Tak prakamientavaŭ Alimpijadu, što daviałosia zvolnicca. Bos italjanskaha kanała narabiŭ pamyłak u efiry
Momant nacyjanalnaha honaru dla italjancaŭ, jakija hladzieli jarkuju cyrymoniju adkryćcia Zimovych Alimpijskich hulniaŭ u pramym efiry na dziaržaŭnym viaščalniku RAI, pieratvaryŭsia ŭ hučny skandał.
A dla Paoła Pietreki, čyja poŭnaja pamyłak tranślacyja chutka stała virusnaj i abiarnułasia nacyjanalnym soramam, heta aznačała zaviaršeńnie karjery ŭ viaščańni, piša Bi-bi-si.
Pietreka, kiraŭnik kanała Rai Sport, padaŭ u adstaŭku paśla šerahu efirnych pamyłak, jakija pačuli 9,2 młn hledačoŭ. Praz heta navinnyja žurnalisty navat abviaścili karotki strajk.
Jaho paŭnamoctvy buduć zavieršany ŭ kancy hulniaŭ, i jon nie budzie kamientavać cyrymoniju zakryćcia.
Pietreka ŭ apošni momant zamianiŭ inšaha kamientatara, jakoha adchilili paśla taho, jak jon vypadkova raskryŭ «siensacyjny siurpryz» cyrymonii.
Pietreku ličać blizkim da partyi «Braty Italii» premjer-ministarki Džordžy Miełoni. Pracujučy na navinavym kanale Rai, jon navat pradstaviŭ jaje knihu «Ja — Džordža» za hod da taho, jak jana ŭznačaliła ŭrad.
Jaho tranślacyja ledź pačałasia, kali jon dapuściŭ pieršuju pamyłku, pavitaŭšy hledačoŭ sa stadyjona Olympico Stadium, choć cyrymonija adkryćcia prachodziła na lehiendarnym miłanskim stadyjonie San-Sira.
Dalej, jak adznačyŭ adzin ahladalnik, adbyłasia adna z najhoršych pramych tranślacyj u historyi Rai, kali fłahmanski kanał Rai 1 mieŭ dolu aŭdytoryi bolš za 46%.
Jon pradstaviŭ śpiavačku Meraja Kery, a zatym vypraviŭsia, patłumačyŭšy, što na samoj spravie heta była italjanskaja aktrysa Macilda De Andželis.
Jaje imia adrazu stała miemam: italjancy publikavali malunak aktrysy z podpisam «voś nievierahodnaja Meraja Kery!». Sama De Andželis u sacsietkach pažartavała, što hatovaja padzialicca pravami na kaladny chit śpiavački All I Want for Christmas.
Kali kamiera pakazała prezidenta Italii Sierdža Matarełu, Pietreka zajaviŭ, što pobač ź im apładziruje jaho dačka Łaura. Na samaj ža spravie heta była prezident Mižnarodnaha alimpijskaha kamiteta Kirści Kovientry.
Kali alimpijski ahoń pieradali dvum paśpiachovym zbornym Italii pa valejbole, jon nie paznaŭ kapitana mužčynskaj kamandy Simonie Džanieli i nazvaŭ imia adnoj z valejbalistak žanočaj zbornaj.
Paśla hetaha jon źviarnuŭsia da nacyjanalnych stereatypaŭ, zajaviŭšy, što brazilcy «majuć muzyku ŭ kryvi», zhadaŭ «afrykanskija rytuały vudu» i nazvaŭ ispancaŭ «zaŭsiody vielmi haračymi», vykarystoŭvajučy ispanskaje słova calienti.
Katastrafičny vystup asudziŭ žurnaliscki prafsajuz Rai Usigrai, nazvaŭšy jaho «surjoznym udaram» pa imidžy viaščalnika. Kamientatara Aŭra Bułbereli, jakoha raniej adchilili, užo viarnuli dla pracy na cyrymonii zakryćcia.
Rašeńnie Pietreki ab adstaŭcy nie stała niečakanaściu. Jaho zamienić kaleha Marka Łołabrydžyda, jakoha ličać adnym z najlepšych spartyŭnych viadoŭcaŭ kanała.
Hety skandał pryciahnuŭ uvahu da abvinavačvańniaŭ krytykaŭ, što ŭrad ciśnie na viaščalnika, što škodzić jakaści kantentu. Praciŭniki navat iranična nazyvajuć RAI «Telemiełoni».
Ciapier čytajuć
Prapahandysty zapeŭnivajuć, što 196 palitviaźniaŭ užo na svabodzie8
Kamientary
[Zredahavana]