Jak ciapier dabracca ź Minska da Vilni, kali pramych rejsaŭ stała ŭ razy mienš?

Jakija rejsy admianili

Paviedamleńni pra admienu rejsaŭ pačali źjaŭlacca ad paniadziełka 10 žniŭnia. 

Prynamsi na 12 i 13 žniŭnia bujny pieravozčyk «Jeŭrałajns» admianiŭ 20 rejsaŭ z 26 pamiž Biełaruśsiu i Litvoj. «Minsktrans» z 14 žniŭnia prypyniaje try rejsy pa maršrucie.

Heta pryviało da deficytu biletaŭ. Pa stanie na 12:30 aŭtorka 12 žniŭnia, na servisie Atlas bližejšyja kvitki ź Minska ŭ Vilniu možna było nabyć tolki z vyjezdam u nastupny aŭtorak 19 žniŭnia. Košt bileta — 220 rubloŭ.

Na sajcie Ecolines bližejšyja kvitki jość z vyjezdam ź Minska na 17 žniŭnia. Košt bileta — 65 jeŭra. 

Bilety na aŭtobus Minsk — Koŭna taksama možna nabyć nie raniej, čym na 17 žniŭnia.

Z vyjezdam z Hrodna — jašče składaniej. Bližejšyja kvitki jość tolki na 24 žniŭnia.

Jakaja jość alternatyva, kali treba terminova trapić u Litvu?

Varyjantaŭ nasamreč nie tak šmat, pakolki razam z zakryćciom punktaŭ propusku «Rajharad — Pryvałka» i «Łavaryški — Katłoŭka» z 1 sakavika 2024 hoda Litva zabaraniła pierasiakać miažu pieššu, na rovarach i samakatach.

Paźniej, z krasavika 2025 hoda, litoŭski bok zabaraniŭ pierasiakać miažu na matacykłach i inšych transpartnych srodkach, akramia lehkavych aŭto.

Siarod varyjantaŭ trapić u Litvu, kali kvitkoŭ na aŭtobus nie dastać, — šukać «šerych» pryvatnych pieravozčykaŭ u čatach abo sprabavać padsieści da kahości ŭ čarzie.

Prynamsi pakul možna znajści pieravozčykaŭ na mikraaŭtobusach, jakija biaruć pa 60 jeŭra za pajezdku pa maršrucie Minsk — Vilnia, što prykładna stolki ž, kolki i kvitok na zvyčajny aŭtobus. Ale ŭ takim vypadku daviadziecca stajać u čarzie ź lehkavymi aŭto. Ci nie vyraście cana praz deficyt — nieviadoma.

Letam 2024 hoda, kali paśla skaračeńnia kolkaści rejsaŭ kvitki taksama było niedakupicca, pryvatniki brali pa 100 jeŭra za toje, kab davieźci čałavieka ź Minska ŭ Vilniu, a za toje, kab pieravieźci čałavieka praź miažu na skutary (tady jašče heta było nie zabaroniena) — pa 50 jeŭra.

Varyjant terminova dajechać da Vilni na aŭtobusie praz Łatviju (Ryhu ci Daŭhaŭpiłs) nie spracuje — bo bližejšyja kvitki tolki na pačatak nastupnaha tydnia (na tyja daty jość užo ŭ prodažy i kvitki da Vilni).

U Litvu praz trecija krainy

Siarod alternatyŭnych varyjantaŭ možna nazvać aŭtobus Minsk — Daŭhapiłs — Ryha, ale i na jaho biletaŭ na bližejšyja daty niama (tolki na pačatak nastupnaha tydnia, kali ŭ prodažy jość kvitki i da Vilni).

U Vilniu možna pajechać praz Varšavu. Ź biletami ŭ Polšču prablem niama. Ich možna nabyvać navat u dzień adjezdu, i kaštujuć jany tańniej, čym u Litvu (ad 130 rubloŭ). Ale šlach budzie doŭhi i składany. U tym liku praz toje, što daroha z Varšavy da Vilni zajmaje 7,5—8,5 hadziny, a kupić kvitok (pa cenach ad 40 jeŭra) zahadzia nie atrymajecca, bo nieviadoma, kolki času zojmie prachodžańnie miažy.

Dabracca ŭ Vilniu, jakaja znachodzicca ŭ 30 km ad Biełarusi, možna i praz rasijski Kalininhrad. Dla hetaha treba ŭziać kvitok na ciahnik da Kalininhrada (kvitki na bližejšyja dni kaštujuć ad 297 rubloŭ). Vychodzić ź ciahnika na terytoryi Litvy zabaroniena, tamu ŭ lubym vypadku daviadziecca jechać u Kalininhradskuju vobłaść. I adtul užo dabracca da Vilni.

• 2
• 0
• 2
• 3
• 1
• 1
• 2
• 0