U Kienii raptoŭna zahinuli 15 słanoŭ. Pierad śmierciu ŭ ich byŭ paralič
U Kienii rasśledujuć zahadkavuju hibiel 15 słanoŭ, jakija za miesiac pamierli ŭ Nacyjanalnym parku Ambasieli. Bolšaść zahinułych žyvioł pierad śmierciu mieła častkovy paralič, paviedamlaje The Guardian.
Pavodle Kienijskaj słužby achovy dzikaj pryrody, u 10‑ci słanoŭ paralič naziraŭsia na praciahu dvuch dzion pierad hibiellu. Ustanavić, što adbyłosia z astatnimi piaćciu, pakul składana: ich tuški byli mocna raskładzienyja albo častkova źjedzienyja inšymi žyviołami.
Siarod zahinułych byŭ tolki adzin samiec, astatnija — samki i słaniaty.
Papiarednija daśledavańni ŭzoraŭ, praviedzienyja ŭ łabaratoryi Univiersiteta Najrobi, vyjavili rečyva, jakoje moža być patencyjna taksičnym. Adnak dziaržaŭnaja łabaratoryja, jakaja praviała asobnyja analizy, pakul nie znajšła taksinaŭ, najaŭnaść jakich praviarałasia.
Tamu daśledavańnie praciahvajecca. Śpiecyjalisty analizujuć nie tolki tkanki zahinułych žyvioł, ale i krynicy vady, a taksama inšyja mahčymyja faktary zabrudžvańnia navakolnaha asiarodździa ŭ rajonach, dzie byli znojdzienyja miortvyja słany.
Ułady padkreślivajuć, što na hety momant niama dokazaŭ, što mahčymaje zachvorvańnie abo pryčyna hibieli słanoŭ moža pieradavacca ludziam.
U Kienii vypadki atručvańnia słanoŭ užo zdaralisia raniej. Žyvioł mahli atručvać brakańjery abo miascovyja žychary ŭ vyniku kanfliktaŭ pamiž ludźmi i dzikaj pryrodaj.
Padobnaja masavaja hibiel słanoŭ nazirałasia ŭ Batsvanie ŭ 2020 hodzie. Tady navukoŭcy pryjšli da vysnovy, što vierahodnaj pryčynaj mahło stać atručvańnie vadoj, u jakoj praz razmnažeńnie cyjanabakteryj nazapašvalisia niebiaśpiečnyja rečyvy. Pavodle mierkavańnia daśledčykaŭ, raspaŭsiudžvańniu takich arhanizmaŭ mahło spryjać źmianieńnie klimatu.
Ciapier čytajuć
U harach Kyrhyzstana z drona adšukali cieły źnikłych biełaruskich alpinistaŭ8
Kamientary