Zasnavany biełarusam startap źbirajecca kupić Google Chrome za $34,5 młrd
Pavodle The Wall Street Journal, kampanija Perplexity, jakaja zajmajecca raspracoŭkaj štučnaha intelektu, zajaviła pra hatoŭnaść nabyć Chrome za 34,5 młrd dołaraŭ — sumu, što značna pieravyšaje ŭłasnuju acenku Perplexity ŭ 18 młrd dołaraŭ.
Vosieńniu 2024 hoda Ministerstva justycyi ZŠA pryznała Google manapalistam i dapuściła mahčymaść padziełu kampanii. Siarod mier razhladajecca prymusovy prodaž braŭziera Chrome, abaviazak dzialicca danymi z kankurentami i abmiežavańnie vypłat za prava być pošukavaj sistemaj pa zmaŭčańni na pryładach i ŭ braŭzierach.
Jak adznačaje Bloomberg, patrabavańnie pradać Chrome moža stać častkaj antymanapolnaj spravy suprać Google, a prapanova Perplexity moža słužyć sihnałam sudu ab najaŭnaści zacikaŭlenaha pakupnika.
Svaju zacikaŭlenaść u kupli Chrome taksama vykazvali Yahoo i OpenAI. Acenki koštu Chrome vahajucca ad 20 da 50 młrd dołaraŭ.
Chrome siońnia maje kala 3,5 młrd karystalnikaŭ pa ŭsim śviecie i zajmaje bolš za 60% suśvietnaha rynku braŭzieraŭ. U Google śćviardžajuć, što prymusovy prodaž «vychadzić daloka za miežy pravavych pytańniaŭ» i paškodzić spažyŭcam.
Kampaniju Perplexity zasnavaŭ uradženiec Homiela Dzianis Jarac sumiesna z partniorami ŭ ZŠA. Perplexity zapuścili ŭ 2022 hodzie, a ŭ 2024-m prajekt staŭ adnym z samych darahich maładych startapaŭ. Niadaŭna jaho acanili ŭ 18 miljardaŭ dołaraŭ.
Dniami stała viadoma, što Perplexity stvaryła dla sacsietki Donalda Trampa Truth Social pašukavik Truth Search AI, jaki pracuje na asnovie štučnaha intelektu.
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary
[Zredahavana]
Pišuć, što hety ŠI padaje tolki "respublikanski" punkt pohladu, ŭ jakaści krynic časta pryvodzić tolki Fox News. (Što štučnamu intelektu daŭ pačytać, toje jon i raskazvaje).
Ale karystalniki, jak zaŭsiody, pasprabavali złamać łohiku i ŭ ich, kaniešnie, atrymałasia. Bot adkazvaje, što taryfnaja palityka Trampa nie daje vynikaŭ i što Barak Abama - lepšy prezident.
Markuju, navat kali vypraviać i naładziać toj ŠI, jamu budzie ciažka, bo Tramp i tak supiarečyć sam sabie.
Jašče vobłačny pravajder Cloudflare skardzicca na toje, što Perplexity nielehalna skrejpiŭ (źbiraŭ usie teksty i danyja) na sajtach jaho infrastruktury, paraŭnoŭvaje jaho z paŭnočna-karejskimi chakierami.
U jakaści post-mieta-błabła-ironii: Cichanoŭskamu treba nie jechać u ZŠA, a damaŭlacca z homielskimi, kab skarmili trampaŭskamu štučnamu intelektu dźvie-try pravilnyja idei pra Biełaruś :)