Ludzi śpiać z tazikami: u centry Minska zatapiła ceły žyły dom
Kamunalniki zmohuć vyrašyć prablemu tolki viasnoj.
Staradaŭni dom u samym centry Minska nasuprać Vialikaha teatra. Tut svajo «Lebiadzinaje voziera». Vadaspady lijucca z dachu. Niekatoryja žychary śpiać z tazikami, a chtości i zusim pierajechaŭ — u syraści niemahčyma znachodzicca, piša «Točka».
U domie na vulicy Maksima Bahdanoviča vysokija stoli, toŭstyja ścieny i dobry vid z akna. Tolki voś pierakryćci dachu — słabaje miesca amal viekavoha budynka.
Dach pačaŭ praciakać jašče ŭ siaredzinie studzienia. Vada ściakaje patokam u padjeździe i ŭ kvaterach.
Žychary źviartalisia i ŭ słužbu 115, i na haračuju liniju Minharvykankama, i navat u Kamitet dziaržaŭnaha kantrolu.
Taćciana Hienadźjeŭna z mužam zasłali plonku na łožak i padstavili tazik. Śpiać na adnoj pałovie łožka. A na kuchni sužency vystavili ŭsiu taru, što zmahli znajści ŭ haspadarcy.
Ich susiedka pierasialiła ŭnučku ź dziciačaha pakoja: tam ad syraści adkleilisia špalery.
Samaja žałasnaja situacyja — na vierchnim trecim paviersie. Natalla Piatroŭna pryjazdžaje dadomu tolki pamianiać viodry. Ścieny vymakli naskroź. Z-za syraści ciažka znachodzicca ŭ pakoi.
Žančyna sabrała rečy i źjechała žyć da rodnych. Jaje maralny stan pryhniečany.
Adkaz kamunalnych słužbaŭ
Padtopleny dom znachodzicca na bałansie ŽEU №3 Centralnaha rajona. Pra prablemu tam viedajuć.
«Amal kožny dzień pa hetym adrasie pracujuć alpinisty — čyściać śnieh, źbivajuć lod», — raskazała Tochka.by supracoŭnica ŽEU.
Adnak dziejańni alpinistaŭ tolki minimizujuć zalićcio. Marazy tak-siak dapamohuć — časova zapłambujuć cieču.
Kapitalny ramont doma zapłanavany na 2027 hod. Ale kamunalniki abiacajuć vykanać biahučy ramont dachu raniej — pierakryćci ŭzmocniać viasnoj.
Kamientary