Sakretnaje dziaržaŭnaje apytańnie 2020 hoda — Babaryka pierad aryštam dahnaŭ Łukašenku pa rejtynhu

Juryst i były palitźniavoleny Juraś Ziankovič apublikavaŭ u svaim błohu nieviadomyja raniej vyniki dziaržaŭnych sacyjałahičnych daśledavańniaŭ, praviedzienych u 2020 hodzie.

Jon pabačyŭ ich u 23-m tomie svajoj kryminalnaj spravy ab sprobie «zachopu ŭłady» (staronki 226-229). Jak tłumačyć Ziankovič, abvinavačvańnie vyrašyła dakazać, što Łukašenka karystajecca šyrokaj padtrymkaj». Dla hetaha byŭ dasłany zapyt u Instytut sacyjałohii Akademii navuk Biełarusi z prośbaj padzialicca vynikami apytańniaŭ, jakija raniej nie publikavalisia.

Pavialičyć

U kamientary «Našaj Nivie» Ziankovič dadaŭ, što pytaŭsia ŭ śledčaha ab tym, navošta jon uvohule vykarystaŭ hetu statystyku, kali pazicyju ab vialikim daviery biełarusaŭ da Łukašenki jana nie padtrymlivaje. Toj patłumačyŭ, što pa zakonie pavinien padšyvać u kryminalnuju spravu luby dakumient, jaki da jaho traplaje.

I Ziankovič, i inšy abvinavačany pa toj ža spravie ab «zachopie ŭłady» Alaksandr Fiaduta na sudzie vykarystoŭvali hetyja ličby ŭ svaju abaronu. «Ale sud byŭ hulnioj u adnu bramku, tamu nichto na heta ŭvahi nie źviarnuŭ», — skazaŭ Ziankovič.

U apytańni, jakoje prachodziła ŭ mai-červieni 2020 hoda ŭ vyhladzie asabistych intervju z 1130 respandentami, byli nastupnyja vyniki:

• Łukašenka — 15,4%
• Babaryka — 15,0%
• Cichanoŭskaja — 5,4%
• Capkała — 3,8%
• Suprać usich — 5,4%
• Nie ŭdzielničaju — 3,5%
• Nie vyznačyŭsia — 46,1%.

Pakazalna, što kala pałovy respandentaŭ nie dali dziaržaŭnym sacyjołaham nijakaha adkazu. Ale siarod tych, chto vyznačyŭsia, padtrymka Alaksandra Łukašenki i Viktara Babaryki była amal adnolkavaja — pa 15%.

Jašče adno apytańnie prajšło troški raniej, u mai 2020 hoda. Jano pravodziłasia pa telefonie, u im udzielničali 600 respandentaŭ. Vyniki akazalisia takija:

• Łukašenka — 26,6%
• Capkała — 1,7%
• Babaryka — 1,4%
• Suprać usich — 8,1%
• Inšy — 12,5%
• Nie chaču kazać — 13,7%
• Nie vyznačyŭsia — 35,5%.

Nieviadoma, u jakija dni maja 2020 hoda jano prachodziła — bo toj ža Babaryka abviaściŭ pra svaje prezidenckija ambicyi tolki 12 maja 2020 hoda. Mahčyma, što adrazu paśla pačatku prezidenckaj kampanii, kali jaho papularnaść jašče była na minimalnym uzroŭni, a paśla stała narastać jak śniežny kom. Cichanoŭskija ŭ tym pieršym apytańni ŭvohule nie zhadvalisia.

Były dyrektar Instytuta sacyjałohii Akademii navuk Hienadź Koršunaŭ u kamientary «Našaj Nivie» adznačyŭ, što takija daśledavańni ŭ Instytucie sapraŭdy pravodzilisia. Ale jon dadaŭ, što kankretnyja vyniki spraŭdzić zaraz nie maje mahčymaści.

Zaŭvažna, što pa vynikach telefonnaha apytańnia Łukašenka mieŭ padtrymki amal udvaja bolš.

«U telefonnych apytańniach pa Biełarusi zaŭsiody ŭzrovień strachu byŭ značna vyšejšy, navat da revalucyi», — tłumačyć hety niuans sacyjołah. 

U červieni 2020 hoda Koršunaŭ paćviardžaŭ, što ŭ sakaviku-krasaviku, da pačatku prezidenckaj kampanii, uzrovień davieru Łukašenku ŭ Minsku składaŭ 24%.

Kali ŭ kancy maja 2020 hoda rejtynh Viktara Babaryki ŭ internet-hałasavańniach pieravaliŭ za 50%, a padtrymka Łukašenki źmienšyłasia da 3-6%, biełaruskim ŚMI zabaranili internet-apytańni. Tady i naradziŭsia lehiendarny miem «Saša 3%».

Čytajcie:

Aficyjnaja sacyjałohija: rejtynh davieru Łukašenku ŭ Minsku — 24%, Jarmošynaj — 11%

Biełaruskim ŚMI zabaranili pravodzić internet-apytańni ab rejtynhu Łukašenki

• 18
• 0
• 10
• 4
• 2
• 1
• 0
• 0