Vytvorcy charčovych dabavak z beta-karacinam abiacajuć, što jany abaroniać nas ad soniečnych apiokaŭ i adnačasova nadaduć skury lohki zahar. Ale śpiecyjalisty zaklikajuć być uvažlivymi — asabliva tym, chto kuryć.
Beta-karacin — heta pihmient, jaki nadaje morkvie ŭłaścivy jarka-aranžavy koler. Jon prysutničaje taksama ŭ inšych praduktach, takich jak špinat, hrušy ci abrykosy. Beta-karacin źjaŭlajecca najvažniejšym papiarednikam retynołu — vitaminu A, jaki nieabchodny dla zroku, rostu kletak i inšych funkcyj.
Kali vieryć abiacańniam vytvorcaŭ charčovych dadatkaŭ, kapsuły, jakija źmiaščajuć beta-karacin i inšyja karacinoidy, taksama pavinny zabiaśpiečyć naturalnuju abaronu skury ad sonca i nadać joj lohkaje smuhłaje adcieńnie.
Jak śćviardžaje ŭ intervju Tagesspiegel.de ekśpiertka Anžeła Kłaŭzen z Centra abarony spažyŭcoŭ ziamli Paŭnočny Rejn-Viestfalija, u hetym jość peŭnaja dola praŭdy: beta-karacin sapraŭdy moža nazapašvacca ŭ tkankach skury i źmianiać ich koler, nadajučy bolš smuhłaje adcieńnie.
Adnak, pa słovach ekśpiertki, čakać ad dabavak z beta-karacinam poŭnaj abarony ad sonca nie varta. Pavodle vysnoŭ Jeŭrapiejskaha ahienctva pa biaśpiecy charčavańnia (EFSA), jon «u lepšym vypadku niaznačny».
Tak asobnyja nievialikija daśledavańni sapraŭdy pakazvali stanoŭčy soncaachoŭny efiekt beta-karacinu, ale tolki pry praciahłym užyvańni vysokich dozaŭ — bolš za 20 milihram štodnia na praciahu minimum dziesiaci tydniaŭ.
Choć vostraja taksičnaść beta-karacinu nie była zafiksavana ŭ daśledavańniach, doŭhaterminovaje jaho ŭžyvańnie ŭ vysokich dozach, pavodle eskśpiertki, moža pavialičyć ryzyku surjoznych zachvorvańniaŭ, asabliva ŭ tych, chto kuryć. U ich heta rečyva moža spryjać raźvićciu takich zachvorvańniaŭ, jak rak lohkich.
Tamu śpiecyjalisty zaklikajuć nie pieravyšać rekamiendavanuju kolkaść i ŭličvać indyvidualnyja ryzyki.
Na žal, mnohija vytvorcy «soniečnaj» dabaŭki nie infarmujuć pakupnikoŭ naležnym čynam. Pavodle pravierki Centra abarony spažyŭcoŭ Hiermanii, tolki 9 z 23 daśledavanych praduktaŭ utrymlivali vyraznuju zaŭvahu, što jany nie mohuć zamianić paŭnavartasny soncaachoŭny srodak. I tolki try pradukty z usich adpaviadali rekamiendavanamu abmiežavańniu ŭ 3,5 milihrama beta-karacinu na dzień.
Takim čynam, bijadabaŭki z beta-karacinam mohuć źlohku źmianić koler skury, ale nie varta ŭsprymać ich jak efiektyŭnuju abaronu ad ultrafijaletu. Asabliva važna paźbiahać pieradaziroŭki i ŭličvać indyvidualnyja faktary ryzyki. Soncaachoŭnyja kremy z SPF 30 i vyšej, adzieńnie, kapielušy i znachodžańnie ŭ cieni zastajucca najbolš efiektyŭnymi sposabami abarony ad UF-pramianioŭ.
Ciapier čytajuć
Radyjoviadučy raskazaŭ pra ŭnutranuju kuchniu ANT — i pra toje, jak pieratvaryŭsia ŭ palitviaźnia1
Kamientary