U Aŭstralii ŭsie sočać za ciuleniem, jaki rehularna źniščaje darožnyja konusy. Navukoŭcy tłumačać, čamu
Piacihadovy ciuleń pa mianušcy Nił staŭ sapraŭdnaj zorkaj aŭstralijskich sacsietak. Videa, dzie jon lažyć pasiarod daroh, załazić u dvary abo pluščyć darožnyja konusy, nabirajuć miljony prahladaŭ. Ale, jak tłumačać śpiecyjalisty, usio heta — nie kapryzy žyvioły, a častka naturalnaha pracesu.
Kožny hod Nił viartajecca na plažy kala Chobarta — stalicy aŭstralijskaha štata Tasmanija. Jon naležyć da vidu paŭdniovych marskich słanoŭ (Mirounga leonina) — najbujniejšych ciuleniaŭ na płaniecie, jakija atrymali svaju nazvu dziakujučy vialikim pamieram i charakternamu «chabatku» ŭ samcoŭ. Mienavita tut Nił prachodzić siezonnuju lińku: pazbaŭlajecca staroj poŭści i vierchniaha słoja skury.
Za apošni hod Nił prykmietna vyras. Jak piša Science Alert sa spasyłkaj na acenki Departamienta pryrodnych resursaŭ i navakolnaha asiarodździa Tasmanii, ciapier jon važyć kala adnoj tony. Kaliści maleńkaje dziciania było vyšynioj prykładna z darožny konus, a ciapier lohka jaho źniščaje. I robić heta rehularna.
Niahledziačy na svaje pamiery, Nił davoli sprytna pieramiaščajecca pa navakolli. Za apošnija hady jaho nieadnarazova znachodzili śpiačym prosta na darozie, u pryvatnych dvarach, kala damoŭ i aŭtamabilaŭ. Kali niešta pryciahvaje jaho ŭvahu, jon lohka praciskajecca praz aharodžy i navat moža z razhonu ŭrezacca ŭ dźviery haspadarčych pabudoŭ.
Asablivuju luboŭ Nił maje da darožnych konusaŭ. Kali ciuleń zasynaje ŭ hramadskich miescach, supracoŭniki aharodžvajuć jaho jarkimi płastykavymi znakami. Ale vielmi chutka jany akazvajucca pad jaho ciełam. Časam Nił kładzie na ich hałavu abo padsoŭvaje pad łasty.
Navukoŭcy kažuć, što ŭ hetym niama ničoha dziŭnaha. Padčas lińki marskija słany imknucca ciercisia ab roznyja pradmiety, kab chutčej pazbavicca staroj skury. Tamu konusy, aharodžy i inšyja pieraškody stanoviacca dla Niła svojeasablivymi časałkami.
Papularnaść ciulenia raście hetak ža chutka, jak i jon sam. Jahonaja aŭdytoryja ŭ TikTok užo dasiahnuła 1,7 miljona padpisčykaŭ, a pahladzieć na Niła ŭžyvuju pryjazdžajuć sotni ludziej.
Adnak śpiecyjalisty papiaredžvajuć, što z uzrostam marskija słany stanoviacca bolš terytaryjalnymi i mohuć pavodzić siabie ahresiŭna. Tamu supracoŭniki pryrodaachoŭnych słužbaŭ uvažliva sočać za Niłam i pry nieabchodnaści pieramiaščajuć jaho dalej ad daroh i inšych niebiaśpiečnych miescaŭ. Jany padkreślivajuć, što hetyja mietady nie škodziać žyviole.
Turystaŭ i miascovych žycharoŭ prosiać nie nabližacca da Niła bližej čym na 20 mietraŭ. Nazirać za samym viadomym ciuleniem Tasmanii lepš zdalok — navat kali ŭ internecie jon vyhladaje vielmi miła.
Kamientary