Alaksandr Saładucha pryznaŭsia ŭ lubovi da niatopavaha biełaruskaha futbolnaha kłuba
Na vychodnych pa spartyŭnych sajtach raźlaciełasia fota śpievaka ŭ šaliku FK «Baranavičy» — debiutanta vyšejšaj lihi pa futbole. Jon hladzieŭ matč pieršaha turu čempijanatu krainy suprać «Isłačy».
Betnews.by źviazalisia z zasłužanym artystam i daviedalisia, čym ža zapaŭ jamu ŭ dušu kłub, što ŭpieršyniu ŭ svajoj historyi vyjšaŭ u vyšejšuju lihu.
— Usio vielmi prosta: vioska Pałaniečka Baranavickaha rajona — radzima majho baćki Antona Maksimaviča Saładuchi. Jon byŭ vajskoŭcam, słužyŭ i ŭ Rasii, i ŭ Kazachstanie. Ale kožnaje leta ŭ jaho adpačynak my pryjazdžali ŭ Pałaniečku. Častku adpačynku pravodzili tam, častku — na radzimie mamy ŭ Kapylskim rajonie. (…) Moj dziadźka žyŭ zusim pobač sa stadyjonam «Łakamatyŭ», i ja mały haniaŭ u futboł na hetym stadyjonie. Paśla Kazachstana mnie heta było niazvykła — tam ža i tady trava na poli drenna rasła.
Kali ŭ kancy minułaha hoda ja daviedaŭsia, što «Baranavičy» ŭpieršyniu vyjšli ŭ vyšejšuju lihu, nadta ž uściešyŭsia. Sam znajšoŭ kantakt dyrektara kłuba Ivana Iharaviča Krutava i vyjšaŭ na suviaź. A pakolki svoj pieršy matč jany hulali z «Isłačču», to ja prymčaŭsia ŭ Minsk na hulniu padtrymać kamandu.
Ivan mianie sustreŭ, my parazmaŭlali, jon padaryŭ mnie kłubny šalik. My padyšli da pola i pahladzieli na raźminku kamandy. A potym ja pajšoŭ hladzieć hulniu na fan-siektar «Baranavičaŭ» razam sa svaim kiroŭcam.
Paŭtarusia: heta dla mianie vielmi važna, bo Baranavičy — radzima majho baćki. A to ŭžo pačynajuć u internecie pisać, što ŭ minułym hodzie ja sfatahrafavaŭsia z šalikam «Tarpieda» Žodzina, a ciapier — z atrybutykaj «Baranavičaŭ».
U kancy minułaha hoda ja sapraŭdy byŭ na matčy žodzinskaha «Tarpieda» (z «Isłačču»). Vystupaŭ tam. Ale tady mianie Betera (nasamreč Fonbet — NN) zaprasiła, i ja atrymaŭ svoj hanarar. Heta maja praca.
A za «Baranavičy» ja zaŭzieju pa zakliku serca! I 11 krasavika ja abaviazkova pajedu na ich pieršy chatni matč z čempijonam Biełarusi «MŁ» na stadyjon «Łakamatyŭ», jaki viedaju ź dziacinstva!
— Ci razhladajecie varyjant vystupleńnia na chatniaj hulni «Baranavičaŭ»?
— Chaču prapanavać hety varyjant dyrektaru kłuba. A ŭvohule ja vystupaŭ na stadyjonie «Łakamatyŭ» z solnikam 20 maja 2012 hoda, i tam byŭ anšłah.
— A ŭvohule cikaviciesia futbołam?
— Tak, pa mahčymaści. Viedaju, što naša zbornaja pad kiraŭnictvam Viktara Hančarenki palacieła na Kipr na tavaryski matč. Prosta doktar, u jakoha ja lačusia, byŭ zaprošany lacieć sa zbornaj.
A jašče ja ŭ dziacinstvie, kali žyŭ u Kazachstanie, zaŭzieŭ za minskaje «Dynama», jakoje treniravaŭ Eduard Małafiejeŭ. I vy nie ŭjaŭlajecie majo zachapleńnie, kali ja pieravioŭsia z Karahandy ŭ miedycynski instytut u Minsk i ŭpieršyniu trapiŭ na matč «Dynama».
Heta było ŭ 1979 hodzie. Padymajusia nad kupałam stadyjona, a tam poŭna ludziej. Umiaščalnaść stadyjona była 45 tysiač. Hulajuć Pudyšaŭ, Prakapienka, Kurnienin, Vierhiejenka ŭ varotach… Ja byŭ u zachapleńni! Mnie było ŭsiaho 20 hadoŭ, i da hetaha ja čytaŭ pra ŭsio heta tolki ŭ časopisach.
***
Darečy, «Baranavičy» prajhrali «Isłačy» ź likam 0:2, hulnia prajšła na stadyjonie FK «Minsk». U druhim tury kłub 5 krasavika zhulaje ŭ Barysavie ź niekalki zornym BATE.
Kamientary