Prapahanda zrabiła kłon «Zierkała» ŭ tyktoku i tam viarzła biazhłuździcu pra Polšču. Tyktok adreahavaŭ
U TikTok źjaviŭsia kanał, dzie zhienieravanaja štučnym intelektam viadučaja raskazvała fejki pra Polšču na ruskaj movie.
Nazva kanała padobnaja da nazvy adnaho z samych papularnych biełaruskich vydańniaŭ — «Zierkała». U toj ža čas dyzajn byŭ skapijavany z hrodzienskaha rehijanalnaha kanała, jaki niadaŭna razzłavaŭ prapahandysta Ihara Tura. A akaŭnt, mahčyma, źviazany z hałoŭnym redaktaram dziaržaŭnaj «Hrodzienskaj praŭdy».
Pieršy rolik na hetym kanale apublikavali 3 lutaha ŭ 17:15 z zahałoŭkam «U Polščy pravał z naboram u vojska». U toj ža dzień, za hadzinu da pieršaha videa, na kanale pamianiali nazvu na Zerkalonews.
Inšyja roliki zrobleny ŭ padobnym styli, z hučnymi zahałoŭkami i dezynfarmacyjaj unutry: «Palaki zamiarzajuć», «Polšča zastaniecca biez pošty», «U Polščy niama kamu pracavać?».
Pry hetym vobraz ŠI-viadučaj i afarmleńnie zahałoŭkaŭ ź citrami vielmi padobnyja da kanała rehijanalnaha miedyja, pryśviečanaha Hrodna, ź iraničnaj nazvaj «Sovietskaja Biełoruśsija» (nie błytać z papularnym satyryčnym telehram-kanałam ź identyčnaj nazvaj). Mienavita hety hrodzienski resurs u kastryčniku 2024‑ha vyklikaŭ hnieŭ Ihara Tura, pra što toj pisaŭ u svaim telehram-kanale.
Tady «SovBiełka» raspaviała pra skarhi žycharoŭ radzimy Ihara Tura, pasiołka Pieršamajski Lidskaha rajona, na rekanstrukcyju siaredniaj škoły. Pa słovach miedyja, z-za dapuščanych pamyłak pry rekanstrukcyi škoły «ŭ ludziej zataplaje dvary i aharody, treskajecca padmurak, chadzić prychodzicca pa bałocie». Taksama, jany adznačyli cikavaje supadzieńnie: budoŭlaj kiravaŭ Andrej Koŭryha, były namieśnik staršyni Lidskaha rajvykankama.
Avatar kanała vielmi nahadvaje łoha telehram-kanała abłasnoj haziety «Hrodzienskaja praŭda». Videa z kanała Zerkalonews, dzie ŭsiaho krychu bolš za 100 padpisčykaŭ, aktyŭna kamientuje akaŭnt tatyanasv03 z fota Taćciany Siarhiejevaj — hałoŭnaj redaktarki «Hrodzienskaj praŭdy». Apošniaje videa na jaje kanale — jakraz ŠI-viersija jaje fatahrafii ŭ viečarovaj sukiency. Akramia hetaha, jana publikuje videa ź dziaržaŭnych krynic i krytykuje praciŭnikaŭ dyktatury.
Źjaŭleńnie kanała moža aznačać, što dziaržSMI pačynajuć ekśpierymienty z ŠI-servisami dla vytvorčaści kantentu dla płatformaŭ ź viertykalnymi videa.
Treba adznačyć, što, pakul my rychtavali hetuju publikacyju, tyktok zabłakavaŭ kanał — mahčyma, jaho paličyli parušalnikam praviłaŭ płatformy.
Ciapier čytajuć
U Poznani hiniekołah vydaliŭ 24‑hadovaj biełaruscy matku i jaječniki bieź jaje zhody. Jamu pahražaje da 20 hadoŭ turmy11
Kamientary