Nie mienš za 12 zamiežnych dobraachvotnikaŭ zahinuli padčas lipieńskaha ŭdaru pa vučebnym łahiery va Ukrainie
Prynamsi 12 zamiežnych dobraachvotnikaŭ USU z ZŠA, Kałumbii, Tajvania, Danii i inšych krain zahinuli ŭ vyniku rasijskaha ŭdaru pa stałovaj u navučalnym łahiery kala Krapiŭnickaha Kiravahradskaj vobłaści 21 lipienia, piša The New York Times.
Naprykancy lipienia va Ukrainie adbyŭsia adzin z samych śmiarotnych udaraŭ pa zamiežnych dobraachvotnikach za ŭvieś čas vajny.
Pavodle źviestak NYT, rasijskaja rakieta trapiła ŭ stałoŭku vučebnaha łahiera kala Krapiŭnickaha ŭ čas abiedu, zabiŭšy prynamsi dvanaccać zamiežnych rekrutaŭ i paraniŭšy bolš za sotniu čałaviek.
Ukrainskaje vojska paćvierdziła fakt udaru i najaŭnaść zabitych i paranienych, ale nie ŭdakładniła detali. Siarod zahinułych byli dobraachvotniki z ZŠA, Kałumbii, Tajvania, Danii i inšych krain. Pavodle apisańnia adnaho z amierykanskich dobraachvotnikaŭ, vybuch byŭ nadzvyčaj mocny, abłomki raźlacielisia pa terytoryi, a uzharańnie na składach bojeprypasaŭ vyklikała sieryju druhasnych vybuchaŭ. «Vybuch byŭ samym hučnym, jaki ja kali-niebudź čuŭ», — skazaŭ jon.
Paśla ŭdaru na miescy zastalisia zabityja, ciažkaparanienyja i razburanyja pabudovy.
Mnohim bajcam akazvali pieršuju dapamohu na miescy i evakuiravali ich u špitali pryvatnym transpartam i «chutkimi». Pavodle śviedčańniaŭ, pavietranaja tryvoha pierad atakaj nie abviaščałasia.
Achviary słužyli ŭ mižnarodnym lehijonie vajennaj raźviedki Ukrainy (HUR) abo ŭ rehularnych častkach vojska. Z pačatku poŭnamaštabnaha ŭvarvańnia praz hety łahier, viadomy jak Camp Krop, prajšli sotni zamiežnych bajcoŭ.
Heta nie pieršy śmiarotny ŭdar pa zamiežnych rekrutach. U sakaviku 2022 hoda rasijskija rakiety trapili ŭ vučebnuju bazu ŭ Javaryvie (blizka da polskaj miažy), zabiŭšy i paraniŭšy dziasiatki ludziej.
Hałoŭnakamandujučy USU Alaksandr Syrski zajaviŭ, što asabovy skład pavinien adrazu reahavać na sihnały pavietranaj tryvohi i varožyja bieśpiłotniki, a treniroŭki buduć pravodzicca pad ziamloj, kali heta mahčyma.
Amierykanski rekrut, jaki znachodziŭsia na bazie mienš za tydzień i jašče nie atrymaŭ zbroi, pryznaŭsia, što chacia i byŭ hatovy da ryzyki na froncie, nie čakaŭ, što ludzi buduć hinuć padčas navučańnia.
Ciapier čytajuć
«Čaściej za ŭsio žučok staviać niedaloka ad razietak». Jak siłaviki prasłuchoŭvajuć biełarusaŭ pa telefonie i ŭ kvaterach8
Kamientary