17 vyzvalenym u śniežni 2025 hoda palitviaźniam nadadzieny status mižnarodnaj abarony ŭ Polščy
Heta stała viadoma padčas sustrečy namieśnika kiraŭnicy Abjadnanaha pierachodnaha kabinieta, kiraŭnika NAU Paŭła Łatuški z kiraŭnikom Upraŭleńnia pa spravach zamiežnikaŭ Tomašam Cytrynovičam.
U sustrečy taksama pryniali ŭdzieł kiraŭnik pravavoj kamisii Kaardynacyjnaj rady Michaił Kiryluk i pradstaŭnica Centra biełaruskaj salidarnaści Volha Dabravolskaja, paviedamlaje APK.
U chodzie sustrečy abmiarkoŭvalisia pytańni:
— lehalizacyi na terytoryi Polščy 83 palitviaźniaŭ, vyzvalenych i vydvaranych na terytoryju Ukrainy ŭ śniežni 2025 hoda, jakija pryniali rašeńnie ab lehalizacyi ŭ Polščy.
— lehalizacyi troch vyzvalenych palitviaźniaŭ, jakija byli vydvaranyja na terytoryju Litvy 19 sakavika hetaha hoda i 21 sakavika sa zhody polskich uładaŭ pryjechali na terytoryju Polščy dla nastupnaj lehalizacyi.
Tomaš Cytrynovič prainfarmavaŭ Paŭła Łatušku pra toje, što ŭ adnosinach da 17 vyzvalenych palitviaźniaŭ, hramadzian Biełarusi, vydadzieny stanoŭčyja rašeńni ab mižnarodnaj abaronie ŭ Polščy.
Taksama pradstaŭnik polskaha viedamstva adznačyŭ, što prykładajucca namahańni dla paskareńnia pracedury lehalizacyi inšych vyzvalenych palitviaźniaŭ, čyje dakumienty na dadzieny momant razhladajucca va Upraŭleńni.
Padčas sustrečy byli dasiahnuty damoŭlenaści ab pryjarytetnym razhladzie pytańniaŭ lehalizacyi troch biełarusaŭ, jakija byli departavanyja režymam Łukašenki ŭ hrupie z 15 čałaviek u Litvu i płanujuć lehalizavacca ŭ Polščy.
Taksama padčas sustrečy byli zakranutyja prablemnyja pytańni adkryćcia bankaŭskich rachunkaŭ dla hramadzian Biełarusi. Płanujecca, što 26 sakavika adbudziecca sustreča Paŭła Łatuški z kiraŭnictvam Kamisii finansavaha nahladu Polščy, u jakoj praduhledžvajecca ŭdzieł pradstaŭnikoŭ Ministerstva ŭnutranych spraŭ i Ministerstva finansaŭ Polščy dla pošuku šlachoŭ vychadu sa składanaj situacyi.
Kamientary