Як цяпер дабрацца з Мінска да Вільні, калі прамых рэйсаў стала ў разы менш?

Якія рэйсы адмянілі

Паведамленні пра адмену рэйсаў пачалі з'яўляцца ад панядзелка 10 жніўня. 

Прынамсі на 12 і 13 жніўня буйны перавозчык «Еўралайнс» адмяніў 20 рэйсаў з 26 паміж Беларуссю і Літвой. «Мінсктранс» з 14 жніўня прыпыняе тры рэйсы па маршруце.

Гэта прывяло да дэфіцыту білетаў. Па стане на 12:30 аўторка 12 жніўня, на сэрвісе Atlas бліжэйшыя квіткі з Мінска ў Вільню можна было набыць толькі з выездам у наступны аўторак 19 жніўня. Кошт білета — 220 рублёў.

На сайце Ecolines бліжэйшыя квіткі ёсць з выездам з Мінска на 17 жніўня. Кошт білета — 65 еўра. 

Білеты на аўтобус Мінск — Коўна таксама можна набыць не раней, чым на 17 жніўня.

З выездам з Гродна — яшчэ складаней. Бліжэйшыя квіткі ёсць толькі на 24 жніўня.

Якая ёсць альтэрнатыва, калі трэба тэрмінова трапіць у Літву?

Варыянтаў насамрэч не так шмат, паколькі разам з закрыццём пунктаў пропуску «Райгарад — Прывалка» і «Лаварышкі — Катлоўка» з 1 сакавіка 2024 года Літва забараніла перасякаць мяжу пешшу, на роварах і самакатах.

Пазней, з красавіка 2025 года, літоўскі бок забараніў перасякаць мяжу на матацыклах і іншых транспартных сродках, акрамя легкавых аўто.

Сярод варыянтаў трапіць у Літву, калі квіткоў на аўтобус не дастаць, — шукаць «шэрых» прыватных перавозчыкаў у чатах або спрабаваць падсесці да кагосьці ў чарзе.

Прынамсі пакуль можна знайсці перавозчыкаў на мікрааўтобусах, якія бяруць па 60 еўра за паездку па маршруце Мінск — Вільня, што прыкладна столькі ж, колькі і квіток на звычайны аўтобус. Але ў такім выпадку давядзецца стаяць у чарзе з легкавымі аўто. Ці не вырасце цана праз дэфіцыт — невядома.

Летам 2024 года, калі пасля скарачэння колькасці рэйсаў квіткі таксама было недакупіцца, прыватнікі бралі па 100 еўра за тое, каб давезці чалавека з Мінска ў Вільню, а за тое, каб перавезці чалавека праз мяжу на скутары (тады яшчэ гэта было не забаронена) — па 50 еўра.

Варыянт тэрмінова даехаць да Вільні на аўтобусе праз Латвію (Рыгу ці Даўгаўпілс) не спрацуе — бо бліжэйшыя квіткі толькі на пачатак наступнага тыдня (на тыя даты ёсць ужо ў продажы і квіткі да Вільні).

У Літву праз трэція краіны

Сярод альтэрнатыўных варыянтаў можна назваць аўтобус Мінск — Даўгапілс — Рыга, але і на яго білетаў на бліжэйшыя даты няма (толькі на пачатак наступнага тыдня, калі ў продажы ёсць квіткі і да Вільні).

У Вільню можна паехаць праз Варшаву. З білетамі ў Польшчу праблем няма. Іх можна набываць нават у дзень ад’езду, і каштуюць яны танней, чым у Літву (ад 130 рублёў). Але шлях будзе доўгі і складаны. У тым ліку праз тое, што дарога з Варшавы да Вільні займае 7,5—8,5 гадзіны, а купіць квіток (па цэнах ад 40 еўра) загадзя не атрымаецца, бо невядома, колькі часу зойме праходжанне мяжы.

Дабрацца ў Вільню, якая знаходзіцца ў 30 км ад Беларусі, можна і праз расійскі Калінінград. Для гэтага трэба ўзяць квіток на цягнік да Калінінграда (квіткі на бліжэйшыя дні каштуюць ад 297 рублёў). Выходзіць з цягніка на тэрыторыі Літвы забаронена, таму ў любым выпадку давядзецца ехаць у Калінінградскую вобласць. І адтуль ужо дабрацца да Вільні.

• 4
• 0
• 2
• 5
• 1
• 3
• 3
• 0