«Ja niadaŭna byŭ u Kijevie i čuŭ acenki vašaj pracy — jany dalokija ad tryumfalnych». Daradca Cichanoŭskaj rezka adkazaŭ Kavaleŭskamu

Valer Kavaleŭski zajaviŭ, što Cichanoŭskaja zapavolvaje praces vyzvaleńnia palitviaźniaŭ.

«Pavažany Valeryj, vinavacić Śviatłanu Cichanoŭskuju ŭ tym, što jana nibyta «zapavolvaje vyzvaleńnie palitviaźniaŭ», — heta albo śviadomaje skažeńnie realnaści, albo sproba padmianić stratehiju taktyčnymi epizodami. Za apošnija miesiacy zafiksavanyja sotni novych kryminalnych spraŭ i dziasiatki novych prysudaŭ», — piša Leanid Marozaŭ.

«Ahulnaja kolkaść pryznanych palitviaźniaŭ z 2020 hoda pieravysiła čatyry tysiačy, i bolš za tysiaču čałaviek zastajucca ŭ turmach. Pry hetym vyzvaleńnia adbyvajucca paralelna z adkryćciom novych spraŭ. Heta nie «źmiakčeńnie», heta ratacyja zakładnikaŭ.

Nazyvać heta pośpiecham humanitarnaj dypłamatyi i adnačasova vinavacić tych, chto patrabuje sistemnych kryteryjaŭ deeskałacyi, — prynamsi dziŭna.

Ja b vielmi chacieŭ, kab paśla koski, u svaich apaviadańniach u Ženievie, vy taksama pra heta nie zabyvali raskazvać. Pakul vy heta nie robicie, cikava čamu? 

Pazicyja, što sankcyi mohuć pierahladacca tolki pry ŭstojlivym i praviaranym źnižeńni represij, — heta nie radykalizm, a bazavaja łohika. Kali abmieńvać častkovyja vyzvaleńni na palityčnyja sastupki bieź źmieny zakanadaŭstva, biez spynieńnia novych spraŭ, biez admieny «ekstremisckich» śpisaŭ i nahladu nad vyzvalenymi, heta stvaraje stymuł brać novych ludziej u zakładniki. Historyja adnosin z režymam heta paćviardžaje šmatkroć. Lubyja damoŭlenaści biez dakładnych kryteryjaŭ i miechanizmaŭ pravierki pieratvarajucca ŭ imitacyju prahresu. 

Kali vielmi chočacca sieści za «stoł miru ŭ Minsku», to možna tak i skazać. Choć niešta mnie padkazvaje, što pryjdziecca prosta sieści. 

Vyzvaleny čałaviek siońnia zastajecca pad nahladam, z ryzykaj načnych pravierak, z abmiežavańniami na pracaŭładkavańnie, ź finansavymi błakavańniami i statusam «ekstremista». Kali čałaviek vymušany pakinuć krainu za 48 hadzin, tamu što žyć u joj niemahčyma, heta nie paŭnavartasnaje vyzvaleńnie. Heta prymus da vyhnańnia. Ihnaravać hety kantekst i zvodzić dyskusiju da formuły «vyzvaleńnia luboj canoj» — značyć śviadoma spraščać prablemu.

Zajavy ab tym, što zaklik da kaardynacyi sankcyjnaj palityki pamiž ZŠA i ES nibyta raskołvaje Zachad, vyhladajuć asabliva paradaksalna. Mienavita ŭzhodnienaść padychodaŭ u 2020‑2025 hadach uzmacniała cisk i stvarała pierahavornyja ryčahi. Raskoł uźnikaje tady, kali roznyja aktary pačynajuć pasyłać režymu supiarečlivyja sihnały pra hatoŭnaść da sastupak bieź sistemnych źmienaŭ.

Asobna varta skazać pra piersanalny aśpiekt. Valeryj, vy doŭhi čas zajmalisia ŭkrainskim napramkam. Ja niadaŭna byŭ u Kijevie i čuŭ acenki vašaj pracy — jany dalokija ad tryumfalnych.

Pašpartny kirunak mnie viadomy nie pa čutkach: ja asabista znajomy z tym, jakija vyniki byli dasiahnutyja i čamu praces buksavaŭ. Ciapier hučyć krytyka ŭ pravaabarončaj śfiery. Vopyt padkazvaje, što kali stratehičnaja hłybinia padmianiajecca publičnaj palemikaj, palityčny kirunak moža skončycca hetak ža, jak papiarednija — hučnymi zajavami bieź instytucyjnaha vyniku. Pakul usio, što ja čytaju i baču — pazicyja «sam durań».

Krytyka dapuščalnaja i nieabchodnaja. Ale jana pavinna hruntavacca na razumieńni pryrody režymu. Mnie vielmi padabajecca fraza «kali mocna biehčy naleva, to chutka apyniešsia sprava» — mabyć, ja chutka vas tam i ŭbaču. 

U Biełarusi represii instytucyjanalizavanyja dziasiatkami narmatyŭnych aktaŭ. Heta nie situatyŭnaja kampanija, jakuju možna zharnuć sieryjaj abmienaŭ. Patrabavańnie sistemnych kryteryjaŭ — heta nie tarmažeńnie pracesu, a sproba zrabić jaho niezvarotnym. Kali chtości prapanuje alternatyvu, jana pavinna ŭklučać adkaz na prostaje pytańnie: jakim čynam razavyja pasłableńni spyniać patok novych kryminalnych spraŭ? Pakul takoha adkazu niama, abvinavačvańni ŭ «zapavoleńni vyzvaleńniaŭ» hučać jak palityčnaja rytoryka, a nie jak pradumanaja stratehija», — napisaŭ Leanid Marozaŭ.

• 50
• 0
• 2
• 1
• 0
• 0
• 0
• 0