Svajaki achviar teraktaŭ 11 vieraśnia vystupili suprać udziełu ńju-jorkskaha mera-musulmanina ŭ žałobnaj cyrymonii
Vakoł cyrymonii pamiaci, pryśviečanaj 25‑j hadavinie trahiedyi na miescy razburanych viežaŭ-bliźniat, razharajecca palityčny skandał: mera Ńju-Jorka Zochrana Mamdani nie žadajuć bačyć na hetym mierapryjemstvie, piša Bild.
Džavani Hałante, žonka jakoha zahinuła ŭ vyniku teraktaŭ «Al-Kaidy» va ŭzroście 29 hadoŭ, staŭ adnym ź inicyjataraŭ pietycyi suprać udziełu Mamdani. Pavodle źviestak hrupy, za karotki čas inicyjatyva sabrała bolš za 1100 podpisaŭ, u tym liku podpisy jak minimum 300 svajakoŭ zahinułych 11 vieraśnia.
«Hety dzień dla nas śviaty», — zajaviŭ Hałante. Pavodle jaho słoŭ, prysutnaść Mamdani była b «hłyboka abraźlivaj i niedarečnaj — niby źjaŭleńnie niaprošanaha hościa na vielmi asabistaj cyrymonii».
U pietycyi Mamdani krytykujuć za admovu biezahavoračna asudzić łozunh «Hłabalizavać intyfadu». Praciŭniki hetaj frazy rasceńvajuć jaje jak zaklik da hvałtu ŭ dačynieńni da jaŭrejaŭ. Akramia taho, u pietycyi zhadvajucca minułyja suviazi Mamdani z asobami, jakich ličać ekstremistami. U pryvatnaści, havorka idzie pra jaho kantakty ź imamam Siradžam Vachchadžam. Hety skandalna viadomy ńju-jorkski relihijny dziejač adstojvaje ideju pieravahi isłamu nad demakratyjaj i ličyć palityku ZŠA ŭ dačynieńni da Izraila «najvialikšaj pahrozaj dla Amieryki».
Arhanizatary pietycyi spadziajucca, što haradskija ŭłady i kiraŭnictva niekamiercyjnaj arhanizacyi «Miemaryjał i muziej 11 vieraśnia» nie dapuściać Mamdani da ŭdziełu ŭ cyrymonii na Hraŭnd-Ziero — miescy, dzie raniej stajali viežy-bliźniaty. Pavodle słoŭ pradstaŭnika Mamdani, sam jon u lubym vypadku maje namier prysutničać na žałobnaj cyrymonii.
Kamientary
A zaraz vinavatym robiać maładoha mera Ńju-Jorka? Časam zdajecca, što šerahovyja amierykancy sapraŭdy takija, jak ich Zadornaŭ nazyvaŭ padčas svaich vystupaŭ.