkava. Tak što nie treba».
* «Palaki choć redka prosiać prajści kantrol z rečami, u adroźnieńnie ad biełarusaŭ».
* «Kali hladzieć abjektyŭna, u čerhach vinavaty sami biełarusy. U pieršuju čarhu dziaržava. Tłumaču na palcach. Z boku Biełarusi adkryli miažu nielehałam, jany pajšli na Zachad natoŭpami. U adkaz zachodnija susiedzi pazakryvali punkty propusku. Druhoje: jość siezonnaść ruchu. Nu i kryminał, kantrabanda nikudy nie źnikli. Treciaje: zachodni śviet žyvie ličbavymi technałohijami, tolki dziaržava vinavataja, što svaje ludzi biez sanitaryi, u chaosie pakutujuć. A moža ŭłady Biełarusi nie chočuć, kab prostyja ludzi bačyli inšaje žyćcio i paraŭnoŭvali».
* «Viarnicie Pačobuta i vas pačnuć ličyć za ludziej!».
* «Moža nie treba było być pamahatymi teraryzmu i vajennych złačynstvaŭ? Usio jak zaŭsiody: «a nas za što?» Moža ŭ vas bačać pahrozu i staviacca jak da prakažonych?»
Byli i iraničnyja kamientary:
* «Jak ža tak, vy adkul i kudy. U vas ža doma raj, i baćka vaš tak choraša zalivaje pra ŭsieahulnaje ščaście».
* «Raz tak dobra ŭ Biełarusi, čaho ž vy preciesia tady ŭ Polšču?».
* «A što im rabić u zahnivajučaj Jeŭropie?».
* «A što vy jedziecie ŭ hetuju «drennuju Jeŭropu», jakaja ŭsich kryŭdzić? Jedźcie ŭ Rasiju, tam ža typu «lepš».
* «Skažycie dziakuj, što puskajuć».
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary