Adzin z samych viadomych futbalistaŭ BATE zaniaŭsia prodažam rovaraŭ
12-razovy čempijon Biełarusi pa futbole, adzin z samych paznavalnych biełaruskich futbalistaŭ Vital Radzivonaŭ u intervju «Biełaruskamu futbołu» raskazaŭ pra svoj biznes.
Vital skončyŭ futbolnuju karjeru ŭ 2018 hodzie, niejki čas pracavaŭ u struktury BATE, potym niekalki miesiacaŭ byŭ načalnikam kamandy «Enierhietyk-BDU», ale ŭ sakaviku 2020 hoda całkam zaviazaŭ z futbołam.
«Praź niejki čas pad ruku trapiła mahčymaść zajmacca handlem spartyŭnymi tavarami, u pryvatnaści rovarami, pradstaŭlać u nas u krainie adzin ź sierbskich brendaŭ. Sabraŭšy peŭnuju infarmacyju pra heta, vyrašyŭ pajści ŭ hetym kirunku. I da hetaha času ŭ hetaj prafiesii. Na siońnia my pradstaŭlajem užo nie adzin viełabrend, a niekalki. A ŭ tavarnaj liniejcy źjavilisia nie tolki rovary, ale i inšyja katehoryi. Na dadzieny momant žyvu hetym», — raskazaŭ Radzivonaŭ «Biełaruskamu futbołu»
Na pytańnie, čamu jon zaniaŭsia nie prodažam futbolnaj atrybutyki, a mienavita rovarami, Radzivonaŭ zaznačyŭ, što byli ludzi, jakija na toj momant padkazali peŭnyja niuansy ŭ hetaj spravie.
Zrešty Vital nie nazyvaje heta biznesam, a nievialikaj spravaj.
«Biznesam heta pakul nazyvać rana, jon pačynajecca z čałaviek 30 u štacie. Nas pakul 15. Tym nie mienš, heta sprava prynosić zadavalnieńnie i abjadnoŭvaje dobrych ludziej pobač, kali kazać pra naš kalektyŭ», — kaža jon.
U jaho kampanii jość roźničnyja kramy i skład. Adčyniłasia druhaja afłajn-krama sa śpiecyjalizacyjaj na motatechnicy, vodamatorycy, elektratransparcie i servisnym absłuhoŭvańni. Rovary i elektratranspart — praśpiekt Pieramožcaŭ 84 — HC «Arena Sici». Mota-, vodamatornaja technika — Kalinoŭskaha 6.
Radzivonaŭ rehularna byvaje na kropkach i navat zdarajecca, što naviedniki paznajuć jaho.
Zdarajecca, što karystajucca jaho pasłuhami byłyja kalehi pa sporcie — Maksim Skavyš, Siarhiej Jaromka, Valeryj Famičoŭ.
Za biełaruskim futbołam Vital sočyć krajem voka. «Tolki dziakujučy tamu, što maju peŭnuju rolu ŭ vyhladzie viadzieńnia futbalistaŭ. Starajusia za im sačyć», — kaža jon.
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary