Kavaleŭski: U 2021-m Makiej sprabavaŭ papiaredzić nas pra stratehiju, jakuju my vykarystoŭvajem

— Byli takija pahałoski, što ŭ dni pratestaŭ 2020 hoda dzieści razhladajecca prašeńnie Uładzimira Makieja ab adstaŭcy, — pryhadaŭ Valer Kavaleŭski. — I heta razhladałasia jak vielmi važny krok.

Kali b sapraŭdy Makiej syšoŭ tady z MZS, heta mahło b vielmi mocna paŭpłyvać uvohule na ŭvieś ruch. Heta čakałasia, bo ŭsio ž taki jon byŭ dosyć libieralnym. Jon šmat zrabiŭ, kab Biełaruś raźviarnułasia da našych jeŭrapiejskich susiedziaŭ.

I ŭ jaho atrymlivałasia, u jaho była vybudavanaja svaja ŭłasnaja źniešniepalityčnaja kancepcyja, jakaja pracavała dla Biełarusi, pry hetym jak by nie adryvajučy jaje ad handlova-ekanamičnych adnosinaŭ z Rasijaj, što pa-raniejšamu tady było važnym pryjarytetam dla ekanamičnaha raźvićcia krainy. Ale tym nie mienš bałansu było značna bolš.

I ŭ cełym Makiej byŭ prabiełaruski, šmat rabiŭ dla taho, kab biełaruskaść viartałasia ŭ Biełaruś, kab heta było padkreślena jak naša admietnaść.

Tamu byli čakańni. Jany ŭrešcie nie spraŭdzilisia ź vielmi sumnymi nastupstvami i dla Biełarusi, i dla hramadstva, i dla samoha Makieja.

Hałoŭnaj pryčynaj, čamu tak adbyłosia, Kavaleŭski nazyvaje asabistyja ryzyki, źviazanyja ź biaśpiekaj.

— Heta davoli składanaje pytańnie, što rabić ludziam, jakija znachodziacca ŭ sistemie — pratestavać, sychodzić ci zastavacca i znutry rabić tak, kab nie rabiłasia horš.

Nasamreč heta takoje ekzistencyjalnaje pytańnie dla mnohich dypłamataŭ, jak siabie pavodzić.

Bo kali ty sychodziš ź sistemy, ty faktyčna hublaješ mahčymaść upłyvać na tyja pracesy, jakija tam adbyvajucca. Tudy mohuć pryjści inšyja, u kaho niama nijakich maralnych pryncypaŭ, chto moža prosta stać ludźmi, jakija vykonvajuć lubyja zahady. Heta dylema, składanaja situacyja vybaru.

Ale ŭ toj čas usio ž čakałasia, što Makiej zmoža pierajści na bok ludziej. U mianie asabista byli čakańni, što heta moža zdarycca.

Čamu hetaha nie adbyłosia? Strach. Bo ludzi takoha ŭzroŭniu, kali pakidajuć sistemu, adrazu znachodziacca ŭ hrupie padvyšanaj ryzyki. Tamu jany dumajuć pra toje, što robiać i jakim čynam heta moža adbicca na biaśpiecy ŭłasnaj i blizkich.

Dumaju, što ŭ Makieja byli takija razvahi, nie tolki racyjanalnyja, ale i pra toje, jak heta adabjecca na jaho biaśpiecy.

Były dypłamat taksama padzialiŭsia svaimi razvahami nakont śmierci Makieja.

— Mnie zdajecca, jon padyšoŭ da kanca svajho žyćcia ŭ takim stanie, kali zrazumieŭ, što zhubiŭ usio toje, što vybudoŭvaŭ šmat hadoŭ, što inviestavaŭ.

Heta i źniešniaja palityka, jakuju jon vypracavaŭ na praciahu svajoj pracy ŭ ministerstvie. U jaho było vielmi vysokaje miesca ŭ dziaržaŭnaj sistemie. Jon byŭ upłyvovy, nabližany da Łukašenki čałaviek. Mieŭ davoli surjoznuju reputacyju. Ale ŭsio heta jon straciŭ.

Paśla 2020 hoda MZS staŭ takim «zdradnickim orhanam» u vačach Łukašenki, i Makiej, jak jaho kiraŭnik, kaniečnie, straciŭ vielmi šmat svaich plusaŭ i svajoj vahi.

I treciaje, jon straciŭ reputacyju ŭ vačach biełaruskaha naroda. Toje, što jon, znoŭ ža, pieściŭ, vybudoŭvaŭ, vyroščvaŭ, usio syšło.

Z taho momantu i da svajoj śmierci, mnie zdajecca, jon žyŭ u stanie hłybokaha stresu, adčuvajučy, što stračana ŭsio, što napracoŭvaŭ za svajo žyćcio. Byli padkreślenyja momanty taho, jak jamu było składana ŭ hetaj sistemie, jak jaho zasoŭvali tam na samy apošni šerah.

Taksama byli situacyi, na jakija ja źviarnuŭ uvahu tady i jakija zaraz ja pieraacaniŭ.

Naprykład, viasnoj 2021 hoda Makiej u intervju adnamu ź jašče niezaležnych vydańniaŭ vykazvaŭsia davoli ultymatyŭna, navat z pahrozami pra toje, što kali ŭsio budzie praciahvacca takim čynam, budzie naroščvacca cisk, to vy pavinny viedać, što heta pryviadzie da źniščeńnia hramadzianskaj supolnaści.

Kali ja ŭ toj čas čytaŭ heta, dumaŭ: jak ty možaš sabie ŭ pryncypie dazvalać takoje havaryć, ty ž pahražaješ źniščeńniem niezaležnym demakratyčnym instytutam? Siońnia ja čuju jaho słovy jak papiaredžańnie, ad taho čałavieka, jaki taksama ŭkłaŭsia ŭ hetuju spravu, vybudovu niezaležnych instytutaŭ. Jon havoryć: padumajcie pra toje, što robicca, vy možacie pryvieści heta da katastrofy.

Mnie zdajecca, u toj momant Makiej sprabavaŭ takim čynam nas papiaredzić, što nam treba padumać pra tuju stratehiju, jakuju my ŭžyvajem, jakim čynam my padychodzim da vyrašeńnia hetaha ŭnutrypalityčnaha kryzisu. Zaraz ja čuju jaho słovy pa-inšamu.

Druhaja situacyja, jakaja była vielmi važnaja, — napiaredadni pačatku ahresii suprać Ukrainy. Tady Makiej zrabiŭ davoli śmiełyja zajavy pra toje, što rasijskija vojski viernucca ŭ Rasiju ź Biełarusi, što nie budzie nijakaj ahresii suprać Ukrainy.

Miarkuju, u toj momant jon robić takija davoli ryzykoŭnyja kroki dla siabie asabista, asabista siabie stavić na liniju ahniu i ŭ vačach režymu, i ŭ vačach rasijan, biare na siabie adkaznaść. Jak by sprabuje zajakaryć hetuju pazicyju, što rasijskija vojski pavinny vyjści ź Biełarusi, što jany vymušany heta buduć zrabić pa damoŭlenaści.

Jość šmat viersij nakont jaho śmierci, ale toje, što my ŭsie viedajem, pryčyny śmierci zastajucca nie da kanca vyśvietlenymi. I heta nie vypadkovaść. Zrazumieła, što chtości sprabuje schavać niešta ad nas usich.

Ja nie liču Makieja ni patryjotam, jaki pracavaŭ na niezaležnuju Biełaruś, ni zdradnikam biełaruskaha naroda. Naohuł heta taki składany partret.

Pry tym, što jon z pryjaznaściu staviŭsia da biełaruskaści, razam z tym jon byŭ supracoŭnikam śpiecsłužbaŭ, razam z tym jon vybudoŭvaŭ niezaležnuju źniešniuju palityku, razam z tym budavaŭ aŭtarytarny režym Łukašenki.

Jon byŭ pobač z Łukašenkam na praciahu dziesiacihodździaŭ i taksama niasie adkaznaść za toje, da čaho my pryjšli ŭ vyniku. Dumaju, takim było i jaho pieraasensavańnie, — ličyć Kavaleŭski.

• 9
• 5
• 3
• 18
• 1
• 0
• 1
• 0