Viciebski zavod radyjodetalaŭ «Manalit» vyrablaje kampanienty dla rasijskaha VPK, u tym liku na abstalavańni ź ES

Z pačatku poŭnamaštabnaha ŭvarvańnia RF va Ukrainu pa sakavik 2025 hoda Viciebski zavod radyjodetalej «Manalit» adpraviŭ rasiejskaj kampanii «Śpiec-elektronkamplekt» tavary ahulnym koštam bolš za 40 miljonaŭ dołaraŭ. Dakumienty, jakija heta paćviardžajuć, BRC atrymaŭ dziakujučy krynicy ŭ łahistyčnaj halinie ŭ miežach sumiesnaha rasśledavańnia z «Radyjo Svaboda» i ŭkrainskim rasśledavalnickim prajektam «Ślidstvo.Info».

AT «Śpiec-elektronkamplekt» abo AT «Śpiec-EK», pavodle rasśledavańnia i-Stories, źjaŭlajecca pastaŭščykom kampanientaŭ mikraelektroniki dla bujnych pradpryjemstvaŭ rasieijskaha VPK. Siarod jaho klijentaŭ, naprykład, NDI «Vektar», jaki raspracoŭvaje sistemy procidziejańnia bieśpiłotnikam i kompleksy radyjoraźviedki.

Bolš za 96% zakupak «Śpiec-EK» ad «VZRD «Manalit» składajuć kieramičnyja kandensatary — klučavy elemient mikračypaŭ. Kandensatary stabilizujuć prachodžańnie praź mikračypy elektryčnaści, nazapašvajučy jaje na vypadak niaznačnych pierabojaŭ u pastupleńni toku. U 2023 hodzie dziaržaŭnaje ahienctva BiełTA śćviardžała, što pradukcyja «VZRD «Manalit» achoplivaje pałovu rynku kandensataraŭ u SND.

Dyrektar biełaruskaha «VZRD «Manalit» Akif Hasymaŭ raskazvaŭ u 2018 hodzie, što asnoŭnyja spažyŭcy pradukcyi zavoda — pradpryjemstvy vajenna-pramysłovaha kompleksa, u pieršuju čarhu rasiejskaha.

Śpiecyjalist Hałoŭnaha ŭpraŭleńnia raźviedki (HUR) Ukrainy paviedamiŭ vydańniu «Ślidstvo.Info», što «VZRD «Manalit» — adziny viadomy jaho viedamstvu bujny vytvorca kandensataraŭ K10-84 u Biełarusi i Rasiei. Pavodle jaho, hetyja madeli kandensataraŭ znachodzili ŭ rakietach S-200 i S-300. «VZRD «Manalit» na svaim sajcie sapraŭdy nazyvaje siabie vytvorcam i raspracoŭščykam hetaj madeli i pieraličvaje hetyja kandensatary siarod svaich najnoŭšych i pierśpiektyŭnych vyrabaŭ.

Jašče adzin śpiecyjalist u elektronicy, jaki słužyć u ZSU i pažadaŭ zastacca ananimnym, u intervju «Radyjo Svaboda» paviedamiŭ, što kandensatary «VZRD «Manalit» znachodziać u askołkach rakiet «Iskander», Ch-101 i «Kalibr», vypuščanych Uzbrojenymi siłami RF pa Ukrainie.

Siarod abstalavańnia «VZRD «Manalit», jakoje traplała ŭ kadry ŚMI, — stanki vytvorčaści słavienskaj kampanii KEKO Equipment Ltd, piečy dla termaapracoŭki niamieckaj kampanii Nabertherm GmbH i japonskaj Pro-face by Schneider Electric (častka francuzskaj karparacyi Schneider Electric SE).

Kantrolny pakiet akcyj «VZRD «Manalit» naležyćrasiejskaj firmie TAA «Kułon», jakaja taksama źjaŭlajecca pastaŭščykom VPK RF. Zavod znachodzicca pad sankcyjami Ukrainy, ale nie pad sankcyjami JEZ.

• 0
• 0
• 0
• 0
• 0
• 0
• 1
• 0