«Lidbir» viartajecca ŭ zvykłym farmacie. Chedłajnierkaj budzie Julija Savičava

Apošnija hady los adnaho z bujniejšych muzyčnych fiestyvalaŭ Biełarusi «Lidbir» składvaŭsia davoli dramatyčna.

Nahadajem: pieršy fiestyval «Lidbir» prajšoŭ u 2015 hodzie. Jon staŭ svojeasablivaj vizitoŭkaj Lidy. Chedłajnierami ŭ roznyja hady stanavilisia «Bi-2», «Čajf», «Akijan Elzy» i inšyja papularnyja hurty. Arhanizatary paviedamlali, što kolkaść haściej śviata dasiahała 130 tysiač čałaviek.

Składanyja časy dla mierapryjemstva pačalisia razam z pandemijaj — byli try hady admien i pieranosaŭ. U 2023 hodzie «Lidbir» usio ž adbyŭsia. Ale, jak kažuć, heta było ŭžo zusim nie toje: zamiest papularnych hurtoŭ arhanizatary dali scenu roznym kavier-bendam i praŭładnym artystam kštałtu Skynet. Nie abyšłosia biez zatrymańniaŭ.

Letaś ułady Lidy ŭvohule zajavili pra hłabalny rebrendzinh mierapryjemstva. Jaho vyrašyli zrabić bolš padobnym da taho, jak tradycyjna prachodzić dzień horada ŭ lubym biełaruskim rajcentry: tematyčnyja stendy roznych pradpryjemstvaŭ, nie nadta aryhinalnyja fotazony z bulbaj dy morkvaj, a taksama dzieci z čyrvona-zialonymi ściahami na ščočkach.

Navat nazvu źmianili — z «Lidbir» na «CharčFest». A chedłajnieram fiestyvalu stała Volha Buzava, jakaja nie tolki śpiavaje prapahandysckija pieśni, ale jašče i nabyvaje dla rasijskich sałdat ryštunak.

I novaja nazva, i hałoŭnaja hierainia śviata vyklikali chvalu chejta i abureńnia ŭ sacyjalnych sietkach. Adnak usie kvitki na «CharčFest» pradali, a sama Buzava potym zajaviła, što na jaje vystup sabrałasia 100 tysiač čałaviek.

Imavierna, pryčyna była ŭ tym, što letaś hałoŭny sponsar iventa — kampanija «Lidskaje piva» — značna źmienšyŭ svoj finansavy ŭdzieł. Tamu rabić pryjšłosia toje, na što ŭ miascovych uładaŭ chapiła hrošaj.

Sioleta ž na sajcie «Lidbira» paznačana, što ludziej z roznymi muzyčnymi hustami znoŭ źbiraje mienavita «Lidskaje piva».

Adbudziecca fiestyval 13 vieraśnia. Pieršyja kvitki na hała-kancert pradavalisia pa canie 60 rubloŭ, a VIP-kvitki — 195 rubloŭ. Ciapier ža ceny vyraśli: za zvyčajny kvitok pryjdziecca zapłacić amal 80 rubloŭ i 215 rubloŭ za VIP. Aŭtobusy ź Minska kaštujuć 165 rubloŭ.

Pavialičyć

Chedłajnierkaj «Lidbira» stanie rasijskaja śpiavačka Julija Savičava. Arhanizatary pišuć, što heta «pop-ikona, jakaja daść rok na našaj scenie».

Artystka znachodzicca ŭ bazie ŭkrainskaha «Miratvorca» za toje, što vystupała ŭ akupavanym Rasijaj Krymie ŭ 2015 hodzie. Rasijskija ŚMI prypisvali Julii frazu: «Krym naš!», jakuju jana byccam by skazała padčas taho vizitu. Ale śpiavačka heta abviarhała i kazała, što sama jana — apalityčny čałaviek.

Pazicyja Savičavaj nakont vajny va Ukrainie vyhladaje jak «pa-za palitykaj»: 24 lutaha 2022 hoda jana ŭ svaim telehram-kanale apublikavała sumny smajlik, a praz tydzień napisała tam: «Usim pryvitańnie. Bačycie, mnie spatrebiŭsia tydzień, kab bolš-mienš adyści ad šoku. Ja całkam syšła ŭ studyjnuju pracu nad novym mini-albomam i spadziajusia, usio atrymajecca. Davajcie z vami damovimsia — ja nie zakryvaju kamientary, a vy abiacajecie mnie być takimi ž dobrymi i adekvatnymi maimi słuchačami, takimi, jakija vy ŭ mianie i jość. Vielmi vas pra heta prašu».

Niejtralitetu imkniecca prytrymlivacca i Anton Tokaraŭ, jaki taksama vyjdzie na scenu «Lidbira». A voś viadučy i śpiavak Alaksandr Pušny (jašče adzin udzielnik fiestyvalu) u svoj čas adkryta nazyvaŭ aneksiju Kryma «pieramohaj Pucina» i «adnaŭleńniem histaryčnaj spraviadlivaści». Paśla pačatku paŭnamaštabnaj vajny jon vykłaŭ storys: «Nie vajnie!» — i na hetym skončyŭ.

Rasijski hurt The Hatters, jaki taksama siarod chedłajnieraŭ, u 2022 hodzie byli suprać vajny, ale chutka pazicyju źmianili. Ciapier jany aktyŭna hastralujuć — u tym liku, i ŭ akupavanym Krymie.

Ź biełarusaŭ siarod zorkavych udzielnikaŭ paznačany indy-rok hurt «Barysaŭski trakt».

Darečy, ceny na arendu žylla ŭ Lidzie ŭžo pajšli ŭhoru: kali zvyčajna tut za trochpakajoŭku prosiać 60-70 rubloŭ, to ŭ noč «Lidbira» — 400.

• 0
• 1
• 2
• 11
• 1
• 1
• 3
• 0