Hrozieŭ raskazaŭ, što adroźnivaje zachodnija śpiecsłužby ad rasijskich

Bałharski žurnalist-rasśledavalnik Chrysta Hrozieŭ u intervju telekanału «Dožd́» padzialiŭsia svajoj acenkaj, čym adroźnivajucca rasijskija śpiecsłužby ad zachodnich.

Jak śćviardžaje Hrozieŭ, «usie śpiecsłužby parušajuć zakony, dla ich zakony nie pisanyja». «Usie śpiecsłužby mohuć dumać pra toje, jak jany pa-za zakonam buduć likvidavać kahości, chto źjaŭlajecca realnaj pahrozaj, na ŭzroŭni terarystyčnaj pahrozy dla ich nacyjanalnaj biaśpieki».

U toj ža čas, jak davodzić žurnalist, kali hadoŭ z 50—70 tamu istotnych adroźnieńniaŭ u dziejańniach usich śpiecsłužbaŭ nie było, to ciapier «zachodnija krainy i toj ža Izrail dazvalajuć sabie ŭsio mienš i mienš, i adchileńni ad zakonu stanoviacca ŭsio mienšymi i mienšymi, usio bolš prazrystymi, tak, kab budučy analiz, aŭdyt moh by ich apraŭdać».

Što tyčycca rasijskich śpiecsłužbaŭ, to jany naadvarot, nie tolki viarnulisia da savieckaj praktyki, ale i značna pieravysili jaje ŭzrovień.

Na pohlad Hrozieva, heta źviazana z karupcyjaj i niaźmiennaściu ŭłady.

U jakaści prykładu žurnalist raskazvaje pra hienierała Andreja Aviarjanava, jaki kamanduje vajskovaj čaściu 29155 HRU, što kuryruje dyviersijnyja apieracyi va ŭsim śviecie:

«Toj samy śpiecsłužbist, čałaviek, jaki šef Miškina i Čapihi, jon stvaryŭ sabie harem maładych, časta niepaŭnaletnich paluboŭnic, za jakija adkazvajuć usie Bašyravy i Piatrovy, i jany pavinny źbić luboha mužčynu, jaki ź imi flirtuje, naprykład.

Heta realny vypadak byŭ u 2020 hodzie, kali kamanda ludziej, jakija pavinny abaraniać nacyjanalnyja intaresy Rasii, pajechała ŭ Pieciarburh, kab źbić kankretnaha čałavieka, miascovaha bandyta, jaki mieŭ niejkuju niaździejśnienuju ramantyčnuju afieru z adnoj z paluboŭnic Aviarjanava».

«Vielmi časta hetyja śpiecsłužby prydumlajuć dla Pucina (bo jon pavinien dać dabro na lubyja takija kinietyčnyja dziejańni, takija jak zabojstvy, vybuchi i hetak dalej) pryčynu, jakaja padobnaja da dziaržaŭnaha intaresu, a realna ŭ ich jość pryvatny intares. Heta značyć, u ich ździełka sa zbrojaj, dzie jany b atrymali vielizarnyja kamisijnyja najaŭnymi, niekalki dziasiatkaŭ miljonaŭ. I jana niejak sychodzić ź ich ruk, i jany kankurenta nazyvajuć užo ahientam IDIŁ, ahientam CRU i hetak dalej, i ŭklučajuć jaho ŭ śpis dla likvidacyi».

Takoha nie moža być ni ŭ Masadzie, ni ŭ CRU, pierakanany Hrozieŭ.

«Tam jość čakańnie, što navat kali elita Masada nie budzie mianiacca, to ŭrad rozny, i navat sam fakt, što ŭrad zachoča niejak znajści niejkaje brudnaje minułaje, jany znojduć toje, što było zroblena nie tak. A tut nie moža być takoha. Ja dumaju, što heta tłumačyć usio — niaźmiennaść», — davodzić žurnalist.

Pavialičyć

Jakija adroźnieńni ŭ stylach śpiecsłužbaŭ

Padčas razmovy Chrysta Hrozieŭ padzialiŭsia svaimi nazirańniami adnosna roznych stylaŭ pracy suśvietnych śpiecsłužbaŭ, adznačyŭšy, što choć jahony asnoŭny fokus apošnija 10 hadoŭ byŭ nakiravany na Rasiju, jon bačyć vyraznyja adroźnieńni ŭ ich padychodach.

Pavodle Hrozieva, amierykanskaje CRU mocna źmianiłasia. U 70-ch, 80-ch i navat 90-ch hadach jany pravodzili šmat vysokaryzykoŭnych apieracyj, aktyŭna ŭmiešvajučysia va ŭnutranuju palityku inšych krain. Heta pryviało da mocnaha niehatyvu jak na mižnarodnaj arenie, tak i ŭnutry samoj Amieryki. U vyniku, jak śćviardžaje žurnalist, ciapier CRU vielmi aściarožnaje.

Hrozieŭ padkreślivaje: «Taja viersija naratyvu, jakuju raspaŭsiudžvaje rasijskaja prapahanda pra CRU, što jany hatovyja ŭsiudy ŭmiešvacca — nie, jany bajacca, jany svajho cieniu bajacca, i navat kali była mahčymaść im paŭdzielničać, skažam, u pratestach u Rasii i stymulavać pratesty, jany z-za svajoj minułaj historyi nie robiać».

Brytanskuju raźviedku MI6 Hrozieŭ ličyć sapraŭdnymi prafiesijanałami svajoj spravy. Ich admietny styl — pracavać niezaŭvažna i pieravažna «čužymi rukami». Jany sami nie vykonvajuć pramych «kinietyčnych zadač» (hvałtoŭnych dziejańniaŭ, takich, jak zabojstvy), ale zamiest hetaha vučać inšych, jak pravilna i efiektyŭna heta rabić.

Dla charaktarystyki rasijskich śpiecsłužbaŭ Hrozieŭ znachodzić tolki adno słova — «varvarstva». Pavodle jaho, nivodnaja inšaja śpiecsłužba ŭ śviecie nie robić dźviuch rečaŭ, jakija stali normaj dla rasijskich:

«Ni ŭ kaho niama takoha, kab jany hanialisia za svaimi apazicyjanierami, za svaimi hramadzianami, i ich zabivali. Heta ŭvohule absurd.

Ni ŭ kaho niama takoha, što jany vykarystoŭvajuć ludziej, niavinnych, mirnych, jak paddoślednych chamiačkoŭ dla vyprabavańnia novych atrut, novych srodkaŭ radyjoelektronnaj baraćby i hetak dalej, i hetak dalej».

• 11
• 1
• 1
• 0
• 1
• 0
• 5
• 0