Šalonyja štrafy i praca non-stop: biełarusy raskazali pra piakielnyja ŭmovy na składach Wildberries i Ozon
12‑hadzinnyja źmieny, choład u pamiaškańniach i štrafy, jakija źjadajuć zarobak, harujuć ludzi, jakija nie majuć vybaru.
«Chto-niebudź pracuje abo pracavaŭ na składzie WB ci Ozon u Minsku? Ci varta ŭvohule?» — z hetaha pytańnia pačaŭsia adzin z pastoŭ u Threads. Za niekalki dzion pad im sabralisia dziasiatki kamientaroŭ. Chtości piša pra ciažkija 12‑hadzinnyja źmieny, chtości — pra choład u pamiaškańniach i štrafy, jakija źjadajuć zarobak. Jak vyśvietliłasia, takija ŭmovy pracy charakternyja nie tolki dla Minska.
Praca na składach markietpłejsaŭ u Biełarusi vyhladaje jak adna z samych dastupnych. U vakansijach, jakija možna znajści na sajtach z pošukam pracy, fihurujuć šyrokija viłki zarobku: u Minsku abiacajuć kala 1500—5000 rubloŭ u miesiac, u rehijonach — prykładna 500—4000 rubloŭ. U abjavach paznačana štotydniovaja vypłata i mahčymaść pracavać biez dośviedu. U abaviazkach — prymać, upakoŭvać i sartavać tavary.
Składy WB pad Minskam: «umovy nijakija», usio na chutkaść, a štrafy — jak pastajanny fon
Biełarusy, jakija pracavali na składach Wildberries pad Minskam, šmat raspaviadajuć pra štrafy i zaležnaść zarobku ad tempu pracy.
«Umovy nijakija, adčuvańni na Ščomie (skład u Ščamyślicy. — NN) takija, byccam ty pad nahladam turemščyka adbyvaješ termin. Štrafy možna źvieści da minimumu, kali pracavać akuratna i pa rehłamientach. Ale tady mocna prasiadzieš u zarobku, bo tam usio pracuje na chutkaść», — piša adna z karystalnic.
Inšaja kamientatarka ź Minskaha rajona apisvaje svoj dośvied:
«Kab atrymlivać chacia b 2000 rubloŭ, treba znachodzicca tam 24/7. Kali vychodzić čysta na piacidzionku — maksimum zarobiš kala 1000, i vielmi enierhazatratna. Štrafy jość, i ich šmat (u asnoŭnym nieabhruntavanych)».
Niekatoryja zhadvajuć pra choład u składskich pamiaškańniach i doŭhija źmieny:
«Na składzie vielmi chałodna, varoty na zahruzku pastajanna adkrytyja na vulicu. U siarednim navičok moža zarabić kala 100 rubloŭ za 12‑hadzinnuju źmienu».
«Mianie chapiła na miesiac. Skažu adkryta: praca dreń. Abiacajuć załatyja hory, a pa fakcie ŭ štrafach jak u zołacie. Biaskoncyja pastaŭki, treba raźbirać vielmi chutka. Chamstva, abyjakavaje staŭleńnie. Kali źmienščyk zachvareŭ — budzieš žyć na pracy, bo zamianić niama kim. I hrafik nie 12 hadzin — byvaje i 14, i 16», — piša adzin z udzielnikaŭ abmierkavańnia.
«Pieršy miesiac nie štrafujuć. Ja jakraz i zvolniłasia paśla miesiaca pracy. Apłata vielmi maleńkaja. Za 9 hadzin bieśpierapynnaj pracy ŭsiaho 70 rubloŭ», — raspaviadaje biełaruska pra ŭmovy pracy na składzie ŭ Chaciežynie.
Jašče adzin časty matyŭ — «svabodny hrafik» tolki na słovach: u kamientarach śćviardžajuć, što paśla vychadu na pracu vyśviatlajecca patreba ŭ bolš žorstkim režymie (kštałtu 2/2), inakš «miesca addaduć inšamu».
Skład WB u Breście: «Zarabiła 200 rubloŭ, sa štrafami vyjšła minus 85»
U Threads razharnułasia taksama abmierkavańnie ŭmoŭ pracy na składzie Wildberries u Breście. Adna z kamientatarak adznačaje, što za pravierku mohuć płacić kala 20 kapiejek za adzinku, ale adnačasova:
«Tam lotajuć štrafy za kožnuju drobiaź. Kali dadatak łahuje — ź ciabie zdymajuć hrošy, i nie dakažaš, što viny tvajoj niama. Nie zaŭvažyŭ brak — ź ciabie zdymajuć sumu hetaha tavaru. U vyniku praca ŭ minus, navat pry vielmi starannym padychodzie».
Inšaja ŭdzielnica abmierkavańnia zhadvaje, što spačatku zarobak vypłačvali štotydzień, ale potym pačali lacieć štrafy:
«Pryjšła sa svaimi zavušnicami — štraf, piarścionak na palcy — štraf, nie zaŭvažyŭ brak — štraf. Na składzie vielmi chałodna. Paśla pieršaj zarpłaty pajšła ŭ minus i dva tydni pracavała, kab vyjści ŭ nul».
Historyj pra štrafy davoli šmat:
«Pracavała miesiac niadaŭna. Pieršyja dva tydni jašče bolš-mienš, a potym palacieli štrafy: spačatku nievialikija, z kožnaj źmienaj bolš i bolš. U vyniku zarabiła 200 rubloŭ i pavinna była ich atrymać, ale ich śpisali i jašče štraf pryjšoŭ — vyjšła minus 85. Zvolniłasia», — pišuć u sacsietkach.
Składy Ozon: stroha, fizična ciažka, ale bolš pradkazalna
U tych ža dyskusijach karystalniki paraŭnoŭvajuć Wildberries z Ozon. Niekatoryja ź ich śćviardžajuć, što ŭ Ozon taksama doŭhija źmieny i fizična ciažkaja praca, ale sistema vyhladaje bolš pradkazalnaj.
«Pracuju na Ozon u štacie, umovy bolš-mienš. Značna lepš, čym na VB. U aŭtsorsa 100—140 rubloŭ źmiena 12 hadzin, čatyry pierapynki: try pa 10 chvilin i 30 chvilin na abied. Na skład biez upryhožvańniaŭ, telefonaŭ i h.d. Ale staršyja na źmienie narmalnyja, ludzi adekvatnyja, usio padkažuć», — pišuć u kamientarach.
«Ź plusaŭ: minimalny kantakt ź ludźmi, hrošy na nastupny dzień. Ź minusaŭ: za tavar prychodzicca bicca, štrafy ŭ asnoŭnym za niaŭvažlivaść (u mianie bolš za 450 rubloŭ štrafaŭ u miesiac nie było), 12 hadzin na nahach biehać tudy-siudy. Kali vybiraješ vialiki skład, heta naohuł samazabojstva, tam vielmi ciažka», — raspaviadaje inšaja karystalnica.
Inšyja vodhuki z adkrytych sajtaŭ z vodhukami pra pracu taksama apisvajuć Ozon jak fizična ciažkuju pracu:
«Rabota adnastajnaja, ale stabilnaja. Instrukcyi jość na ŭsio, zarpłatu płaciać svoječasova».
Pry hetym zhadvajuć strohi kantrol i vysokuju nahruzku:
«Fizična ciažkaja praca, šum, vysokaja ciakučka navičkoŭ, strohija praviły».
U paraŭnańni z Wildberries karystalniki časam farmulujuć roźnicu tak:
«Na Wildberries štrafy šalonyja. Na Ozon ich mienš, ale ŭmovy taksama strohija».
-
«Nad hałavoj lataje pa 20 ton». Brat i siastra ź Biełarusi raskazali, kolki zarablajuć u porcie polskaj Hdyni
-
«Mnohija ludzi stanuć niepatrebnymi». Suzasnavalnik EPAM pra siabroŭstva z Dobkinym, bahaćcie i niaroŭnaść, žyćcio ŭ Łatvii i nastalhiju
-
U lipieni Rasija jašče bolš pavialičyła zakupki paliva ŭ Biełarusi
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary