«Azijackija Havai». Čym plažny adpačynak na vostravie ŭ Kitai padabajecca biełarusam
«Biełavija», jakaja ŭžo lataje ź Minska da kitajskaha horada Urumčy, z kastryčnika adkryje novy turystyčny kirunak — na vostraŭ Chajnań. Turapieratary pradkazvajuć vialiki popyt na kvitki i rychtujuć prahramy na daloki kurort. Što pra jaho raskazvajuć padarožniki i turahienty?
Zamiest dźviuch pierasadak — pramy rejs ź Minska
«Čas u darozie ad [płoščy] Ardžanikidzie ŭ Mahilovie da vostrava Chajnań zaniaŭ roŭna 36 hadzin», — raspaviadaje u tyktoku Siarhiej, adzin ź biełaruskich turystaŭ.
Na «azijackija Havai», jak časam nazyvajuć Chajnań, mužčyna pajechaŭ u lipieni razam z žonkaj — u viasielnaje padarožža. Miarkujučy pa błohu Siarhieja, vandroŭka im vielmi spadabałasia. Ale lacieć na vostraŭ im daviałosia praz Maskvu i z dadatkovaj pierasadkaj užo ŭ Kitai.
«Nievierahodnaje miesca z šykoŭnym klimatam. Tut vielmi ciopła, pryhoža, ekzatyčna. Karcinka šykoŭnaja, usio śviecicca, usio jaskravaje. Śviet tut prosta pieraviernuty dahary nahami», — padzialiŭsia Siarhiej.
Pucioŭku da Chajnania para nabyvała ŭ Mahilovie. Za kvitki i pražyvańnie ŭ hateli sa śniadankami na 8 dzion jany zapłacili 1700 dalaraŭ. Jašče 500 biełaruskich rubloŭ im kaštavaŭ tranśfier Mahiloŭ-Šaramiećjeva ŭ dva baki. Na samim vostravie jany patracili dadatkovuju tysiaču dalaraŭ.
Jašče adna biełaruska padzialiłasia ŭ tyktoku, što jana kožny hod vybiraje Chajnań dla adpačynku. Dziaŭčyna, jakaja pracuje vykładčycaj kitajskaj movy, vyznačyła dla siabie niekalki pieravah u takich vandroŭkach. Pieršaje — u Kitaj nie patrebna viza.
«Druhoje — heta ruskaja mova. U mnohich miescach vy možacie ŭžo zaŭvažyć nadpisy pa-rusku. Kali vy idziacie ŭ restaran, vam mohuć dać mieniu, dzie ŭsio budzie napisana na ruskaj. U mnohich mižnarodnych hatelach jość ludzi, jakija razmaŭlajuć pa-rusku», — raskazała jana.
Z 8 kastryčnika dla amataraŭ kitajskaj kultury zapracuje rehularny pramy rejs ź Minska. Čakajecca, što latać vialiki samalot Airbus A330-200 Minsk-Sańja (tak nazyvajecca horad na poŭdni Chajnania) budzie kožnuju sieradu.
A ź listapada kolkaść rejsaŭ padvoicca — dadasca subotni maršrut. Turapieratary kažuć, što takaja častata vyletaŭ tłumačycca papularnaściu hetaha kirunku siarod biełarusaŭ.
«Biełavija» paviedamiła, što z kastryčnika kvitki da Sańji buduć kaštavać ad 1325 rubloŭ u adzin bok i ad 2162 rubloŭ za kvitki ŭ dva baki.
Abaviazkovy VPN i nijakaha «ŭsio ŭklučana»
Biełaruskija turapieratary ŭžo ciapier prahnazujuć vialiki popyt na pucioŭki da Chajnania i rychtujuć ekskursijnyja prahramy. Prapanujuć naviedać Centr budyzmu Nańšań, trapičny les Janoda i inšyja słavutaści.
Dyrektar «Reliz tur» Kanstancin Maciuškin u svaim tyktoku rastłumačyŭ, što dla biełaruskich turystaŭ adpačynak u Kitai — kirunak z mnostvam cikavych miescaŭ, trapičnym klimatam i narmalnymi cenami.
Pa jaho padlikach, ceny na tur u Kitaj paraŭnalnyja ź vizitam u Turcyju — ad tysiačy dalaraŭ na čałavieka. Kali vybirać hatel ź piaćciu zorkami, to zapłacić daviadziecca kala 1400-1500 dalaraŭ.
Na Chajnani Maciuškin raić da naviedvańnia try asnoŭnyja plažy — Sańja Bej, Jałonh Bej i Dadunchaj.
Sistemy charčavańnia «ŭsio ŭklučana» na Chajnani niama (kali nie ličyć usiaho adzin hatel, dzie možna pajeści try razy na dzień, ale ahułam Maciuškin jaho nie raić). U asnoŭnym turystam prapanujuć tolki śniadanki, radziej — śniadanki i viačeru.
«Nie chvalujciesia, kali vy pryvykli adpačyvać na standartnych kurortach i vychodziačy z hatela bačyć toje, što nijakaj infrastruktury niama, jak u Jehipcie. Na Chajnani z hetym poŭny paradak — tam biez prablem vy zmožacie pajści ŭ lubuju kafešku pajeści. Absalutna roznaja kuchnia — i ruskaja, i jeŭrapiejskaja, i azijackaja. Tamu navat ź dziećmi budzie narmalna», — zapeŭnivaje jon.
Jašče adzin važny momant — zvykłyja dla biełarusaŭ jutub i instahram, jak i inšyja zachodnija sacsietki i miesiendžary, u Kitai nie pracujuć. Dla taho, kab imi karystacca, treba zahadzia spampavać VPN — ale nie fakt, što jon zapracuje. Pry hetym vajfaj na vostravie jość amal usiudy i biaspłatny, zaŭvažaje Maciuškin.
Kali vam patrebny bieśpierapynny dostup u internet, možna padklučyć roŭminh ci źviarnucca da kitajskich apierataraŭ užo na miescy.
Dyrektar turystyčnaha ahienctva dadaje, što plažy na vostravie taksama trochi adroźnivajucca ad taho, što ludzi pryvykli bačyć na bolš papularnych kurortach. Naprykład, časta dazvolenaha miesca dla płavańnia ŭ vadzie nie tak šmat. Kali parušyć hetyja miežy, padpłyvajuć achoŭniki, jakija mohuć vyvieści vas na bierah.
Naviedvać Chajnań možna kruhły hod. Tolki ŭ studzieni-lutym tam stanovicca pryblizna pa +24 hradusy, kaža Maciuškin. Samy pik turystyčnaha siezona na «azijackich Havajach» — vosień i viasna. U adroźnieńnie ad Jehipta ci Turcyi letam tam mohuć čas ad času iści daždžy.
A kolki kaštuje pajezdka ŭ Urumčy?
Sańja — nie pieršy kitajski horad, kudy adkrylisia pramyja rejsy ź Minska. Biełaruskija turysty ŭžo lotajuć va Urumčy — horad na poŭnačy krainy, jaki źjaŭlajecca stalicaj ujhuraŭ.
Vandroŭka va Urumčy na dvaich čałaviek na vosiem dzion, raskazała błohierka Taćciana, kaštavała im z chłopcam 1274 dalary. Ale heta pry ŭmovie, što kvitki na samalot jany nabyli pa akcyi — pa 530 dalaraŭ.
Za žyllo ŭ Kitai maładziony zapłacili 190 dalaraŭ, jašče 178 dalaraŭ — za ŭvachodnyja kvitki ŭ muziei i turystyčnyja centry. Charčavańnie im kaštavała 115 dalaraŭ.
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary