Voś jakoje charastvo za 40 miljonaŭ dalaraŭ pradaje siabar-trenier Łukašenki
Praz dva hady paśla ŭvodu ŭ ekspłuatacyju šmatfunkcyjanalnaha kompleksu «Płacinum» na praśpiekcie Pieramožcaŭ kampanija, źviazanaja z asabistym trenieram Alaksandra Łukašenki Siarhiejem Ciacierynym, vystaviła na prodaž kala 10 tysiač kvadratnych mietraŭ ofisnych płoščaŭ. Za častku biznes-centra chočuć atrymać amal 40 miljonaŭ dalaraŭ, choć u abviestcy jašče možna ŭbačyć pavierchi biez azdableńnia.
Uzimku 2021 hoda Minharvykankam pieradaŭ u arendu kampanii «BiełHłobałHarant» dva ziamielnyja ŭčastki ahulnaj płoščaj kala 2,6 hiektara na miescy byłoj aŭtastajanki pamiž Respublikanskim centram alimpijskaj padrychtoŭki pa tenisie i praśpiektam Pieramožcaŭ. Nieŭzabavie tam pačałosia budaŭnictva šmatfunkcyjanalnaha kompleksu.
Jak vynikała z rasśledavańnia Biełaruskaha rasśledavalnickaha centra, «Kibierpartyzanaŭ» i «Rabočaha ruchu», prajekt staŭ mahčymy dziakujučy asabistamu daručeńniu Alaksandra Łukašenki, padpisanamu 5 sakavika 2020 hoda. Ziamlu kampanija atrymała ŭ doŭhaterminovuju arendu, a nie va ŭłasnaść.
Za «BiełHłobałHarantam» staić asabisty trenier Łukašenki pa tenisie i biznesoviec Siarhiej Ciacieryn. Pavodle rasśledavańnia, za prava arendy kampanija zapłaciła mienš za 80 tysiač rubloŭ, abo kala 30 tysiač dalaraŭ pa tahačasnym kursie, — mienš za adzin pracent ad kadastravaj vartaści ŭčastkaŭ. Kali b prava arendy pradavali praz adkryty aŭkcyjon, biudžet Minska moh by atrymać jak minimum u 250 razoŭ bolš.
U pačatku 2024 hoda biznes-centr «Płacinum» pa adrasie praśpiekt Pieramožcaŭ, 63V uviali ŭ ekspłuatacyju. A praź niekalki miesiacaŭ paśla zdačy abjekta kampanija pačała šukać kupca.
U prezientacyi dla patencyjnych inviestaraŭ hałoŭnymi pieravahami nazyvali susiedstva z Pałacam Niezaležnaści, Płoščaj Dziaržaŭnaha ściaha i Respublikanskim centram tenisa. Adznačałasia, što ŭ kompleksie praduhledžany kafe, fitnes-centr, kanfierenc-zała, kramy i sałon pryhažości.
Pieršapačatkova za ŭvieś kompleks płoščaju bolš za 28 tysiač kvadratnych mietraŭ, jaki składajecca z troch siamipaviarchovych karpusoŭ z ofisami svabodnaj płaniroŭki, razam z parkinhami prasili $68,7 miljona biez PDV.
Praz dva hady na prodaž vystavili nie ŭvieś abjekt, a tolki jaho častku. Pry hetym u abviestcy na kufar.by ryełtary paznačyli prapanovu ŭ katehoryi «restaran», choć u apisańni havorka idzie pra prodaž ofisnych pamiaškańniaŭ.
Kupcam prapanujuć ofisy płoščaj ad 101,6 da 10 tysiač kvadratnych mietraŭ. Budynak abstalavany sistemaj kandycyjanavańnia typu čyler-fankojł, pažarnaj i achoŭnaj sihnalizacyjaj, datčykami kantrolu vuhlakisłaha hazu, liftami OTIS, indyvidualnymi sanvuzłami i pakojami dla pryjomu ježy. Pobač jość adkrytaja parkoŭka na 200 mašynamiescaŭ i padziemny parkinh jašče na 146.
Jak vynikaje z abviestki, na prodaž vystavili častku korpusa ahulnaj płoščaj kala 10 tysiač kvadratnych mietraŭ. Płošča adnaho paviercha składaje kala 1,5 tysiačy kvadratnych mietraŭ. Pradaviec choča atrymać 118,3 miljona rubloŭ, abo prykładna 40 miljonaŭ dalaraŭ pa ciapierašnim kursie — kala 11800 rubloŭ za kvadratny mietr.
Pry hetym, niahledziačy na toje, što kompleks zdali jašče ŭ 2024 hodzie, na fotazdymkach u abviestcy vidać, što častka pavierchaŭ dahetul zastajecca biez čystavoha azdableńnia.
Ciapier čytajuć
Siarhiej Cichanoŭski zapuściŭ svoj jutub-kanał ź vieršami i kazkami40
Kamientary
kali vy pieršy prydumali hety termin, to sročna zapantentujcie jaho. a inakš, na jakija šyšy nam z vašaj budučaj cieščaj i jejnym vyvadkam žyć?