Japoniec, jaki adsiedzieŭ u biełaruskaj turmie, napisaŭ pra heta knihu. Jon raskazaŭ, čamu im zacikavilisia siłaviki

Dataj vychadu knihi «Turemnyja natatki pra «vučobu» ŭ Biełarusi» aŭtara Kij Terčy paznačana 25 sakavika 2026 hoda. Kupić jaje možna na roznych placoŭkach, u tym liku na Amazon.

Aŭtar u apisańni piša nastupnaje:

«Zachapiŭšysia fatahrafavańniem čyhunak na terytoryi byłoha Savieckaha Sajuza, u śniežni 2024 hoda ja adpraviŭsia ŭ Biełaruś, apošniuju dyktaturu Jeŭropy, u pošukach novaha abjekta dla zdymki. Majo zachapleńnie abiarnułasia ŭmiašańniem palicyi. Padčas dopytu sproba schavać suviaź ź siabrami, kab nie stvarać im niepryjemnaściaŭ, zhulała suprać mianie — mianie zatrymali, a zatym adpravili ŭ turmu. U adzinocie, znachodziačysia ŭ źniavoleńni i vyvučajučy ruskuju movu, ja razvažaju: pra svaju hiendarnuju identyčnaść, pra adnosiny z baćkam i pra žyćcio ŭ cełym. Heta dziońnik «turemnaha navučańnia» daŭžynioj u 200 dzion. Dakumientalnaje ese».

U zaŭvazie redaktara havorycca, što «fraza «zatrymany i źniavoleny ŭ turmu za zdymku ciahnikoŭ u Biełarusi» moža hučać adnaznačna i vyklikać chutčej niehatyŭnuju reakcyju».

«Adnak šlach da hetych padziej byŭ dla aŭtara poŭny ŭnutranych kanfliktaŭ, i navat u źniavoleńni jon praciahvaje pieražyvać i sumniavacca. Hałoŭnaja siła hetaj knihi — u sumlennym i adkrytym apisańni jaho ŭnutranych vahańniaŭ i čałaviečaj uraźlivaści. Akramia taho, kniha kaštoŭnaja jak śviedčańnie realnaści: u joj padrabiazna apisanyja ŭmovy ŭtrymańnia ŭ turmie Biełarusi, dopyty ŭ KDB i šlach da vyzvaleńnia praz pamiłavańnie», — adznačaje redaktar.

Uviečary 24 sakavika na chutki vychad knihi adreahavaŭ adzin ź biełaruskich prapahandysckich telehram-kanałaŭ. Tam tvor nie čytali, ale asudzili. Aŭtary miarkujuć, što kniha pra toje, jak «karniki schapili i kinuli ŭ turmu» japonca Terui Acuki. Sa słoŭ prapahandystaŭ, jaho cikavili «prymiežnyja harady i vioski z Ukrainaj, a asablivuju «luboŭ» aŭtar mieŭ da ciahnikoŭ». U vyniku jaho zatrymali, sudzili, a ŭ červieni 2025‑ha pamiłavali i vysłali z krainy.

Pra zatrymańnie hramadzian Japonii ŭ Biełarusi paviedamlałasia ŭ 2024 hodzie. Vidać, aŭtar knihi — heta zamiežnik, jakoha zatrymali 1 śniežnia 2024‑ha ŭ Kalinkavičach. Japonskija ŚMI pisali, što heta moža być treveł-błohier, aŭtar błoha «Eteru», jaki padarožničaŭ pa śviecie i raskazvaŭ pra miascovy transpart i infrastrukturu. U apisańni błoha paznačana, što «Eteru» zachaplajecca japonskaj poštaj i čyhunkami za miažoj.

Jak minimum adzin hramadzianin Japonii byŭ siarod vyzvalenych i vysłanych za miažu palitviaźniaŭ u śniežni 2025 hoda.

• 0
• 0
• 0
• 0
• 0
• 0
• 0
• 0