Dla biznesu źbirajucca pryniać novy zakon. U internecie jaho traktujuć jak abmiežavańnie dla «biehłych», ale sens źmien u inšym

Parłamient ciapier razhladaje prajekt zakona «Ab dziaržaŭnaj rehistracyi i likvidacyi (spynieńni dziejnaści) subjektaŭ haspadarańnia». Prapanujuć źmianić nastupnaje — udzielniku tavarystva z abmiežavanaj adkaznaściu, kab vyjści z kampanii, treba budzie padavać zajavu ab vychadzie nataryusu. Raniej zajava padavałasia dyrektaru.

U internecie źjaviłasia mierkavańnie, što hetyja praŭki (ich jašče nie pryniali ŭ druhim čytańni) źbirajucca ŭvieści, kab uskładnić žyćcio biznesoŭcam za miažoj, jakija nie mohuć viarnucca ŭ krainu i asabista padać takuju zajavu. Ale sens zakona ŭ inšym.

U Biełarusi dziejničaje prosty sposab vychadu sa składu zasnavalnikaŭ kampanii: patrabujecca tolki prynieści dekłaratyŭnuju zajavu dyrektaru, jaki na jaje padstavie ŭniasie źmieny ŭ statut i zarehistruje ich u vykankamie.

Sam bienieficyjar — kali jon tolki adnačasova nie dyrektar — nie maje na heta paŭnamoctvaŭ.

Adpaviedna, ad vykanalnaści dyrektara zaležyć, jak chutka hetyja źmieny buduć aformleny.

I tut uźnikaje tonki momant i prastora dla raznastajnych złoŭžyvańniaŭ. Ujavim sabie situacyju, što ŭ kampanii ź niekalkimi zasnavalnikami biznes nie pajšoŭ uharu i paŭstała pytańnie subsidzijarnaj adkaznaści (inšymi słovami — vypłat pa daŭhach kampanii, jakija mohuć być pierakładzienyja na kankretnych fizičnych asob-zasnavalnikaŭ, kali ŭ kampanii nie chapaje ŭłasnych srodkaŭ i majomaści dla raźliku). 

Niekatoryja zasnavalniki mohuć rašyć kinuć partnioraŭ šlacham ucioku z tonučaha biznesu, pakul jašče jość takaja mahčymaść — navat plunuŭšy na hrošy ad acenki ich doli.

Adpaviedna, u taho, chto kantraluje dyrektara, jość instrumient dla pryznačeńnia adkaznaha za ŭsie straty: dyrektar prosta zarehistruje vychady ź biznesu adnych, a druhich — nie, navat kali jany zachočuć zrabić toje ž samaje.

Moža być i inšaja situacyja, kali adzin z zasnavalnikaŭ pa svaich pryčynach choča vyjści ź biznesu — naprykład, jon trapiŭ tudy prosta jak naminał pa damoŭlenaści, abo kampanija pačała zajmacca rečami, jakija nie padabajucca adnamu z zasnavalnikaŭ — a jaho nie vypuskajuć. Praz vusny zahad dyrektaru možna nie rehistravać źmieny i ihnaravać zajavu.

Možna ŭjavić i treciuju situacyju, kali akcyjaniera praz kantralavanaha dyrektara vykidvajuć ź biznesu z nahody nibyta isnujučaj zajavy, a jamu potym pryjdziecca niamała pastaracca, kab dakazać niezakonnaść hetaha rašeńnia.

Heta ŭsio nie vielmi častyja, ale ŭsio ž isnujučyja ŭ biełaruskaj biznes-praktycy situacyi. 

Razumiejučy heta, biznes-supolnaść stała stavić pytańnie zakryćcia hetaj dzirki ŭ praktycy zadoŭha da padziej 2020-ha. Pieršyja abmierkavańni patrebnych źmien adbylisia jašče ŭ 2019-m. 

Vidavočnaje rašeńnie było ŭ tym, kab uvieści ŭ schiemu treci niezaanhažavany bok — nataryusa. Na jaho niemahčyma nacisnuć, jaho rabota — zarehistravać žadańnie adnaho z zasnavalnikaŭ vyjści i piśmova apaviaścić ab im tavarystva i rehistrujučyja orhany. 

Ciapier akcyjanier pavinien budzie nieści zajavu jamu, a nie dyrektaru. 

Urešcie, vizit da nataryusa nie pavinien być asabistym. Navat kali suzasnavalnik žyvie za miažoj i nie moža źjavicca asabista, padać zajavu nataryusu zmoža pradstaŭnik pa davieranaści.

Takim čynam, možna ŭjavić vielmi mała situacyj, u jakich pryniaćcie hetaha zakona možna naškodzić palityčnym emihrantam. Dla hetaha pavinna supaści šmat redkich abstavin adnačasova:

— suakcyjanier pražyvaje za miažoj i nie moža viarnucca;

— choča vyjści ź biznesu pa ŭłasnaj voli, a nie praz prodaž doli;

— nie maje davieranaści na svajakoŭ ci inšaha pradstaŭnika;

— nie moža abo nie maje na kaho zrabić davieranaść u inšaj jurysdykcyi; 

— nie maje kamu fiktyŭna pradać svaju dolu, kab užo druhi čałaviek padaŭ zajavu nataryusu jak novy akcyjanier. 

• 3
• 0
• 0
• 0
• 0
• 0
• 0
• 0