Zialenski: Ja nie čuŭ nivodnaj prapanovy, jakaja b harantavała, što zaŭtra paśla vychadu z Danbasa nie pačniecca novaja vajna

Pavodle słoŭ Uładzimira Zialenskaha, padčas jahonych pieramoŭ z prezidentam ZŠA Donaldam Trampam da razmovy padklučyŭsia śpiecpasłaniec Trampa — Styŭ Uitkaf. Jon paviedamiŭ, što Rasija nibyta hatovaja prypynić ahoń, ale pry ŭmovie terytaryjalnych sastupak z abodvuch bakoŭ. Pry hetym Zialenski adznačyŭ, što hetaja inicyjatyva pachodzić nie ad Amieryki, a ad Pucina, jaki choča, kab Ukraina vyjšła z Danbasa.

«Viadoma, ja chacieŭ by bačyć pazicyju Amieryki, uličvajučy toje, jak usio pačałosia — našu terytoryju akupavali, ukraincaŭ zabivajuć, i paśla hetaha mnie kažuć: «Słuchaj, chočaš, kab ciabie dalej nie zabivali? Treba vyjści». A jakija harantyi biaśpieki? Vyjści z Danieckaj vobłaści? A ŭ čym kampramis? My budziem u NATA? U ES? Ja ničoha nie čuŭ — prosta nivodnaj prapanovy, jakaja b harantavała, što zaŭtra nie pačniecca novaja vajna i Pucin nie pasprabuje akupavać jak minimum Dniapro, Zaparožža i Charkaŭ. Jon užo dvojčy pačynaŭ vojny pry roznych prezidentach Amieryki, što jaho ŭtrymaje ad treciaj vajny?»

Zialenski jašče raz padkreśliŭ, što jon nie hatovy abmiarkoŭvać pytańnie terytoryi Ukrainy, bo heta — vyklučna sprava Kanstytucyi krainy. Jon nahadaŭ, što nieakupavanaja častka Danieckaj vobłaści (prykładna 30%) — heta terytoryja Ukrainy, i heta nie niečaja asabistaja ŭłasnaść, a dziaržaŭnaja. Tamu abmien terytoryjami — vielmi składany i adkazny krok, jaki nielha razhladać biez harantyj biaśpieki dla Ukrainy i jaje naroda.

Akramia taho, Zialenski pryznaŭ, što Ukraina baicca taho, što padčas sustrečy Pucina z Trampam mohuć być uźniatyja pytańni pra vyvad ukrainskich vojskaŭ z Danbasa ŭ abmien na prypynieńnie ahniu.

«Vysokaja imaviernaść taho, što Pucin skaža: «Chaj Zialenski vyvodzić svaje vojski z Danbasa — tady budzie, naprykład, ceasefire (spynieńnie ahniu)». My pačujem detali hetaha i niešta adkažam. I Tramp moža skazać, naprykład: «Ukraincam daviadziecca heta zrabić». Abo Tramp na sustrečy skaža Pucinu, što «pytańnie terytoryi my budziem vyrašać utroch». Albo «pytańnie terytoryi vy budziecie vyrašać bieź mianie, prezidenta Amieryki, udvaich, a ciapier my robim ceasefire, i ja nie ŭvodžu sankcyi». Abo «my robim ceasefire, ja ŭvodžu sankcyi i zdymu ich tady, kali vy ŭdvaich damoviciesia».

Jon skazaŭ, što mohuć być prapanovy i patrabavańni, jakija Ukraina razhledzić, ale heta budzie vielmi składanaja i adkaznaja sprava. Taksama Zialenski adznačyŭ mahčymyja roznahałośsi pamiž amierykanskim i rasijskim bakami ŭ interpretacyi hetych prapanoŭ, što moža ŭskładnić situacyju.

Prezident Ukrainy taksama prakamientavaŭ infarmacyju, jakaja źjaviłasia ŭ zachodnich ŚMI, što nibyta jon hatovy abmianiać častku terytoryj. Zialenski zapiarečyŭ hetamu i nazvaŭ takija paviedamleńni častkaj infarmacyjnaj kampanii, jakaja stvaraje peŭnaje hramadskaje mierkavańnie va Ukrainie, kab padrychtavać nasielnictva da mahčymych budučych krokaŭ.

• 4
• 0
• 0
• 3
• 0
• 1
• 2
• 1