«Vialikaja savieckaja armija pieramahaje małuju savieckuju armiju». USU stali prajhravać na poli boju paśla viartańnia da starych praktyk
U pieršy hod paśla ŭvarvańnia Rasii ŭkrainskaja armija zmahła pierałamać situacyju dziakujučy novaj taktycy, zapazyčanaj u NATA: kamandziry na miescach sami prymali rašeńni, jak vykonvać zadačy, dziejničali nievialikimi mabilnymi hrupami, vykarystoŭvali drony i hranatamioty, kab bić pa rasijskich kałonach i padraździaleńniach. Heta dapamahło spynić nastup na Kijeŭ i vyzvalić pałovu terytoryj, zachoplenych u 2022 hodzie. Ale paśla USU znoŭ stali viartacca da savieckich praktyk, piša The Wall Street Journal, pahavaryŭšy z mnohimi ŭkrainskimi sałdatami i aficerami.
Pa miery zaciahvańnia vajny i z-za deficytu kadraŭ u kiraŭnictva vojskam viarnulisia aficery savieckaj škoły, a razam ź imi — žorstkaja centralizavanaja sistema kamandavańnia.
Zamiest hnutkaści i davieru da padnačalenych znoŭ stali panavać zahady «źvierchu», niaredka biez uliku realnaj situacyi i ryzyki dla žyćcia sałdat.
Kapitan Alaksandr Šyršyn z 47-j miechanizavanaj bryhady publična aburyŭsia «durnymi» zahadami i naviazvańniem strachu pierad hienierałami, jakija ŭmiejuć tolki karać. Jaho padraździaleńnie nieadnarazova niepradumana adpraŭlali ŭ ataki, u tym liku ŭ Kurskuju vobłaść, dzie ich užo čakali hatovyja da hetaha rasijskija vojski.
Major Alaksiej Pastarnak raskazaŭ, što padčas niaŭdałaha kontrnastupleńnia na poŭdni Zaparožskaj vobłaści ŭ 2023 hodzie štabnyja hienierały pa radyjosuviazi kryčali navat na siaržantaŭ u akopach, patrabujučy iści ŭ ataki znoŭ i znoŭ, choć padraździaleńni ŭžo hublali bajazdolnaść z-za vialikich strat.
Jon nahadaŭ, što ŭ 2022 hodzie ŭ Vialikabrytanii vyvučaŭ kancepcyju NATA «kiravańnie vykanańniem bajavoj zadačy» — kali staršyja kamandziry staviać metu, a kamandziry na miescach sami vyrašajuć, jak jaje dasiahnuć. Heta całkam supiarečyć savieckamu mietadu kamandavańnia.
Ale ciapier, pavodle jaho, u USU hety padychod amal źnik, za vyklučeńniem niekalkich bryhad. Bolšaść ža kamandziraŭ dziejničaje pa savieckich pryncypach i nie daviaraje padnačalenym.
Niekatoryja sałdaty i aficery pierachodziać z rehularnych čaściej u bolš niezaležnyja farmavańni, jak, naprykład, bataljon «Vaŭki Da Vinčy», jaki dziejničaje praktyčna aŭtanomna, žyvie na dobraachvotnyja achviaravańni i viadomy bieražlivym staŭleńniem da svaich bajcoŭ.
Doŭhaja i kryvavaja abarona Bachmuta (dzieviać miesiacaŭ) stała simvałam žorstkich zahadaŭ biez uliku strat. Za heta ciapierašni hałoŭnakamandujučy Alaksandr Syrski atrymaŭ mianušku «miaśnik». Jon ža sam tłumačyć, što abarona horada dazvoliła strymać vialikija siły Rasii i nanieści im značnyja straty.
Apieracyja ŭ Kurskaj vobłaści ŭ žniŭni 2024 hoda pačałasia paśpiachova i padniała bajavy duch, ale kali supraćstajańnie zaciahnułasia, to situacyja pahoršyłasia. Zimoj rasijskija vojski atrymali padmacavańnie, u tym liku bolš za 10 tysiač paŭnočnakarejskich sałdat. Ukrainski kantynhient apynuŭsia ŭ ciažkim stanoviščy, ale kiraŭnictva nie žadała ni źmianiać taktyku, ni adstupać. Kali ž adstupleńnie ŭsio ž pačałosia, jano prajšło chaatyčna: asnoŭnyja šlachi byli pierarezanyja rasijskimi dronami, a darohi — zavalenyja zahinułymi i źniščanaj technikaj.
Padpałkoŭnik Siarhiej Kastyšyn, atrymaŭšy raźvieddanyja pra namiery rasijan abyjści jahony bataljon, vyvieŭ ludziej ź niebiaśpiečnaj pazicyi, choć byli zahady zastavacca. Za heta suprać jaho raspačali śledstva, ale ŭ vyniku apraŭdali i pavysili da namieśnika kamandzira bryhady.
Alaksandr Šyršyn taksama padavaŭ raparty z apisańniem prablem i prapanoŭ pa ich vyrašeńni, ale, jak śćviardžaje, jany ihnaravalisia.
Kamandavańnie USU ŭ adkaz na krytyku zajaŭlaje, što zachavańnie žyćciaŭ sałdat dla jaho źjaŭlajecca hałoŭnym pryjarytetam. U 2024 hodzie, pa słovach ukrainskaha Hienštaba, Alaksandr Syrski pačaŭ reformy, nakiravanyja na palapšeńnie padrychtoŭki, šyrejšaje vykarystańnie bieśpiłotnikaŭ i analiz bajavoha dośviedu dla źnižeńnia strat.
Nie mienš za 12 zamiežnych dobraachvotnikaŭ zahinuli padčas lipieńskaha ŭdaru pa vučebnym łahiery va Ukrainie
Rasijskaja armija prarvała pad Dabrapollem apošniuju kapitalnuju liniju abarony Danbasa
Ukrainskija vajskoŭcy vyzvalili siało ŭ Sumskaj vobłaści, jakoje miesiac było pad akupacyjaj
Połk Kalinoŭskaha bolš nie biare ŭdziełu ŭ šturmach. Čamu tak?
U ZŠA nazvali piać mahčymych scenaryjaŭ zakančeńnia vajny va Ukrainie
U archivach SBU znajšlisia dakumienty, jak savieckija śpiecsłužby zavierbavali emisara AUN, ale ŭkrainskaje padpolle heta vykryła i zabiła zdradnika88
Kamientary